„ეს არის კომუნიკაციის საკითხი. ადამიანებმა უნდა იცოდნენ სიმართლე. შეწყვიტეთ ეს თამაში“, _ ასე გამოეხმაურა ევროკავშირის საგარეო საქმეთა ურთიერთობების ხელმძღვანელი თურქეთი-საბერძნეთის საზღვარზე არსებულ ვითარებას.
მან ქვეყნებს მოუწოდა საზღვარზე არსებული მიგრანტთა ნაკადი შეაჩერონ.
ბორელმა ასევე აღნიშნა, რომ მიგრანტებმა უნდა იცოდნენ, რომ საზღვარი თურქეთსა და საბერძნეთს შორის დაკეტილია.
ცნობისთვის, სირიაში, იდლიბის რეგიონში რამდენიმე დღის წინ ვითარება კიდევ უფრო დაიძაბა. მას შემდეგ რაც ავიაიერიშს თურქი სამხედროები ემსხვერპლნენ, ერდოღანმა გასცა ბრძანება, რომ მიგრანტებისთვის, რომელსაც ქვეყანა აჩერებს და ევროკავშირში უკანონოდ შეღწევის საშუალებას არ აძლევს, საზღვრები გაეხსნათ.
თურქეთის საზღვრიდან საბერძნეთისკენ დაძრულ მიგრანტებს საბერძნეთის უსაფრთხოების ძალები დაუპირისპირდა და ქვეყანაში შესვლის საშუალება არ მისცა. დაპირისპირება მიგრანტებსა და საბერძნეთის სასაზღვრო პოლიციას შორის რამდენიმე დღეა გრძელდება.
ევროკავშირი საბერძნეთს მიგრანტების შესაჩერებლად 700 მილიონი ევროთი დახმარებას პირდება, რადგან სირიიდან ომს გამოქცეული ადამიანები ევროკავშირში შეღწევას ცდილობენ.
რუსეთისა და თურქეთის პრეზიდენტები იდლიბში ვითარების განსამუხტად ცეცხლის შეწყვეტაზე შეთანხმდნენ, თუმცა, უცნობია როგორ დაეხმარებიან მშვიდობიან მოქალაქეებს.
