ორი დღის წინ ესპანურმა გამოცემამ „მარკა“ საინტერესო ინფორმაცია გაავრცელა. აღმოჩნდა რომ საქართველოს ეროვნული გუნდისა და „ვალენსიას“ კარის დარაჯის შეძენა ინგლისურ „მანჩესტერ იუნაიტედს“ სურს.
აღსანიშნავია, რომ ამ სახის „ნიუსი“ თავდაპირველად ერთი თვის წინ გავრცელდა და ქართველი მეკარის სახელი „იუნაიტედის“ გარდა ლონდონის „ტოტენჰემსაც“ დაუკავშირეს. ოღონდ ამ კლუბებს მაშინ მამარდაშვილი მეორე კარის დარაჯის ადგილზე სურდათ. ამჯერად მდგომარეობა სრულიად საწინააღმდეგოა.
„მანჩესტერ იუნაიტედის“ ხელმძღვანელობა დავიდ დე ხეას თამაშით უკმაყოფილოა, განსაკუთრებით „ბრენტფორდთან“ (0:4) დაშვებული შეცდომების გამო და მის შემცვლელზე ფიქრობს.
„მარკას“ მტკიცებით, ინგლისური გუნდის წარმომადგენელი უკვე დაუკავშირდა ქართველ მეკარეს. „იუნაიტედი“ მზადაა 35-40 მილიონი ფუნტი სტერლინგი გაიღოს, რომ „ვალენსია“ მის გაყიდვაში დაიყოლიოს.
ესპანეთის „ლა ლიგის“ პირველ ტურში „ვალენსიამ“ ათი კაცით მოახერხა „ჟირონას“ დამარცხება – 1:0, გიორგი მამარდაშვილმა კი სეზონში პირველი მშრალი მატჩი ჩაიწერა აქტივში. 21 აგვისტოს ქართველი სტუმრად ბილბაოს „ატლეტიკის“ წინააღმდეგ ითამაშებს.
დავიდ დე ხეა მამარდაშვილზე 10 წლით უფროსია, ის 2011 წელს მადრიდის „ატლეტიკოდან“ გადავიდა „მანჩესტერ იუნაიტედში“, სადაც უკვე მე-12 სეზონია, რაც თამაშობს.
იტალიის ნაკრების ყოფილმა თავდამსხმელმა ანტონიო კასანომ კი „Bobo TV“-ს ეთერში „ნაპოლისა“ და ხვიჩა კვარაცხელიას შესახებ ისაუბრა.
„არ ვიცი, ნახე თუ არა ეს გოლი „ბობო“. ნახე. რა გოლი გაიტანა. შთამბეჭდავად ჭკვიანურად ითამაშა. წავიდა ასახტომად ოსიმენის უკნიდან, ჟელინსკის გოლზეც რა პასი გააკეთა. კვარაცხელია ბიჭებო, საოცარია. ინსინიესა და კვარაცხელიას შორის განსხვავება აშკარაა: ლორენცო წინ და უკან მოძრაობდა, ქართველი კი შეტევის ფაზაში პრაქტიკულად მეორე თავდამსხმელია. „ვერონასთან“ თავური დარტყმით გატანილი გოლი ამტკიცებს, რომ ეს ბიჭი გენიალურია“, – აღნიშნა კასანომ.
„RBC Sport“-თან საუბარში „ჰალ სიტის“ ქართველმა მწვრთნელმა შოთა არველაძემ ხვიჩა კვარაცხელიას შესახებ ისაუბრა.
„ამხანაგურ თამაშებში მან თავი კარგად წარმოაჩინა და დამსახურებულად მოიპოვა ადგილი შემადგენლობაში. გარდა გოლისა, მან ძალიან კარგი შედეგიანი გადაცემაც გააკეთა, რაც მის მაღალ ინდივიდუალურ მონაცემებზე და ასევე თამაშის კარგ ხედვაზე მეტყველებს. ვფიქრობ, დონე და ძალა, რომელსაც ხვიჩა ავლენს, სისწრაფეში, ან თუნდაც ბურთის მიღებისას, გვაძლევს იმის თქმის საშუალებას, რომ მაღალი დონის მიუხედავად, ის თავის თამაშს კიდევ უფრო გააუმჯობესებს და წელს მინიმუმ 12 გოლს გაიტანს.
ხვიჩას აქვს ძალიან კარგი და ლამაზი კარიერული განვითარება. ის სუპერ კლუბში გადავიდა, მანამდე კი საქართველოში თამაშობდა და ყველას დაანახა, რომ მისთვის არ აქვს მნიშვნელობა, თუ სად აჩვენებს თავის მაღალ დონეს. თქვენ უნდა გენახათ, რა დღესასწაული იყო მისი სადებიუტო შეხვედრა საქართველოში, როგორ უხაროდა ხვიჩას თავის ქვეყანაში თამაში. ეს მთელი ქვეყნისთვის პატარა დღესასწაული იყო“, – განაცხადა შოთა არველაძემ.
იტალიურ მასმედიაში ხვიჩა კვარაცხელიას ადგილობრივი გულშემატკივრებიც დაუფარავად აქებენ. რასაკვირველია მათ შორის განსაკუთრებით „ნაპოლის“ ფანები გამოირჩევიან.
„საუკეთესო ბიჭი, ასე გააგრძელე“
„დიდებული ხარ, ძალიან გაგვახარე“
„კვარადონა!“
„ასე გააგრძელე, ჩვენ შენს გვერდით ვართ“
„საოცარი დებიუტი, მადლობა „კვარა“!
„დიდებული ტალანტი და დიდებული თამაშის შეგრძნება, „კვარამარადონა“
ხვიჩას „ნაპოლი“ მორიგ მატჩს 21 აგვისტოს, „მონცას“ წინააღმდეგ საშინაო კედლებში გამართავს.
გუშინ გავრცელდა ცნობა რომ უახლოეს მომავალში, იტალიის „სერია A“-ში მესამე ქართველი ლეგიონერი შეიძლება ვიხილოთ. არის შანსი, ხვიჩა კვარაცხელიასა და ლუკა ლოჩოშვილის შემდეგ, იტალიის 2022/23 წლების ჩემპიონატში გიორგი მიქაუტაძემაც ითამაშოს.
საქართველოს ნაკრებისა და ფრანგული „მეცის“ თავდამსხმელის შესახებ საინტერესო ინფორმაცია გამოცემამ „DAZN Italia“ გაავრცელა, რომელიც ამტკიცებს, რომ 21 წლის თავდამსხმელი „სერია A“-ს კლუბებს – „ლეჩესა“ და „ტორინოს“, ასევე თურქულ „გალათასარაის“ შესთავაზეს.
ამ ინფორმაციას არაერთი იტალიური და თურქული წყაროც ავრცელებს, თუმცა ჯერჯერობით უცნობია, რამდენად სერიოზულია საფრანგეთში დაბადებული ქართველი ფეხბურთელის მიმართ დასახელებული კლუბების ინტერესი.
მიქაუტაძემ ფრანგულ „ლიგა 2“-ში სეზონი შთამბეჭდავად დაიწყო და დიდ ყურადღებას იპყრობს. გიორგი სამივე შეხვედრაში შედეგიანი მოქმედებით გამოირჩა (2 გოლი, 1 საგოლე პასი), მე-3 ტურში „ვალანსიენთან“ მატჩში (2:0) გატანილი გოლისა და ეფექტური თამაშის წყალობით კი, სულაც ტურის ფეხბურთელად დაასახელეს.
ავტორი
