რამდენიმე დღის წინ ინგლისურ და ბრიტანულ მასმედიაში გავრცელდა ინფორმაცია, რომ საქართველოს ეროვნული გუნდისა და „ვალენსიას“ კარის დარაჯი გიორგი მამარდაშვილი დიდი ალბათობით კარიერას ინგლისურ „მანჩესტერ იუნაიტედში“ გააგრძელებს.
მანჩესტერული კლუბი ესპანელ მეკარე დავიდ დე ხეასთან ხელშეკრულების გაგრძელებას ვერ ახერხებს და მიმდინარე სეზონის შემდეგ ეს უკანასკნელი ალბათ ამ გუნდს დატოვებს. მის შემცვლელთა სიაში ერთ ერთი საქართველოს ნაკრების მეკარეა.
საინტერესოა, რომ „იუნაიტედის“ გარდა მამარდაშვილს „ტოტენჰემის“ ვარიანტიც გამოუჩნდა. ამ კლუბის კარის დარაჯი, ფრანგი უგო ლორისი პრემიერლიგის ჩემპიონატის დამთავრების შემდეგ ლონდონურ გუნდს ოფიციალურად დაემშვიდობება.
ესპანური გამოცემა „elgoldigital“-ის მტკიცებით, „ვალენსიაში“ მამარდაშვილის შემცვლელს უკვე ეძებენ.
„მამარდაშვილი „ვალენსიის“ ერთ-ერთი ყველაზე წარმატებული ტრანსფერია. ქართველი მეკარის შესახებ, გუნდში მისვლის დროს, არავინ იცოდა. მიუხედავად ამისა, მისი კარიერა „ვალენსიაში“ შესაძლოა, დროზე ადრე დასრულდეს.
როგორც ვიცით, ვალენსიური კლუბი დიდ ეკონომიკურ კრიზისშია, შესაბამისად, მოსალოდნელია, რომ გუნდის საუკეთესო ფეხბურთელები ზაფხულში წავლენ. მამარდაშვილი ერთ-ერთი საუკეთესო ვარიანტია კლუბისთვის, რომ დიდი შემოსავალი მიიღოს და მისი დამატებით არაერთი კლუბია დაინტერესებული.
ორი დიდებული სეზონის შემდეგ, მამარდაშვილის სატრანსფერო ღირებულება 25 მილიონ ევრომდე გაიზარდა. ეს არის თანხა, რომლის მიღებაც ესპანურ კლუბს მამარდაშვილის სანაცვლოდ სურს, რომელიც ერთ წელზე მეტი ხნის წინ მილიონ ევროზე ნაკლებად შეიძინეს.
„ვალენსიამ“ იცის, რომ მამარდაშვილი კლუბს დატოვებს, შესაბამისად, მათ სატრანსფერო ბაზრის შემოწმება დაიწყეს, სადაც ქართველი მეკარის პოტენციურ შემცვლელს ეძებენ. ყველაზე რეალური ვარიანტი ლუკას კანისარესია, კლუბის ლეგენდის სანტიაგო კანისარესის ვაჟი. 21 წლის მეკარე მადრიდის „რეალის“ აკადემიაში თამაშობს, მაგრამ დიდი ნაბიჯის გადასადგმელად უკვე მზადაა.
კიდევ ერთი ვარიანტი არნაუ ტენასია, რომელსაც, ლუკას კანისარესის მსგავსად, კონტრაქტი ივნისში ეწურება. ინიაკი პენიასთან კონტრაქტის გახანგრძლივების შემდეგ „ბარსელონას“ პირველ გუნდში მისთვის კარი დაიხურა, სწორედ ამიტომ სურს ტენასის „ბარსელონას“ სარეზერვო გუნდის დატოვება, „ვალენსიის“ მსგავსი კლუბი კი მას პოტენციალის გამოსავლენად ხელს შეუწყობს“, – დაწერა ესპანურმა გამოცემამ.
საქართველოს ნაკრების ფეხბურთელი გიორგი ჩაკვეტაძე კი ვენის „რაპიდში“ გადასვლას უახლოვდება.
გამოცემა „laola1“-ის ინფორმაციით, რამდენიმე დღის წინ ჩაკვეტაძე ვენაში იმყოფებოდა.
„ის ვენაში დასვენების მიზნით იმყოფებოდა, თუ ტრანსფერის დეტალებს ათანხმებდა, მხოლოდ ვარაუდი შეგვიძლია.
ჩაკვეტაძე ბელგიური „გენტის“ საკუთრებაა, თუმცა, მის კონტრაქტს ვადა 2023 წლის ივნისში გასდის და მისი „სლოვანში“ იჯარაც დასრულდება. ეს ნიშნავს, რომ ქართველი ფეხბურთელი, რომლის საბაზრო ფასიც 2.2 მილიონი ევროა, თავისუფალი აგენტი გახდება“, – დაწერა გამოცემამ.
ეს მოულოდნელი ინფორმაციაა, რადგან ცნობილი იყო რომ ქართველ ნახევარმცველს „გენტთან“ ხელშეკრულება 2026 წლამდე ჰქონდა გაფორმებული. თუკი ავსტრიელები სიმართლეს წერენ, ეს გიორგისთვის კარგი ამბავი უნდა იყოს.
ცნობილი სარაგბო გამოცემა „Rugbyrama“ მომავალ მსოფლიო თასზე საქართველოს ნაკრების შანსებს გამოეხმაურა:
„ევროპული რაგბის ყველაზე განვითარებადი ერი საქართველო მსოფლიოს 2023 წლის თასზე ისტორიაში საუკეთესო შემადგენლობით გაემგზავრება. ქართველი მორაგბეები ფინალურ ეტაპზე 2003 წლიდან მოყოლებული უცვლელად თამაშობენ, თუმცა, ჯგუფური ეტაპი არასდროს დაუძლევიათ. საფრანგეთში უკვე მათი ახალი თაობა მიდის და მერაბ შარიქაძის თანაგუნდელები მაქსიმუმს გააკეთებენ, რათა ჯგუფში სამი მატჩი მოიგონ.
ეს საქართველოს ნაკრებისთვის ისტორიული შედეგი იქნება, რადგანაც აქამდე ყველაზე მეტი – 2 გამარჯვება მხოლოდ ერთხელ, 2015 წლის მსოფლიო თასზე მოუპოვებიათ. ბოლო პერიოდია, საქართველომ თამასა სერიოზულად ასწია. მათთვის 2022 წელი ნამდვილად სენსაციური იყო: რაგბი ევროპის ჩემპიონატი ხომ კიდევ ერთხელ მოიგეს და რაც მთავარია, ტესტებში ჯერ – იტალიას, შემდეგ კი, უელსს სძლიეს კარდიფში.
უელსი და საქართველო ერთმანეთს მსოფლიო თასზეც დაუპირისპირდებიან.
ახლა, დგება ჯერი, რომ ქართველმა მორაგბეებმა თავიანთი მზარდი სტატუსი მსოფლიო რაგბის გრანდებთან კიდევ ერთხელ დაამტკიცონ. შემოდგომაზე მათ წინ „ორიაკის“ ყოფილი მოთამაშე მერაბ შარიქაძე გაუძღვება, რომელიც ამჟამად ქართული ფრენჩაიზის „შავი ლომის“ ღირსებას იცავს. შარიქაძეს ზურგს 91 კეპი უმაგრებს და ფიზიკური მონაცემებით გამოირჩევა.
ქართული რაგბის ერთ-ერთი იმედია ნამდვილი საგანძური – დავით ნინიაშვილი. მან აპრილში ტრავმა მიიღო, თუმცა, საკმარისი დრო აქვს მსოფლიო თასს კარგ ფორმაში შეხვდეს. მისი საოცარი სისწრაფე და მოქნილობა მთელი გასული სეზონის განმავლობაში აღტაცებას იწვევდა. ის არის ბომბი საქართველოდან, რომელმაც უკვე სანაკრებო ტურნირზე უნდა გაიბრწყინოს.
საერთო ჯამში, შეიძლება ითქვას, რომ საქართველოს ნაკრებს კალენდარიც კარგი აქვს. ქართველები მსოფლიო თასში 9 სექტემბერს ავსტრალიასთან მატჩით ჩაებმებიან, 23-ში პორტუგალიასთან თამაშია, 30-ში – ფიჯისთან, 7 ოქტომბერს კი უელსს გაეჯიბრებიან. აქედან ორი მეტოქე – პორტუგალია და უელსი მათ არცთუ დიდი ხნის წინ ჰყავთ დამარცხებული“.
გუშინ ვებგვერდმა „Goal.com“ საინტერესო ინფორმაცია გაავრცელა. აღმოჩნდა რომ საუდის არაბეთის „ალ-ნასრის“ თავდამსხმელი კრიშტიანო რონალდო შეიძლება ინგლისის პრემიერლიგაში დაბრუნდეს.
38 წლის პორტუგალიელით დაინტერესებულია „ნიუკასლი“, რომელიც მზად არის წინადადებით მიმართოს ფეხბურთელსა და მის კლუბს. ასევე ინგლისური გუნდი გეგმავს „პარი სენ-ჟერმენის“ ფორვარდი ნეიმარის გაფორმებას.
ავტორი
