მსოფლიოს ყურადღება კატარის მუნდიალისაკენ არის მიპყრობილი. ამის მიუხედავად რამდენიმე სპორტული მოვლენა გულშემატკივრების განსაკუთრებულ დაინტერესებას იწვევს. ამათთა რიცხვში პორტუგალიელი კრიშტიანუ რონალდუს დაუმთავრებელი და გაჭიანურებული „საგა“ უპირველეს ადგილს იკავებს.
ცნობილი გახდა რომ ხანგრძლივი კონფლიქტის შემდეგ 37 წლის თავდამსხმელმა „მანჩესტერ იუნაიტედი“ ოფიციალურად დატოვა.
კლუბის საიტი იტყობინება, რომ მხარეებმა ხელშეკრულება ორმხრივი შეთანხმების საფუძველზე გაწყვიტეს და ძალაში დაუყოვნებლივ შედის. რონალდოს კონტრაქტი 8 თვის შემდეგ უსრულდებოდა, ამ პერიოდში 17 მილიონ ფუნტამდე უნდა მიეღო, მაგრამ კომპენსაციაზე უარი თქვა.
კრიშტიანომ ამ სეზონში პრემიერლიგის 10 მატჩში 1 გოლი გაიტანა, ამჟამად ნაკრების შემადგენლობაში მსოფლიო ჩემპიონატზე იმყოფება და ჯერ უცნობია, რომელ კლუბში გააგრძელებს კარიერას.
რონალდუ, სოციალური ქსელის მეშვეობით, გულშემატკივრებს თბილად დაემშვიდობა და კლუბს წარმატებები უსურვა.
ესპანური გამოცემა „Marca“–ს ცნობით, კრიშტიანუს დამატებისთვის „ნიუკასლი“ და „ალ ნასრი“ იბრძოლებენ.
ინგლისური კლუბი ფეხბურთელისთვის ბრძოლაში ლიდერობს, რადგან კრიშტიანუს ევროპაში დარჩენა სურს. „ნიუკასლი“ ამ სეზონში დამაჯერებლად ასპარეზობს და პრემიერლიგის სატურნირო ცხრილში მე-3 ადგილს იკავებს.
ცნობილ რუს სპორტულ ჟურნალისტ ვასილი უტკინს მიაჩნია, რომ კრიშტიანუ რონალდუ კარიერას „რომაში“ განაგრძობს.
„კითხულობენ, ახლა სად წავა რონალდუ? – უცნარი კითხვაა… აშკარაა, „რომაში“, – დაწერა გუშინ უტკინმა.
„რომას“ ახლა ჟოზე მოურინიო წვრთნის, რომელთანაც კრიშტიანო მადრიდის „რეალში“ უკვე მუშაობდა.
„მანჩესტერ სიტის“ ყოფილმა ფეხბურთელმა ვინსენ კომპანიმ „BBC RADIO“–ში რონალდოს თემაზეც ისაუბრა. მას კითხვა დაუსვეს, დაიმატებდა თუ არა პორტუგალიელს „ბარნლიში“, რაზეც კომპანიმ ხუმრობით უპასუხა, რომ მას გუნდში ისეთი ფეხბურთელები სჭირდება, რომლებსაც სირბილი შეუძლიათ.
„ვფიქრობ, რომ ამ გადაწყვეტილებით ყველა წააგებს, „მანჩესტერ იუნაიტედის“ მწვრთნელის გარდა. მიმაჩნია, რომ ეს პრობლემა მოგვარდა და ახლა იუნაიტედში სხვა საკითზე უნდა გადაერთონ“, – განაცხადა კომპანიმ „BBC RADIO“–ს ეთერში.
გუშინ იტალიურ სპორტულ მასმედიაში გამოითქვა ვარაუდი რომ შეიძლება კრიშტიანუ რონალდუ „ნაპოლიმ“ აიყვანოს. ფეხბურთელი დღეს თავისუფალი აგენტია და რატომ არ ეცდება აურელიო დე ლაურენტისი ამას ახლა, როცა პორტუგალიელ ვარსკვლავში ერთი ცენტიც არ ექნება გადასახდელი? არადა, როგორი საინტერესო ამბავია – ხვიჩა კვარაცხელია და კრიშტიანო ერთ გუნდში?!
ამასობაში „მანჩესტერ იუნაიტედის“ მფლობელები, ამერიკელი მილიარდერები გლეიზერები აცხადებენ, რომ პრემიერლიგის კლუბის გაყიდვას გეგმავენ, რადგან ისინი სტრატეგიულ ალტერნატივებს ეძებენ.
გლეიზერებმა „იუნაიტედი“ 2005 წელს შეიძინეს. ბოლო პერიოდში გავრცელებული უსიამოვნებებისა და წარუმატებლობების შემდეგ, ქალაქში საპროტესტო აქციები დაიწყო – გულშემატკივრები გლეიზერების წასვლას მოითხოვენ.
„საბჭო განიხილავს ყველა სტრატეგიულ ალტერნატივას, მათ შორის კლუბში ახალ ინვესტიციას, გაყიდვას ან სხვა ტრანზაქციას, რომელიც კომპანიას შეეხება. ეს პროცესი მოიცავს რამდენიმე ინიციატივის შეფასებას კლუბის გაძლიერების მიზნით, მათ შორის სტადიონისა და ინფრასტრუქტურის განახლებას და კლუბის კომერციული ოპერაციების გაფართოებას გლობალურ დონეზე, რაც ხელს შეუწყობს და გააძლიერებს მამაკაცთა, ქალთა და აკადემიის კლუბების გრძელვადიან წარმატებას და სარგებელს მოუტანს გულშემატკივრებსა და სხვა დაინტერესებულ მხარეებს“, – წერია გლეიზერების მიერ გავრცელებულ განცხადებაში.
„ნაპოლის“ ქართველი ფეხბურთელი ხვიჩა კვარაცხელია კი შვებულებაშია და ზურგის ტრავმის მორჩენას ცდილობს. ქართველის თემას გუშინ პოპულარული „Gazzetta Dello Sport“ გამოეხმაურა.
„ის მიზნად ისახავს, რომ მზად იყოს მომდევნო კვირის დასაწყისში, როდესაც სპალეტის გუნდი ვარჯიშს განაახლებს. „ნაპოლი“ კასტელ ვოლტურნოში შეიკრიბება, სანამ თურქეთში შეკრებაზე წავლენ. ქართველი ფეხბურთელი აგრძელებს სარეაბილიტაციო პერიოდს, რათა 100%-ით მზად დაბრუნდეს“.
პეპ გვარდიოლა კი „მანჩესტერ სიტისთან“ კონტრაქტს გაახანგრძლივებს. ამის შესახებ ინფორმაცია გამოცემამ „The Athletic“ გაავრცელა.
ცნობილი გახდა რომ ესპანელი სპეციალისტი „მანჩესტერ სიტისთან“ კონტრაქტს 2025 წლის ზაფხულამდე გააფორმებს და ინფორმაცია უახლოეს ხანში ოფიციალურად უნდა დადასტურდეს.
პეპ გვარდიოლა „მანჩესტერ სიტის“ 2015 წლიდან ავარჯიშებს და ამ პერიოდში გუნდს ოთხ–ოთხჯერ პრემიერლიგა და ინგლისის ლიგის თასი, ორჯერ ინგლისის სუპერთასი და ერთხელ ინგლისის ასოციაციის თასი მოაგებინა.
ავტორი
