თავდაცვის მინისტრი ლევან იზორია კატეგორიულად უარყოფს გავრცელებულ ინფორმაციას იმის შესახებ, რომ 22 მარტს საქართველოს ტერიტორიიდან სომხეთის ტერიტორიაზე „იგლას“ ტიპის საზენიტო რაკეტები გადავიდა.
როგორც იზორიამ თავდაცვის და უშიშროების კომიტეტის სხდომაზე განაცხადა, აღნიშნულტან დაკავშირებით გამოძიება მიმდინარეობს, ამ ეტაპზე კი მსგავსი ფაქტი არ დასურდება.
„დაბეჯითებით შემიძლია გითხრათ და ეს შეგიძლიათ გადაამოწმოთ, პირველ დღეს იყო გარკვეული კითხვები, თუმცა მეორე დღეს სომხურმა მხარემაც დაადასტურა, რომ ჯერ, ამ ეტაპზე, თქმა იმისა, რომ საქართველოს საზღვრებიდან გადავიდა „იგლა“-ს ტიპის საზენიტო რაკეტები… არასწორი ინფორმაცია იყო, არ ვიცი, ვინ რა გაავრცელა, გამოძიების ფარგლებში ასეთი ფაქტი არ დასტურდება, გამოძიება გრძელდება, თუ დამატებით რაიმე ინფორმაცია მივიღეთ, საზოგადოებაც და თქვენც გაიგებთ.
ყველა საზენიტო რაკეტას გააჩნია თავისი კოდი, მე სპეციალურად მივიღე იმ დილასვე გადაწყვეტილება, რომ აღგვერიცხა თავიდან და ყველა ის რაოდენობა რაც იყო, მე არ ვიცი 20 წლის წინ თუ სადმე იმალებოდა, მაგრამ ოფიციალური მონაცემით რაც იყო, ზუსტად ის არის ერთი-ერთში ასეთი ტიპის რაკეტები. ასე რომ, ეს დამატებითი განმარტება იმისთვის, რომ არ გაჩენილიყო კითხვები ხომ არ ჰქონდა საზენტიო რაკეტების გადინებას ადგილი, რაც აბსოლუტურად გამოვრიცხეთ“, _ აღნიშნა იზორიამ.
ცნობისთვის, სომხეთის სპეცსამსახურებმა 22 მარტს თავიანთი ქვეყნის ორი მოქალაქე დააკავეს, რომელთაც ბრალად ედებათ საქართველოს ტერიტორიიდან კონტრაბანდის სახით სომხეთში გადასატანი საზენიტო-სარაკეტო კომპლექს Игла-ს თვითდამიზნებადი საზენიტო მართვადი რაკეტა – 9М39-ის (გასაშვებ ერთჯერად კონტეინერთან ერთად) შეტანა. ამ საქმეზე თვითაღიარებული მთიანი ყარაბაღის თავდაცვის ყოფილი მინისტრის, სამველ ბაბაიანის დაკავებამ (გამოძიება მას ბრალს “იგლას” სომხეთში შეტანის დაკვეთაში სდებს) სიტუაცია უფრო სკანდალური გახადა, რადგან ბაბაიანი ცნობილი ოპოზიციონერი ლიდერი გახლავთ და არჩევნებში მონაწილეობის მისაღებად ემზადება.
