ორი დღის წინ გავრცელდა ინფორმაცია, რომ საქართველოს ნაკრებისა და „ვალენსიას“ კარის დარაჯი გიორგი მამარდაშვილით ინგლისური „მანჩესტერ იუნაიტედი“ დაინტერესდა.
გუშინ ამ თემას ბრიტანული გამოცემა „Mirror“ გამოეხმაურა:
„მანჩესტერ იუნაიტედი“ პაუ ტორესთან მოლაპარაკებას აწარმოებს და იგი ერთ-ერთი ფეხბურთელი იქნება, რომელსაც ისინი მიმდინარე წლის ზაფხულში გაიფორმებენ. ტორესის გარდა, „იუნაიტედმა“ სატელეფონო ზარი გიორგი მამარდაშვილთანაც განახორციელა და დაინტერესდა მისი შეძენა შესაძლებელია თუ არა და მის სანაცვლოდ „ვალენსია“ რამდენს ითხოვს.
ქართველ ფეხბურთელს ესპანურ გუნდთან კონტრაქტი 2024 წლის ზაფხულამდე აკავშირებს და კლუბს „კოპა დელ რეის“ ფინალში გასვლაში დაეხმარა. ამბობენ, რომ „ვალენსია“ მზადაა, ქართველში დაახლოებით 15 მილიონი ევროს ოდენობის წინადადება განიხილოს. თუმცა „მანჩესტერ იუნაიტედს“ „ვალენსიასთვის“ სერიოზული წინადადებით არ მიუმართავს და დისკუსია საწყის ეტაპზეა, რათა შეფასდეს ხელფასთან დაკავშირებით მამარდაშვილის მოთხოვნები და აქვს თუ არა ესპანურ გუნდს ქართველი მეკარის გაყიდვის სურვილი, რომელსაც გამორჩეული სეზონი ჰქონდა“.
„მანჩესტერ იუნაიტედის“ ძირითადი მეკარე ესპანელი დე ხეაა, რომელსაც უახლოეს დღეებში ხელშეკრულებას გაუხანგრძლივებენ. მიმდინარე წლის ზაფხულში ბრიტანულ გუნდს ორი კარის დარაჯი დატოვებს, ორი კი დარჩება. გიორგი მამარდაშვილი მეორე-მესამე მეკარის პოზიციაზე იგულისხმება. ინგლისელები მისი ახალგაზრდული ასაკიდან გამომდინარე, უახლოესი წლების პერსპექტივას ითვალისწინებენ. ალბათ უმჯობესი იქნება თუ ქართველი „ვალენსიაში“ კიდევ ერთი სეზონის განმავლობაში დარჩება. ევროპული საზომით ეს კლუბი ტრადიციული, კარგი და ნორმალური გუნდის ავტორიტეტით სარგებლობს და ესპანეთში „ვალენსიას“ ძირითადი მეკარეობა ნამდვილად სჯობს ინგლისში, „მანჩესტერ იუნაიტედის“ კარის მეორე-მესამე პოზიციებზე ყოფნას.
გუშინ, უნგრეთის ჩემპიონატში მოასპარეზე „უიპეშტმა“ სადაც საქართველოს ნაკრების ორი ფეხბურთელი, ბუდუ ზივზივაძე და გიორგი ბერიძე თამაშობენ, სეზონის საუკეთესო გუნდი გამოავლინა. გამოკითხვაში, რომელიც სეზონის დასრულების შემდეგ ჩატარდა, მონაწილეობას უნგრული კლუბის გულშემატკივრები იღებდნენ. ქართველი გულშემატკივრებისთვის სასიხარულოდ, გამოკითხულთა უმრავლესობამ სეზონის საუკეთესოდ ბუდუ ზივზივაძის გოლი აირჩია, რომელიც 28 წლის ფეხბურთელმა 16 აპრილს, „ზალაეგერშეგის“ წინააღმდეგ გაიტანა.
გუშინ რუსულ მასმედიაში ჯანო ანანიძის ინტერვიუ გამოჩნდა. აღმოჩნდა რომ საქართველოს ეროვნული გუნდის ყოფილი ფეხბურთელი სამშობლოში ფეხბურთის აკადემიის გახსნას აპირებს.
„მინდა საფეხბურთო აკადემია გავხსნა. საქართველოში იზრდებიან ნიჭიერი ფეხბურთელები. მაქვს სურვილი მათ განვითარებას დავეხმარო. რომ შევაჯამოთ მე ღირსეული კარიერა მქონდა. სამშობლოში თავ აწეული დავდივარ და ჩემი ნათამაშები ფეხბურთისთვის ყველა მადლობას მიხდის. ადრე დავიწყე და ადრე დავასრულე. ე.ი ეგრე უნდა ყოფილიყო. ჩემი გადმოსახედიდან მეტის გაკეთებაც შემეძლო, მაგრამ მადლიერი ხალხის ემოცია მაკმაყოფილებს. პატარა ქართველი ბიჭის ოცნება ბოლომდე არ ახდა. კარიერის დასრულების შემდეგ იმდენმა ადამიანმა მომწერა, რომ მივხდი ეს ყველაფერი ტყუილად არ გამიკეთებია. ე.ი. უბრალო ფეხბურთელი არ ვყოფილვარ,“ – განაცხადა ჯანო ანანიძემ.
გუშინ, „ჰალ სიტის“ მთავარი მწვრთნელი შოთა არველაძე თურქულ მედიას ესაუბრა და ინგლისურ კლუბში თავის მთავარ მიზანსა და ოცნებაზე ილაპარაკა.
„ინგლისის ჩემპიონატი რთულია. მასთან შეჩვევა ნელ-ნელა მოვახერხე. გვსურს, მომავალ სეზონში „ჰალ სიტი“ უფრო უკეთესი გავხადოთ. ჩვენი პრეზიდენტის, აჯუნ ილიჯალის მხარდაჭერა თავდაჯერებას გვმატებს.
გვინდა პრემიერლიგაში მოვხვდეთ და ჩვენს პრეზიდენტთან ერთად გეგმებს ვაწყობთ. ჩემი ერთადერთი მიზანი, ჩემი ოცნება – ამ გუნდის პრემიერლიგაში გადაყვანაა“, – განაცხადა შოთა არველაძემ.
ბელგიურმა გამოცემამ „Voetbalprimeur“ „ჟუპილერ ლიგის“ გასული სეზონის სიმბოლური ნაკრების შედგენა დაიწყო და თავდამსხმელების რვა ნომინანტს შორის „სერენის“ ქართველი შემტევი გიორგი მიქაუტაძეც დაასახელა.
„ცხადია, ზუსტად პროცენტებში ასახვა გაგვიჭირდება, თუმცა, იმაში, რომ „სერენმა“ უმაღლეს ლიგაში ადგილი შეინარჩუნა, უდიდესი წვლილი გუნდის საუკეთესო ბომბარდირს მიუძღვის. მიქაუტაძე ფორვარდების უმეტესობის მსგავსად სიმაღლითა და განიერი მხრებით არ გამოირჩევა, სამაგიეროდ, მისი პლუსებია სწრაფი დრიბლინგი და ლამის ყველა პოზიციიდან კარში დარტყმის უნარი. დასკვნის სახით შეიძლება ითქვას, რომ ის სერენისთვის ზედმეტად კარგი ფეხბურთელია“, – დაწერა ვებგვერდმა.
ავტორი
