გუშინ ინგლისური „ჰალ სიტის“ მფლობელმა აჯუნ ილიჯალიმ საკუთარი გუნდის სამომავლო გეგმებზე და კლუბში მთავარი მწვრთნელი შოთა არველაძის როლზე ისაუბრა.
„განსაკუთრებული წელი იყო. წელი, როდესაც ჩემი ოცნებები ახდა და ძალიან ბედნიერი ვარ, რომ ასეთი კლუბი და ასეთი ქალაქი ჩემს ოჯახს წარმოადგენენ. ლამაზი სეზონის გამო ჩემს ფეხბურთელებსა და ყოფილ და ახალ მთავარ მწვრთნელს უდიდეს პატივს ვცემ და ვაფასებ იმ სამუშაოს, რაც გუნდმა გასწია. ახლა ჩვენი უმთავრესი სამომავლო მიზანი „პრემიერ ლიგაში“ გადასვლაა. გვინდა, საგზურისთვის ვიბრძოლოთ, ძლიერი გუნდი გვყავდეს და „პრემიერ ლიგაში“ გადასასვლელად ძალები არ დავზოგოთ. ჩვენი მომდევნო მიზანი სწორედ ესაა და დარწმუნებული ვარ, რომ ამ შესანიშნავ ქომაგებთან, ფეხბურთელებთან და მაღალკვალიფიცირებულ მწვრთნელთან ერთად, სასურველ შედეგს დავაფიქსირებთ“.
გუშინ გერმანული „ჰამბურგის“ მთავარმა მწვრთნელმა ტიმ ვალტერმა გიორგი ჩაკვეტაძეზე ისაუბრა და მსუბუქად გააკრიტიკა.
„რა თქმა უნდა, მას აქვს კარგი მონაცემები, მაგრამ ის არ არის ისეთი აქტიური ვარჯიშების დროს, რომ შემეძლოს ვთქვა – საკუთარ თავს აძალებს, უბიძგებს უფრო მეტი მუშაობისთვის. ვარჯიშისას არის ამის პირობები, ამიტომ, მე ვითხოვ მისგან მეტ სიცოცხლეს და სიხალისეს. მას შინაგანად უნდა სურდეს, რომ შემდეგი ნაბიჯი გადადგას თავის კარიერაში“.
უკვე ცნობილია რომ მიმდინარე სეზონის დასრულების შემდეგ გერმანული გუნდი ჩაკვეტაძის კონტრაქტს არ გამოისყიდის და უკან, ბელგიურ „გენტში“ დააბრუნებს, გუნდში, რომლის მთავარმა მწვრთნელმა ჰეინ ვანჰეზებრუკმა, გასულ წელს, ქართველი მოთამაშე ტიმ ვალტერივით გააკრიტიკა. ალბათ დადგა დრო და გიორგი ჩაკვეტაძემ საკუთარი პროფესიული დაოსტატებისათვის უფრო მეტი უნდა იზრუნოს.
გუშინ რუსულმა გამოცემამ „Business-gazeta.ru“ საინტერესო ინფორმაცია გაავრცელა. საფეხბურთო აგენტმა, თემურ ღურწკაიამ ხვიჩა კვარაცხელიას „ნაპოლიში“ შესაძლო ტრანსფერის შესახებ ისაუბრა და ყაზანის „რუბინის“ თემასაც შეეხო.
„მიიღებს თუ არა „რუბინი“ ხვიჩას ტრანსფერიდან თანხას? არა. ჩემს სანაცნობო წრეებში ამაზე არაფერი იციან და ინფორმაცია არ მომსვლია, მაგრამ ფორმალურად, „რუბინი“ ვერაფერს მიიღებს, რადგან ხვიჩასთან კონტრაქტი გაწყვიტა. რის საფუძველზე უნდა გაიგზავნოს ყაზანში ფული? „რუბინი“ კვარაცხელიას სანაცვლოდ 20 მილიონ ევროს ითხოვდა, „ნაპოლი“ კი 8 მილიონს გადაიხდის, რასაც 2 მილიონი ევროს ოდენობის ბონუსები დაემატება. შემიძლია, ისიც გითხრათ, რომ ამ გარიგებაში მოსკოვის „ლოკომოტივის“ ყოფილი სპორტული დირექტორი, ანდრეი ლოსიუკიც მონაწილეობდა“.
საქართველოს საკალათბურთო ნაკრების მოთამაშე თორნიკე შენგელია ამჟამად იტალიურ „ვირტუსში“ ასპარეზობს. ცნობილია რომ მომავალ სეზონში მას კარიერის გაგრძელება კატალონიურ „ბარსელონაში“ სურს, რომელთანაც წინასწარი შეთანხმება უკვე მიღწეულია.
გუშინ შენგელიას ირგვლივ ზედიზედ ორი ინფორმაცია გავრცელდა. თავდაპირველად ესპანურმა „Mundo Deportivo“ დაწერა რომ ქართველის გადაბირებით მადრიდის „რეალი“ დაინტერესდა. თუ „რეალს“ შეტევის გაძლიერება დასჭირდება, უილ კლაიბერნი, მარიო ჰეზონია, თორნიკე შენგელია, ჯონ ბრაუნი და ელიე ოკობო მთავარი ვარიანტები იქნებიან. როგორც ირკვევა, ბევრი რამ იმაზე იქნება დამოკიდებული, „რეალს“ ვინ დატოვებს და გუნდს რა ტიპის კალათბურთელი დასჭირდება.
გადის რამდენიმე საათი და… „საქართველოს საკალათბურთო ნაკრების კაპიტანმა, თორნიკე შენგელიამ შესაძლოა, „ვირტუს ბოლონიასთან“ კონტრაქტი გაახანგრძლივოს“. – ინფორმაცია იტალიურმა გამოცემამ „Tuttosport“ გაავრცელა. მისი მტკიცებით, „ვირტუს ბოლონიას“ უმთავრესი მიზანი ევროლიგაში მოხვედრაა და ლიდერების გაშვებას არ აპირებს. კლუბი მზადაა, თორნიკე შენგელიას ახალი წინადადებით მიმართოს და ხელფასის სახით, სეზონში 1.8 მილიონი ევრო შესთავაზოს.
ქართველი კალათბურთელის პოზიცია ჯერჯერობით უცნობია და ბევრი რამ უახლოეს დღეებში გაირკვევა.
ახლო წარსულში პოპულარული უკრაინელი ფეხბურთელი ანდრეი შევჩენკო კი იტალიაში დაბრუნებას აპირებს. იტალიური მასმედიის ცნობით შევჩენკო მოლაპარაკებებს აწარმოებს, რათა კლუბი „პესკარას“ მფლობელი გახდეს.
ჯერჯერობით, უცნობია, უკრაინელი იტალიური კლუბის ყიდვას პირადად აპირებს თუ ინვესტორთა ჯგუფის წარმომადგენელია, თუმცა, შეთანხმების პროცესი დაჩქარებულად და წარმატებით მინდინარეობს.
შევჩენკო უკვე შეხვდა „პესკარას“ ამჟამინდელ მფლობელ დანიელე სებასტიანის. გუნდმა ამ სეზონში „სერია C“-ში მე-5 ადგილი დაიკავა და ახლა, „სერია B“-ში გადასასვლელად იბრძვის.
ავტორი
