შეზღუდული შესაძლებლობების მქონე ბავშვებისა და ზრდასრულების საჭიროებები ჩოხატაურის მუნიციპალიტეტში _ ამ სახელწოდებით ჩატარებული კვლევის პრეზენტაცია გაიმართა 3 დეკემბერს ჩოხატაურის მუნიციპალიტეტის საკრებულოს სხდომათა დარბაზში. კვლევის ფარგლებში, რომელიც საერთაშორისო ორგანიზაცია MAC GEORGIA-მ ჩოხატაურის მუნიციპალიტეტის საკრებულოსა და გამგეობის თანადაფინანსებით ჩაატარა, მუნიციპალიტეტის მასშტაბით, 40 წლამდე ასაკის 111 ბენეფიციარი გამოიკითხა.
_ სიმბოლურია, რომ სწორედ დღეს, 3 დეკემბერს, შშმ პირთა საერთაშორისო დღეს იმართება ჩოხატაურის მუნიციპალიტეტში ჩატარებული კვლევის პრეზენტაცია. ყველა ჩვენგანს ძალიან ბევრი გვაქვს სამუშაო ამ მიმართულებით. დღეს, როცა, ჯერ კიდევ არ არის ჩამოყალიბებული მუნიციპალიტეტის 2019 წლის ბიუჯეტი, მნიშვნელვანია კვლევის შედეგები, რათა მომავალი წლის საფინანსო დოკუმენტში სრულყოფილად აისახოს შშმ პირთა საჭიროებებისთვის თანხები, _ აღნიშნა ჩოხატაურის მუნიციპალიტეტის საკრებულოს თავმჯდომარემ ზაალ მამალაძემ.
საკრებულოს თავმჯდომარემ, ასევე, ყურადღება გაამახვილა მუნიციპალიტეტში შშმ პირთათვის დღის ცენტრის გახსნაზე, რომელიც დღის წესრიგში დგას და რომელშიც, მისი თქმით, ბენეფიციარები მიიღებენ არა მარტო საჭირო დახმარებას ფიზიკური განვითარებისთვის, არამედ განათლებასაც. როგორც ზაალ მამალაძემ აღნიშნა, ეს იქნება რეგიონში პირველი მსგავსი ტიპის დაწესებულება და ამისთვის ბიზნესმენთა და ქველმოქმედთა დახმარებაა აუცილებელი.
პრეზენტაცია ორ _ ქართულ და ინგლისურ ენაზე მიმდინარეობდა, რომლებსაც მაკლეინის საერთაშორისო ორგანიზაციის წარმომადგენელი ლუსი ფლინი და მაკლეინის ასოციაცია ბავშვებისთვის რეგიონული განვითარების პროექტის ხელმძღვანელი დიანა ჯანაშია უძღვებოდნენ.
კვლევა საგანგებოდ გადამზადებულმა ჯგუფმა, მშობელთა კავშირი „ჩვენი შვილების“ წევრებმა: ვეკო წულაძემ, ვალერიან კოტრიკაძემ და ნინო ჭელიძემ ჩაატარეს.
პრეზენტაციას ესწრებოდა დეკანოზი გიორგი ჟღენტი, ასევე, ესწრებოდნენ მუნიციპალიტეტის მერიის წარმომადგენლები, დეპუტატები, ექიმები, სოციალური სამსახურის, განათლების სამინისტროსა და პრესის წარმომადგენლები.
