შვედეთი არ უნდა ელოდეს, რომ თურქეთი მხარს დაუჭერს ნატოში გაწევრიანებას – ამის შესახებ თურქეთის პრეზიდენტმა რეჯეფ თაიფ ერდოღანმა მას შემდეგ განაცხადა, რაც რამდენიმე დღის წინ, სტოკჰოლმში საპროტესტო აქციაზე ყურანის დაწვეს.
ქურთმა მომიტინგეებმა შვედეთში ჩამოკიდეს ერდოღანის ფიგურა, რასაც მოჰყვა ყურანის დაწვა.
“შვედეთი არ უნდა მოელოდეს ჩვენგან ნატოს მხარდაჭერას. გასაგები უნდა იყოს, რომ მათ, ვინც ჩვენი ქვეყნის საელჩოსთან მსგავსი საზიზღარი სცენა მოაწყო, ჩვენგან კეთილგანწყობას არ უნდა ელოდოს”, – თქვა თურქეთის პრეზიდენტმა.
ერდოღანმა დაგმო სტოკჰოლმში გამართული საპროტესტო აქცია, სადაც შვედეთის ულტრამემარჯვენე პარტია ქვეყნის NATO-ში გაწევრიანების ინიციატივას აპროტესტებდა. მისი თქმით, აქციაზე ყურანის დაწვა მკრეხელობად უნდა ჩაითვალოს და იგი არ უნდა იყოს დაცული გამოხატვის თავისუფლებით.
„არავის აქვს უფლება დაამციროს წმინდანები“, – აღნიშნა ერდოღანმა.
საპროტესტო აქცია გააკრიტიკა შვედეთის მთავრობამაც.
„შვედეთს აქვს გამოხატვის თავისუფლება, მაგრამ ეს არ ნიშნავს იმას, რომ შვედეთის მთავრობა ან მე მხარს ვუჭერ გამოთქმულ მოსაზრებებს“, – თქვა შვედეთის საგარეო საქმეთა მინისტრმა ტობიას ბილსტრომმა.
ერდოღანის შენიშვნების საპასუხოდ, ბილსტრომმა თქვა, რომ მას სურდა გაეგო ზუსტად რა თქვა თურქეთის ლიდერმა კომენტირების დაწყებამდე.
„შვედეთი პატივს სცემს შეთანხმებას, რომელიც არსებობს შვედეთს, ფინეთსა და თურქეთს შორის ნატოს წევრობასთან დაკავშირებით.
როდესაც რაღაცას ვამბობთ, ამას გულწრფელად ვამბობთ, ხოლო როცა ვინმე შეურაცხყოფს, მათ ადგილზე ვაყენებთ“, – დასძინა მან.
აღნიშნულ ფაქტს, ნატოს გენერალური მდივანი იენს სტოლტენბერგი გამოეხმაურა და განაცხადა, რომ გამოხატვის თავისუფლება ნატოს ქვეყნებში “ძვირფასი საქონელია” და რომ ეს ქმედებები, მიუხედავად იმისა, რომ შეუსაბამოა, არ არის “ავტომატურად უკანონო”.
ცნობისთვის, შვედეთმა და ფინეთმა NATO-ში გაწევრიანება უკრაინაში რუსეთის შეჭრის შემდეგ გადაწყვიტეს. ალიანსში მათ გაწევრიანებას ყველა წევრი სახელმწიფო უნდა უჭერდეს მხარს.
ავტორი
