ოზურგეთის მუნიციპალიტეტის სოფელ მაკვანეთში მოსახლეობის თხოვნით ავედით. ხალხი ორ, სიღარიბის ზღვარს მიღმა ოჯახების ბედით არის შეწუხებული.
“როცა მათი გასაჭირი მედიით გაშუქდება, იქნებ, უფრო მიაქციონ ყურადღება ამ ოჯახებს _ ერთს სოციალური დახმარება მოუხსნეს, მეორეს კი გაუნახევრეს. მათი ყოველდღიურობა საშინელებაა! გთხოვთ, დაეხმარეთ”, _ ასეთი თხოვნით მომართეს “გურია ნიუსს” მაკვანეთელებმა.
სოფელში მისულებს 38 წლის მაკა სამსონია-ცეცხლაძე თავისი გასაჭირის შესახებ გვიყვება.:
“არანაირ სამუშაოს არ ვთაკილობ _ ვბარავ, ვთოხნი, ვალაგებ, ვრეცხავ, შინაური ცხოველების სადგომებს ვასუფთავებ. ამას წლებია ყველგან, ყველასთვის ვაკეთებ, ვინც კი ყოველდღიურ ლუკმა-პურის ფულს მომცემს. თუმცა, ახლა ასეთი სამუშაოც აღარ არის. უჭირს ხალხს, მაგრამ ჩვენნაირი გაჭირვებული არავინ მეგულება. მეუღლე ონკოლოგიური ავადმყოფია, ერთი შვილი მყავს და ისიც ვერ არის ჯანმრთელად _ დიაგნოზი რომ დავუდგინო, მაგის ფულიც არ მაქვს. არც _ სითბო, არც _ საჭმელი, თავი კეთილი მეზობლების დახმარებით გაგვაქვს. დღეს პურის ფქვილი მომიტანეს, ახლა კარტოფილს ვხარშავ, ზეთი არ მაქვს… გასათბობად მუყაოს ქაღალდებს ვაგროვებ, იმასაც მაღაზია მაძლევს. სოციალური დახმარება შეგვიჩერდა, არ ვიცით, რატომ. ის რომ არ დაგვენიშნოს, თავს არ ვიცოცხლებ. მეშინია, მაგის იმედზე ვართ, ოზურგეთის მუნიციპალიტეტის გამგეობიდან დაგვეხმარნენ და წამლებისთვის 150 ლარი მოგვცეს,” _ ამბობს მაკა სამსონია.
მაკვანეთში მცხოვრები, ხანდაზმული მარტოხელა პენსიონერ მაყვალა თოდრიას მონაყოლი უმძიმესი მოსასმენია _ სხვის ქოხს შეფარებულ 78 წლის ქალბატონს სოციალური დახმარება გაუნახევრდა. ქოხში, სადაც მხოლოდ ერთი ოთახია, რომელსაც არც კედლები აქვს შელესილი, არც იატაკი გააჩნია, ფარდები ჩამოხეულია, მაყვალა თოდრია ნათხოვარ ლოგინშია ჩაწოლილი:
“ვოვა სალუქვაძე გეცოდინებათ, ქალაქში რაღაც თანამდებობაზე მუშაობს. მის მიწაზე ვცხოვრობ, არც ეს ფიცრულია ჩემი. გამიჭირდა და შევეკედლე. რომ მოვკვდები, დასასვენებელი ადგილიც არ მაქვს.
პენსიას, რასაც ვიღებ, წამლებში არ მყოფნის. ხშირად პურს და შაქარს ვერ ვყიდულობ. ასე სამოწყალოდ ვარ დაგდებული, მეზობლების ამარა. საახალწლოდ ოზურგეთის გამგეობამ კი გამომიგზავნა ტკბილეული და პროდუქტი”.
აღნიშნულ ოჯახებთან დაკავშირებით სოციალური მომსახურების სააგენტოს პრესსამსახურში ასეთ განმარტებებს აკეთებენ:
“ცეცხლაძეების ოჯახს სოციალურად დაუცველთა ბაზაში გადამოწმება მოუწია გეგმა-გრაფიკის მიხედვით. ამ ეტაპზე მათ საარსებო შემწეობის მიღება შეჩერებული აქვთ და არა შეწყვეტილი. მიმდინარეობს სარეიტინგო ქულის დათვლის პროცესი. დაბალი სარეიტინგო ქულის შემთხვევაში, ისინი კვლავ გახდებიან თანხის მიმღებები და ჩაერიცხებათ განაცდური თვეებიც.
მეორე ქალბატონი ისევ არის საარსებო შემწეობის მიმღები, თუმცა, წინაზე ძველი მეთოდოლოგიით იყო შემოწმებული, როცა არ არსებობდა ქულების დიფერენცირება და ყველა ოჯახი, ვისი ქულას 57 000-მდე იყო ოჯახის უფროსზე იღებდა 60 ლარს, სხვა წევრებზე კი 48 ლარს. მაყვალა თოდრიას ძველი და ახალი ქულა მნიშვნელოვნად არ განსხვავდება, მაგრამ ახალი მეთოდოლოგიით, თანხა ქულების მიხედვით დიფერენცირებულია, ის 60 ლარის ნაცვლად იღებს 30 ლარს, ასევე, ის არის ასაკით პენსიონერი და ეძლევა ასაკის პენსია. სარგებლობს საყოველთაო ჯანდაცვის პროგრამის სოციალურად დაუცველთა პაკეტით, რაც ნიშნავს, რომ თითქმის სრულ სამედიცინო სერვისს უფარავს სახელწიფო. დეკლარაციაში ჯანმრთელობის რაიმე პრობლემა მითითებული არ აქვს”.
