“ეს დამფრთხალი სირი ოზურგეთის სამარცხვინო დეპუტატის ბიუროს ხელმძღვანელია. მისთვის პრობლემა ის არის, თალაკვაძის გამოსახულებიანი პლაკატი მისთვის შეუთანხმებლად რომ გავაკარით. თორე ახალგაზრდებს რომ თვალები დათხარეს და გავრილოვს საშუალება მისცეს უმაღლეს პოლიტიკურ ორგანოში სხდომა რუსულ ენაზე წაეყვანა მისთვის ეს არაფერია,” _ ეს პოსტი სოციალურ ქსელში „ნაციონალური მოძრაობის“ ოზურგეთის ორგანიზაციის ხელმძღვანელმა დავით მჟავანაძემ გამოაქვეყნა.
მან, პოსტს ადრესატის _ ოზურგეთის მაჟორიტარი დეპუტატის არჩილ თალაკვაძის ბიუროს ხელმძღვანელის ლაშა ჭელიძის ფოტოც დაურთო.
როგორც მჟავანაძე „გურია ნიუსთან“ ამბობს, ეს შეურაცხმყოფელი გზავნილი ჭელიძემ დაიმსახურა:
_ როგორც იცით დღეს, პარლამენტის თავმჯდომარის, არჩილ თალაკვაძის ბიუროს კარებზე პლაკატები გავაკარით, რომელიც ქვეყანაში შექმნილ მდგომარეობას ასახავს. ვფიქრობ, საზოგადოებამ უნდა იცოდეს იმ ადამიანები სახელები, ვინც გავრილოვის პირველივე მოთხოვნაზე მელიას დასჯას მოაწერეს ხელი.
აქ, კონკრეტულად, მარტო მელიაზე არ არის საუბარი _ ადამიანები დასაჯეს იმის გამო, რომ ანტირუსული აქცია მოაწყვეს და ხელისუფლებამ მასში მონაწილეობისთვის საკუთარ ხალხზე შური იძია. ეს გააკეთეს მაშინვე, როგორც კი გავრილოვმა ოფიციალურად, მედიასაშუალებით მოითხოვა აქციის მონაწილეების დასჯა.
თალაკვაძეც ჩვეულებრივი მონაა, რომელიც მზადაა ნებისმიერი დავალება შეუსრულოს კრემლის წარმომადგენელს. სწორედ ეს გავაპროტესტეთ მთელი საქართველოს მასშტაბით, მათ შორის ოზურგეთშიც და ამის გამო, თალაკვაძის ბიუროს უფროსმა გადაწყვიტა პიროვნული შეურაცხყოფა მოეყენებინა და არაკაცი მიწოდა. შესაბამისად, მიიღო ჩემგან პასუხი, რადგან კაცი რომ ბიურის ხელმძღვანელობს და პიროვნულ შეურაცხყოფას პოლიტიკური განცხადებისგან ვერ ანსხვავებს და ამ ფორმით ცდილობს პატრონს კუდი უქიცონოს, ზუსტად ისაა, რაც დავწერე, _ გვითხრა მჟავანაძემ.
ის, რომ „ნაციონალური მოძრაობის“ ოზურგეთის ორგანიზაციის ლიდერს არაკაცი უწოდა, არ უარყოფს ლაშა ჭელიძე:
_ მე ვთქვით, რომ არაკაცი დავითი რამდენი ქვას ისვრის, მის საქციელებზე კომენტარს ვერ გავაკეთებ და შემიძლია კომენტარი გავაკეთო მხოლოდ კაცის საქციელზე. სულ ეგ იყო, _ აღნიშნა ჭელიძემ.
მისივე თქმით, მჟავანაძის მხრიდან პროვოკაციის მოწყობის მცდელობას ჰქონდა ადგილი:
_ ბიუროს ოთახში ვმუშაობდით, როცა მერიის თანამშრომელი ხათუნა სურგულაძე შემოვიდა, რომელსაც ხელში ჩამოხეული პლაკატები ეჭირა და გვითხრა, რომ კარებთან პლაკატებს გვიკრავდნენ. გავედით და ვნახეთ, ჩართული კამერა და დავით მჟავანაძე, რომელსაც ვუთხარი, რომ ეს მისი სირცხვილი იყო, რომ დიდი არაკაცი იყო. თვალებიც ვერ გამისწორა ისე მითხრა, რომ მონები ვიყავით და გახარია უნდა გადამდგარიყო.
საუბარში ჩემი თანამშრომელი, გია ჯიჯიეშვილიც ჩაერთო, რომელმაც მჟავანაძეს 26 მაისი და 7 ნოემბერი შეახსენა და ისიც უთხრა, რომ მათ მორალური უფლება არ ჰქონდათ ასეთი საუბრის.
იქვე, მჟავანაძესთან ერთად, პატარა ბიჭი იყო, რომელსაც ვუთხარი, რომ ისეთ არაკაცთან, როგორიც მჟავანაძეა საქმე არ დაეჭირა, რადგან მისგან კაცობას და ადამიანობას ნამდვილად ვერ ისწავლის. ამით დასრულდა ე.წ. აქცია, რომელიც ერთმა კაცმა ჩაატარა, _ გვითხრა ჭელიძემ.
ჭელიძის მსგავსად, თალაკვაძის ბიუროს და ოზურგეთის მერიის თანამშრომლები აქცენტს იმაზე აკეთებენ, რომ ეს დადგმული პროვოკაცია იყო:
_ სასაცილოა, როცა აქციას უწოდებენ ერთი კაცის მიერ დადგმულ სპექტაკლს, რომელიც იმდენად უსახური და საცოდავი იყო, რომ თანაგუნდელიც კი არ მოჰყვა პლაკატის გასაკრავად. დეპუტატის ბიუროს კართან, მელიასავით უჩუმრად რომ მიიპარება „ნაციონალების“ ლიდერი რაზე უნდა ვისაუბროთ ამის შემდეგ.
მათ კარგად იციან, რომ ხალხი მათ გვერდით არ დგება და ამიტომაც იყო დღეს ერთი კაცის ჩუმი აქცია, რომელიც იმდენად შეურაცხმყოფელი დარჩა ჩემთვის, შემთხვევით გამვლელისთვის, რომ დანახვისთანავე ჩამოვხსენი პლაკატი, რაც ჩემთან არც კი გაუპროტესტებიათ, _ თქვა „გურია ნიუსთან“ საუბრისას ხათუნა სურგულაძემ.
