“სინათლე არ უნდა ჩაქრეს”- ამ ლოზუნგით თბილისში მედიის მხარდამჭერი მარში გაიმართა. მარშის მონაწილეები პირველი რესპუბლიკის მოედანზე შეიკრიბნენ და მსვლელობით ჯერ თავისუფლების მოედანზე შემდეგ კი პარლამენტთან გადაინაცვლეს.
“სინათლე არ უნდა ჩაქრეს” ქეთევან ქავთარაძე მენეჯერი “გურია ნიუსთან” საუბრისას ამბობს, რომ:
_ დღეს დამოუკიდებელი მედია სრულად დაფინანსების გარეშეა დარჩენილი. როგორც იცით, მათ არ აქვთ პოლიტიკური ფული და ყოველთვის ჰქონდათ დემოკრატიის განვითარებით დაინტერესებული ქვეყნებიდან დაფინანსება. ბოლო დროს მიღებული კანონები ამბობს, რომ თუ ქვეყნის გარედან იღებ დაფინანსებას, ხარ აგენტი. მედიამ თქვა, რომ ჩვენ არ ვართ აგენტები და არ დარეგისტრირდნენ. დღეს მედიის გაქრობის საფრთხე რეალურია, მუშაობენ ენთუზიაზმით. ჟურნალისტებზე ძალადობენ, ცემენ, ემუქრებათ სისხლის სამართლებრივი დევნაც მომავალში. მაგრამ მთავარია, რომ მედიამ თქვა, რომ დანებებას არ აპირებს. 22 მედია გაერთიანდა ამ კამპანიის ქვეშ, რომლის მიზანიც მათი მხარდამჭერების მობილიზებაა.
ზვიად ქორიძე “საერთაშორისო გამჭვირვალობა – საქართველოს” რეგიონული ოფისების მენეჯერი “გურია ნიუსთან” საუბრისას ამბობს, რომ დღეს მედიამ აუდიტორიას მკაფიო მესიჯი გაუგზავნა.
“საკმაოდ მკაფიო გზავნილი გაუგზავნა დღეს მედიამ თავის აუდიტორიას და უთხრა, რომ ის პოლიტიკა რასაც აწარმოებს ბიძინა ივანიშვილი ემსახურება რომ ქართულ აუდიტორიას წაართვას კრიტიკული სივრცე. ასეთი სივრცეა არასამთავრობო სექტორი, აკადემიური სექტორი. იმ რუსული კანონებით რაც მან გამოიტანა, ქართველ საზოგადოებას შესთავაზა, რომ მე თქვენ დაგტოვებთ ბნელში. 2015 წელს, როცა “რუსთავი 2” კრიტიკულად განწყობილი ტელევიზია იყო, მაშინ თქვა ბიძინა ივანიშვილმა, გამორთეთ “რუსთავი 2″ და იქნება აღმშენებლობა. მისი ხედვა ასეთია რომ უნდა გამორთო მედია, რომელიც აშუქებს პრობლემებს და მოქალაქეებს ექნება აღმშენებლობა. რეალურ აღმშენებლობას კი კრიტიკული მედია ეხმარება. ეს კიდევ ერთხელ მკაფიოდ აუხსნა ამ მსვლელობით მედიამ საზოგადოებას”, _ამბობს ზვიად ქორიძე.
ხატია ღოღობერიძე, აპრილის რედაქტორი: საქართველოში ჟურნალისტობა და მედიის მდგომარეობა არასდროს არ ყოფილა მარტივი, მაგრამ ამ ყველაფერს დაემატა ის, რომ “ოცნება” მიზანმიმართულად ცდილობს გაანადგუროს დამოუკიდებელი მედია, რადგან ვაშუქებთ მიუკერძოებლად, რაც მათთვის წარმოადგენს საფრთხეს. მათ ეშინიათ იმის რაც შეიძლება გაშუქდეს, ამიტომ უნდათ რომ არ ვარსებობდეთ, თუმცა ჩვენ არ ვაპირებთ მათ ეს კომფორტი მივცეთ.
