ჯონ ალან ლი კანადელი მეცნიერია, რომელმაც შემოგვთავაზა სიყვარულის ექვსი სახე.
მისი აზრით, ისევე როგორც ფერთა წრეზე არსებობს სამი ძირითადი ფერი და მათი კომბინაციით იქმნება დანარჩენი ფერები, სიყვარულშიც ასეა. მან გამოყო სიყვარულის სამი ძირითადი
სახე: ეროსი, ლუდუსი და სტორგი, ხოლო მათი კომბინაციით იქმნება დანარჩენი სამი სახის სიყვარული: პრაგმა, მანია და აღაპი.
ეროსი (წითელი). ამ ტიპის შეყვარებულები არიან ვნებიანები და რომანტიულები. მათ სჯერათ ზღაპრული სიყვარულის, შეუძლიათ ერთი ნახვით შეყვარება, აქვთ ჩამოყალიბებული იდეალური პარტნიორის ხატი. ჰოლივუდურ ფილმებში, როგორც წესი, ამ ტიპის სიყვარულს გვიხატავენ. მოკლედ რომ ვთქვათ, ეროსის სიყვარულით შეყვარებულები არიან ემოციურები, რომანტიულები და ოპტიმისტები ურთიერთობის საკითხში.
ლუდუსი (ლურჯი). ტერმინი აღებულია ლათინური ენიდან და ნიშნავს თამაშს. ამ ტიპის სიყვარული არის თამაშებრივი, უზრუნველი. ლუდუსის ტიპის შეყვარებულისთვის მრავალფეროვნება ურთიერთობებში წამყვანია და რაც მეტი პარტნიორი ეყოლება მით უკეთესი. მათ არ ახასიათებთ ინტიმურობა, სიყვარული არის გართობის სახეობა.
სტორგი (ყვითელი). ტერმინი აღებულია ბერძნული ენიდან და ნიშნავს „მეგობრობას“. ამ ტიპის სიყვარულს შეიძლება ვუწოდოთ „მეგობრობა-სიყვარული“. ეს ურთიერთობა დროთა განმავობაში ყალიბდება და იზრდება. ვნება ამ შემთხვევაში, ნაკლებ მნიშვნელოვანია. ამ ტიპის სიყვარული მეგობროობიდან იწყება.
მანია (იასამნისფერი). ამ ტიპის სიყვარული მიიღება ეროსის და ლუდუსის კომბინაციით. ეჭვიანობა და სიყვარულის ობიექტის კონტროლი არის ამ ტიპის სიყვარულის დამახასიათებელი ნიშანი. მანიაკალური შეყვარებულები არიან მესაკუთრეები, მოცული თავიანთი შეყვარებულით. მათ აქვთ შეყვარებულის დაკარგვის პარანოიკული შიში. ამ ტიპის სიყვარული არის ემოციების ნამდვილი „ამერიკული მთების ატრაქციონი“ (როლლერ ცოასტერ).
პრაგმა (მწვანე). იქმნება ლუდუსის და სტორგის კომბინაციით. ესაა „სიყვარული, რომელიც მეუღლეს მაღაზიაში შენაძენის გაკეთების მსგავსად ირჩევს და მთავარი არის ის, რომ ურთიერთობა იყოს კარგი და პარტნიორები აკმაყოფილებდნენ ერთმანეთს“. ამ დროს ხდება საფასურისა და სარგებლის შეფასება იქამდე, სანამ დაიწყება ურთიერთობა. პარტნიორის შერჩევა დაფუძნებულია ისეთ კრიტერიუმებზე როგორიცაა განათლების დონე, რელიგიური მრწამსი, სოციალური სტატუსი და ა.შ.
აღაპი (ნარინჯისფერი). ტერმინი აღებულია ბერძნული ენიდან და ნიშნავს სულიერებას. სიყვარულის ეს ტიპი იქმნება ეროსის და სტორგის კომბინაციით. ეს არის უპირობო, თავდაუზოგავი და მტკიცე სიყვარული. ის უზრუნველყოფს შინაგან კმაყოფილებას. ამ ტიპის სიყვარულის საფუძველია მოთმინება, სიკითე და ერთგულება. აღაპის სტილის სიყვარული ითვლება ყველაზე სუფთა და ნამდვილ სიყვარულად.
