აბაშაში, ხიდი, რომელიც მდინარე რიონზე გადის, წლებია, ავარიულ მდგომარეობაშია.
აღნიშნული ხიდი რამდენიმე სოფელს ერთმანეთს აკავშირებს.
“ეს ხიდი, წლებია, ასეთ ავარიულ მდგომარეობაშია. სამუშაოები რამდენიმე თვის წინ დაიწყეს, თუმცა, ამ დროისთვის, შეჩერებულია. ფაქტობრივად, სიცოცხლისთვის საშიში “ბეწვის ხიდია”, რომელზე გავლაც ნებისმიერ დროს შეიძლება ტრაგედიით დასრულდეს…. ძალიან საშიშია ამ ხიდზე გადაადგილება! ვითხოვთ დახმარებას”, _ ამბობენ ადგილობრივები ჩვენთან საუბრისას.
მათივე თქმით, ძლიერი წვიმის დროს, ხიდზე გადაადგილება, პრაქტიკულად, შეუძლებელია.
“წვიმების დროს, აქ გადასვლა ძალიან სახიფათოა. არც განათებაა ღამით… რამე უბედურება რომ მოხდეს, მერე ყველა “დაფაცურდება”, _ ამბობს შეწუხებული მოსახლეობა.
ადგილზე მისულებს, მართლაც მძიმე სურათი დაგვხვდა _ დაზიანებულია მოაჯირის ნაწილი, დარღვეულია უსაფრთხოების ზომები. ხიდის მდგომარეობა ჩვენს ფოტო და ვიდეოკადრებშიც კარგად ჩანს.
ავარიული ხიდი
ჩვენი კარგად ინფორმირებული წყარო გვეუბნება, რომ ამ ხიდის შესაკეთებლად, რამდენიმე მილიონი ლარია გამოყოფილი, მაგრამ სამუშაოები დაიწყეს და მერე გააჩერეს.
იმას, რომ სამუშაოები ნამდვილად არის დაწყებული, ადგილზე განთავსებული რკინის კონსტრუქციები ადასტურებს. თუმცა, როგორც ვთქვით, სამუშაოები შეჩერებულია.
არსებობს ალტერნატიული ხიდიც, რომელიც აბაშა-სუჯუნა-გულეიკარი-ჯაპანის შიდა სახელმწიფოებრივი მნიშვნელობის გზაზე, კეთილარის ადმინისტრაციულ ერთეულში, სოფელ გულეიკარის ტერიტორიაზე, მდ. ფიჩორზე მდებარეობს, თუმცა, ეს ხიდიც დაზიანებული და სამოძრაოდ საშიშია. ამის შესახებ, ჯერ კიდევ 2022 წლის 19 თებერვალს, მუნიციპალიტეტის ოფიციალურ ვებ გვერდზეც წერდნენ:
“აბაშის მუნიციპალიტეტში, აბაშა–სუჯუნა–გულეიკარი–ჯაპანის შიდა სახელმწიფოებრივი მნიშვნელობის გზაზე, კეთილარის ადმინისტრაციულ ერთეულში, სოფელ გულეიკარის ტერიტორიაზე, მდ. ფიჩორზე საავტომობილო ხიდი დაზიანებულია.
დღეს აბაშის მუნიციპალიტეტის მერი, გიგა გაბელაია, კეთილარის ადმინისტრაციული ერთეულის მაჟორიტარ დეპუტატთან, ბაქარ შელიასთან ერთად დაზიანებულ საავტომობილო ხიდზე იმყოფებოდა და არსებულ სიტუაციას ადგილზე გაეცნო.
„ხიდი ძლიერ დაზიანებულია და ვერ აკმაყოფილებს თანამედროვე სატრანსპორტო მოთხოვნებს. შესაბამისი სამსახურები უკვე მუშაობენ აღნიშნული პრობლემის მოსაგვარებლად, ჩვენ ყველაფერს გავაკეთებთ, რათა თითოეული მოქალაქის გადაადგილება იყოს უსაფრთხო და კომფორტული“, _ აღნიშნა გიგა გაბელაიამ.
შემოვლითი ხიდი
მდ. ფიჩორის საავტომობილო ხიდი აბაშის მუნიციპალიტეტს მთავარ ავტომაგისტრალთან, სამტრედიის მუნიციპალიტეტთან და გურიის რეგიონთან აკავშირებს“.
ცხადია, შევეცადეთ წყაროს მიერ, დაფინანსების მოცულობის შესახებ მოწოდებული ინფორმაციის გადამოწმება, თუმცა, ადგილობრივი ხელისუფლება ცენტრში გვამისამართებს _ როგორც აბაშის მერიაში ამბობენ, ორივე ხიდის სამშენებლო სამუშაოებს საავტომობილო გზების დეპარტამენტი ახორციელებს.
ბუნებრივია, საავტომობილო გზების დეპარტამენტის პრესსამსახურშიც ვიკითხეთ, რატომ შეჩერდა და როდის განახლდება სამუშაოები, რამდენი ლარია გამოყოფილი ამ სამუშაოებისთვის, საავტომობილო გზების დეპარტამენტის პრესსამსახურიდან კი ამგვარი პასუხი მივიღეთ: “საპროექტო დოკუმენტაციაში ცვლილება გახდა აუცილებელი და ამის გამო, დროებით არის შეჩერებული სამუშაოები. როგორც კი მოკვლევა დასრულება და ცვლილება შევა საპროექტო დოკუმენტაციაში, განაახლებენ სამუშაოებს”, _ გვითხრეს პრესსამსახურში.
ჩვენ მოვიპოვეთ მნიშვნელოვანი ინფორმაცია ამ ობიექტის შესახებ და “გურია ნიუსი“ აგრძელებს ამ თემაზე მუშაობას. მოკვლეულ მასალებს მალე შევთავაზებთ მკითხველს.
ავტორი
