საზოგადოებრივი ორგანიზაცია “სამოქალაქო რეფორმაციის” დამფუძნებელი ანდრო ბარნოვი ,,გურია ნიუსთან“ საუბრისას აცხადებს, რომ ,,ევროპული საქართველოსა“ და ,,ქართული ოცნების“ წევრების სიახლოვე მისთვის ცნობილია. როგორც ბარნოვი გვეუბნება, ხელისუფლება ,,ევროპული საქართველოს“ მიმართ ლოიალურად განწყობილია, რაც, მისი თქმით, არაერთხელ გამოიხატა.
,,შემრიგებლური დამოკიდებულება ,,ევროპულ საქართველოსა“ და ,,ქართულ ოცნებას“ შორის “ფარდის უკან” თავიდანვე ცნობილი იყო და რამდენად ფიქრობენ, რომ გაასაჯაროვონ ეს ყველაფერი, ვერ გეტყვით. ვფიქრობ, ,,ევროპული საქართველო“ ,,ქართულ ოცნებასთან“ შერწყმის შემთხვევაში იმ ამომრჩეველსაც დაკარგავს, რომელიც მას მხარს უჭერს. გამორიცხული არაფერია, თუ სკამების იმედზე გადაწყვეტენ ამ ნაბიჯის გადადგმას, როგორც ამ ჯგუფს სჩვევია ხოლმე, მაშინ მოსალოდნელია, ,,ქართულ ოცნებასთან“ მოკავშირეობრივი პოზიცია ჰქონდეთ. ხელისუფლება ,,ევროპული საქართველოს“ მიმართ შემწყნარებლური და ლოიალურად განწყობილია, უგულავაც გამოუშვა ციხიდან და ა.შ. გარდა ამისა, ,,ევროპულმა საქართველომ“ დაშალა ,,ნაციონალური მოძრაობა“ სწორედ იმ იმედით, რომ ხელისუფლებასთან ჰქონოდა შეთამაშებული ურთიერთობა. თავიდან გასაგები იყო მათ შორის სიახლოვე, მაგრამ საჯაროდ ამ ურთიერთობის გამოტანა ჩემთვის სიახლეა“, _ განაცხადა ბარნოვმა.
ცნობისთვის, პრეზიდენტის ადმინისტრაციის ხელმძღვანელის გიორგი აბაშიშვილის განცხადებით, პარლამენტში საკონსტიტუციო უმრავლესობის ფორმირების პროცესი მიმდინარეობს ,,ქართული ოცნებისა“ და ,,ევროპული საქართველოს“ წევრების მონაწილეობით.
,,პარლამენტში ახალი საკონსტიტუციო უმრავლესობის ფორმირების პროცესი მიმდინარეობს “ევროპული საქართველოსა” და “ქართული ოცნების” მონაწილეობით და სამწუხაროა, რომ ამ უმრავლესობის გამაერთიანებელი საქართველოს პრეზიდენტის წინააღმდეგ ბინძური კამპანიის წარმოებაა”, _ განაცხდა აბაშიშვილმა.
,,ევროპული საქართველოს“ წევრმა, ოთარ კახიძემ გიორგი აბაშიშვილის განცხადებას ღიმილის მომგვრელი უწოდა. აღნიშნული კომენტარი პარტიის პრესსამსახურმა გაავრცელა.
“ეს ღიმილის მომგვრელი ამბავია. საკონსტიტუციო უმრავლესობა აქვს “ქართულ ოცნებას“, რომლის გუნდის წევრიც გახლდათ ბატონი მარგველაშვილი. ჩვენ გვაქვს ჩვენი პოლიტიკური ხედვა. ჩვენ ვიცით, რომ პრეზიდენტი მარგველაშვილის ხედვა „ქართული ოცნების“ ხედვას ემთხვევა იმიტომ, რომ ისინი ერთი გუნდის წარმომადგენლები არიან. ამ ბრალდებებში შორს აღარ წავალ. მარგველაშვილის ფიგურის დისკრედიტაციას თავად მარგველაშვილი ახდენს, როდესაც ისეთ ნაბიჯებს დგამს, რომელიც მერე ასე წინ ხვდება ქართულ საზოგადოებას, ვგულისხმობ ნარკორეალიზატორისა თუ მოძალადის შეწყალებას“, _ განაცხადა ოთარ კახიძემ.
