ოზურგეთის მუნიციპალიტეტის საჯარო სკოლებში სამართალდამცავები სკოლის მოსწავლეების ჩხრეკას ატარებენ და ეუბნებიან, რომ მათ აქვთ ინფორმაცია, რომ ისინი ატარებენ ჯიბით და ეწევიან მარიხუანას. როგორც “გურია ნიუსს“ მშობლებმა აცნობეს, უფროსკლასელები აღნიშნული ფაქტის გამო ფსიქოლოგიურ ზეწოლას განიცდიან.
კონკრეტული ინციდენტი კი ქალაქ ოზურგეთში 4 საჯარო სკოლაში მოხდა.
პოლიციამ მეათეკლასელი მოსწავლე შეამოწმა, რომელსაც აღმოაჩნდა მარიხუანა. აღნიშნულ ფაქტთან დაკავშირებით, საქმე სსკ 260 მუხლის 1 ნაწილითაც არის აღძრული.
აღნიშნული ინფორმაცია #4 საჯარო სკოლის დირექტორმა ტარიელ კალანდაძემ “გურია ნიუსს“ დაუდასტურა და აღნიშნა, რომ პოლიცია სკოლაში მანდატურის მიერ შესული შეტყობინების საფუძველზე შევიდა:
_ შეამოწმა მანდატურის სამსახურმა, შემთხვევით აღმოაჩნდა ბავშვს და შემდეგ გამოიძახეს პოლიცია. პრევენციის მიზნით, დაკითხეს ბავშვი ფსიქოლოგისა და ბაბუას თანდასწრებით, მშობლები აქეთ არ არიან.
მსგავსი შემთხვევა იყო ოზურგეთის მუნიციპალიტეტის სოფელ დვაბზუში. თუმცა, როგორც დვაბზუს საჯარო სკოლის დირექტორი ხათუნა წილოსანი “გურია ნიუსთან“ განმარტავს, პოლიცია სკოლაში არ შესულა, მან თავად სთხოვა სამართალდამცავებს ერთ-ერთი მოსწავლე ყოფილიყო მეთვალყურეობის ქვეშ:
_ ჩვენთან მსგავსი ფაქტი არ მომხდარა, მე წინასწარ მეცოდინება ამის შესახებ. შესაძლებელია, სკოლის გარეთ ხდებოდეს შემოწმება, მე თვითონ არ გამიჩხრეკია არავინ და სხვას როგორ გავაჩხრეკინებდი?! გვყავს უბნის რწმუნებული, შმაგი თავდგირიძე, რომელიც წინასწარ მეხმიანება თუ რაიმე ხდება. გვყავს ერთი მოსწავლე, რომელიც ხშირად აცდენს სკოლას, მშობლები არ არიან აქეთ. ეს ბავშვი, ფაქტობრივად, მარტოა. ჯანმრთელობაც არ უწყობს ხელს, აქვს არასრულფასოვანი კვება, გადაუხდელობის გამო შუქიც ჩაჭრილი აქვს და შესაძლოა, მეგობრებთან ერთად ღამე სადმე მიდოდეს. მე ვთხოვე ბავშვს მიაქციონ ყურადღება, ველოდებით, რომ მამა გამოცხადედეს და ვაცნობოთ სოციალურ სააგენტოს.
როგორც შსს პრესსამსახურში განმარტავენ, პოლიცია თავისი ინიციატივით არცერთ სკოლაში არ შედის და არ ახდენს მოსწავლეების ჩხრეკას და შემოწმებას. სკოლებში არიან მანდატურები, რომლებიც აცნობებენ შსს რაიმე დარღვევასთან დაკავშირებით, რის შემდეგაც ხდება შსს მიერ ჩარევა და რეაგირების მოხდენა.
რაც შეეხება კონკრეტულ შემთხვევას, აღნიშნულ სკოლაში სამართალდამცავები მანდატურის მიერ პოლიციაში შესული შეტყობინების საფუძველზე შევიდნენ.
_ მოხდა კონკრეტულ შემთხვევაზე რეაგირება, საქმე აღიძრა სსკ 260-ე მუხლის პირველი ნაწილით და მიმდინარეობს გამოძიება.
