სოლიდური და შთამბეჭდავი თანამდებობრივი სარგოები ჩინოვნიკებისთვის

გურია ნიუსი 25 თებერვალს, ოზურგეთის მუნიციპალიტეტის საკრებულოს სხდომა გაიმართა. ტრადიციულად, დღის წესრიგი საკრებულოს წევრებს საკრებულოს თავმჯდომარემ, დავით დარჩიამ გააცნო.

პირველი საკითხის _ “ოზურგეთის მუნიციპალიტეტის ტერიტორიაზე საგანგებო მართვის გეგმის დამტკიცების შესახებ”, დადგენილების მიღების თაობაზე, საკრებულოს წევრმა, კომისიის თავმჯდომარემ მარიკა ჩხიკვიშვილმა ისაუბრა.

მან განმარტა, რომ საკითხი სამანდატო და იურიდიულ საკითხთა კომისიაზე განიხილეს და რომ ის ინიცირებულია საქართველოს ორგანული კანონის, “ადგილობრივი თვითმმართველობის კოდექსის”, მერიის დებულებების და სხვა კანონქვემდებარე ნორმატიული აქტების მოთხოვნათა შესაბამისად.

_ წარმოდგენილი პროექტის მიზანია, საგანგებო სიტუაციებისგან ოზურგეთის მუნიციპალიტეტის მოსახლეობისა და მუნიციპალიტეტის ორგანოს თანამშრომელთა დაცვისა და უსაფრთხოების ორგანიზაციული ღონისძიების გახორციელება. ასევე, ადგილობრივ დონეზე საგანგებო სიტუაციების მიტიგაციის, მათზე მზადყოფნის, ხოლო მათი განვითარების შემთხვევაში, რეაგირებისა და აღდგენის ღონისძიებების შემუშავება და ორგანიზება. საგანგებო სიტუაციებისგან მოსახლეობისა და ტერიტორიის დაცვის მიზნით, მუნიციპალიტეტის მასშტაბით გასატარებელი ღონისძიებების, მათი მოცულობის, გახორციელების წესისა და შესრულებაზე პასუხისმგებელი ძირითადი და დამხმარე სუბიექტების ძალების და საშუალებების განსაზღვრა, _ თქვა მარიკა ჩხიკვიშვილმა.

მან ხაზგასმით აღნიშნა, რომ ოზურგეთის მუნიციპალიტეტის ტერიტორიაზე “საგანგებო მართვის გეგმის” არსებობა წარმოადგენს მუნიციპალიტეტის მდგრადი განვითარების, მოსახლეობის უსაფრთხოებისა და კრიზისებზე ეფექტიანი რეაგირების ერთ-ერთ უმნიშვნელოვანეს ინსტრუმენტს. ასევე, ის ემსახურება ოზურგეთის მუნიციპალიტეტის მოსახლეობის უსაფრთხო და მდგრად განვითარებას.

საკრებულოს წევრებს პროექტის ირგვლივ შენიშვნები არ გამოუთქვამთ და წინააღმდეგობის გარეშე დაამტკიცეს.

მარიკა ჩხიკვიშვილმა ისაუბრა, ასევე, ოზურგეთის მუნიციპალიტეტის მერიის, საკრებულოს თანამდებობის პირთა და სხვა მოსამსახურეთა თანამდებობრივი სარგოების ოდენობების განსაზღვრისა და საშტატო ნუსხის დამტკიცების შესახებ დადგენილებებში, ცვლილების შეტანის შესახებ.

საკითხის საკრებულოს სხდომაზე გამოტანამდე, როგორც მან თქვა, ცვლილება განიხილა საკრებულოს სამანდატო, საპროცედურო, იურიდიულ საკითხთა და ეთიკის კომისიამ. ცვლილება თანამდებობრივი სარგოების ზრდას ეხებოდა მხოლოდ.

_ საკითხი განიხილა კომისიამ. ის სრულად აკმაყოფილებს ანალოგიური ტიპის დოკუმენტების წარდგენისთვის აუცილებელი კანონმდებლობის მოთხოვნებს. შესაბამისად, პროექტები უხარვეზოა და სამართლებრივად გამართულია, _ განაცხადა ჩხიკვიშვილმა.

სხდომაზე, შესაბამისი ცხრილის სახით, ბეჭდურად წარმოდგენილი იყო თანამდებობრივი სარგოების ოდენობა, რაც საკმაოდ სოლიდურად და შთამბეჭდავად გამოიყურება:

საკრებულოს თავმჯდომარის ხელფასია 7 200 ლარი, პირველი მოადგილის _ 6 240 ლარი, მოადგილის _ 5 440 ლარი. კომისიის თავმჯდომარის ხელფასი 4160 ლარია; ფრაქციის თავმჯდომარის ხელფასი შეადგენს 4 160 ლარს; ფრაქციის თავმჯდომარის მოადგილის კი _ 3 200 ლარია.

საკრებულოს აპარატის უფროსის ხელფასი შეადგენს 4 100 ლარს; მისი მოადგილის ხელფასი 3 520 ლარია; საკრებულოს საორგანიზაციო განყოფილების უფროსის _ 3 200 ლარი; საინფორმაციო ანალიტიკური უზრუნველყოფის განყოფილების უფროსი ხელფასი შეადგენს 3 200 ლარს; უფროსი სპეციალისტების _ 2 240 ლარს, ასევე 2080 ლარს; უმცროსი სპეციალისტის ხელფასი აქ 1 920 ლარია და ასეთი ორი შტატია. სულ ანალიტიკურ განყოფილებაში ექვსი ადამიანია დასაქმებული.25 თებერვლის სხდომაზე პატივი მიაგეს საქართველოს დამოუკიდებლობისთვის დაღუპულ გმირებს.

საბოლოოდ, დღის წესრიგით გათვალისწინებული ოთხი საკითხის განხილვა ასე დასრულდა:

საჯარო ადმინისტრაციული წარმოება დაიწყო, ოზურგეთის მუნიციპალიტეტის ადგილობრივი თვითმმართველობის ორგანოების სამსახურებრივი უფლებამოსილებების განსახორციელებლად საჭირო ავტოპარკის გადანაწილებისა და კლასიფიკაციის წესის დამტკიცების შესახებ _ ოზურგეთის მუნიციპალიტეტის საკრებულოს დადგენილების მისაღებად;

დამტკიცდა ოზურგეთის მუნიციპალიტეტის ტერიტორიაზე საგანგებო მართვის გეგმის დამტკიცების შესახებ, დადგენილების პროექტი;

ცვილებები აისახა ოზურგეთის მუნიციპალიტეტის მერიის, საკრებულოს თანამდებობის პირთა და სხვა მოსამსახურეთა თანამდებობრივი სარგოების ოდენობების განსაზღვრისა და საშტატო ნუსხის დამტკიცების შესახებ დადგენილებებში.