სოფელ ღანირში მიუსაფარი ძაღლების თავშესაფარი აშენდება

სამტრედიის მუნიციპალიტეტის სოფელ ღანირში არსებულ ერთ ჰექტარ მიწის ნაკვეთზე მეპატრონეები ისეთი პროექტის განხორციელებას გეგმავენ, რაც არა მარტო სამტრედიის მუნიციპალიტეტს მოუტანს სიკეთეს, არამედ მთლიანად რეგიონს. ინფორმაციამ გამოჟონა, რომ იქ მიუსაფარი ძაღლების თავშესაფრის მოწყობა აქვთ განზრახული. ეს სასიხარულო ამბავი რამდენიმე წუთის წინ სამტრედიის მუნიციპალიტეტის საკრებულოს თანამშრომელმა, ბეჟან გოგიამ საკუთარი ფეისბუქის გვერდზე გაასაჯაროვა.

,,სასიხარულო ამბავი მინდა გამცნოთ. მოგეხსენებათ, თუ როგორ არიან მომრავლებული მიუსაფარი ძაღლები ჩვენი მუნიციპალიტეტის ქუჩებში, მათ შორის აგრესიულები კი დიდ საფრთხეს უქმნიან ქუჩაში გამვლელ- გამომვლელს. როგორც იქნა, გამოჩნდა კეთილი ადმიანები, რომლებმაც ღანირის მუნიციპალიტეტის ტერიტორიაზე შეიძინეს ერთ ჰექტარზე მეტი მიწის ნაკვეთი, მათზე განთავსებული შენობა-ნაგებობებით და გადაწყვიტეს მიუსაფარი ძაღლების თავშესაფარის მოწყობა, რომელიც მოხსნის ამ მხრივ, როგორც ჩვენი ქალაქის, ასევე რეგიონის პრობლემას.

ეს ადამიანები არიან ყველასათვის კარგად ცნობილი, ყოფილი პოლიციის უფროსი, პოლკოვნიკი, ამჟამად სამტრედიის მუნიციპალიტეტის საკრებულოს წევრი ბატონი ბადრი შენგელია, მას გვერდში უდგანან და ასპონსორებენ მისი შვილი, 5-გზის ავსტრალიის კონტინენტის ჩემპიონი ჭიდაობაში და ასევე შერეულ ორთაბრძოლებში (WKF ) ვერისიით მსოფლიო ჩემპიონი, ყოფილი სახანძრო-სამაშველო სამსახურის უფროსი ცოტნე შენგელია, რომელიც ამჟამად ცხოვრობს და მოღვაწეობს ავსტრალიაში და ასევე ამერიკაში მცხოვრები ბიზნესმენი, კარგი ადამიანი ფირუზ ჩარკვიანი. შეძლებისდაგვარად გვერდში დგომას ჰპირდება მუნიციპალიტეტის ხელმძღანელობაც.”