ლანჩხუთში, სოფელ ჭანჭათში „ძლიერი საქართველოს“ მხარდამჭერი გრიგოლ ცენტერაძე წინასაარჩევნოდ ზეწოლის თაობაზე აკეთებს განცხადებას, რომელიც მის მიმართ განხორციელდა.
საქმე ისაა, რომ ორი წლის წინ, როგორც თავად ყვება, მან მეზობლისგან შეიძინა ნაძვის ხის მორები, რომელიც ამ დრომდე დასაწყობებული აქვს სახლის წინ. წინასაარჩევნო პერიოდში კი, მისი თქმით, მასთან მივიდნენ და გააფრთხილეს, თუ „ძლიერი საქართველოს“ სასარგებლოდ იმუშავებდა, მორებს ჩამოართმევდნენ. ისიც უთხრეს, რომ „ოცნების“ სასარგებლოდ უნდა ემუშავა.
„ეს მორები ორი წლის წინ გელა წულაძისგან შევიძინე, რომელსაც სახლში ორი ავამდმყოფი ჰყავდა და ფული სჭირდებოდა. ისე მოხდა, რომ ექვს თვეში იმ ოჯახში სამი ადამიანი გარდაიცვალა, მათ შორის გელაც და ვეღარ მოხერხდა საჭირო დოკუმენტაციის გაკეთება, რომ ეს მორები კანონიერად იყო მოჭრილი.
ყველაფერი კი იმით დაიწყო, რომ ჩემმა მეგობარმა არჩილ მორჩილაძემ, ერთ დღეს ვახშმად დამპატიჟა. მეორე დღეს კი, ყანაში მყოფს, თავზე პოლიცია დამადგა და უკანონოდ მოჭრილად ჩათვალეს ეს ხეები. გარემოსდაცვიდანაც მოვიდნენ. არადა, ორი წელია აწყვია ეს ხეები აქ, მთელმა სოფელმა იცის რა და როგორ იყო რეალურად.
საბოლოოდ კი შემომთავაზეს თუ არჩილ მორჩილაძისა და „ძლიერი საქართველოს“ გვერდით არ დავდგებოდი, ყველაფერი მოგვარდებოდა.
მოკლედ, არ წავედი ამ გარიგებაზე და ახლა ველოდები მორების ჩამორთმევას, რადგან მედავებიან უკანონოდაა მოჭრილიო. ვინაიდან სოციალურად დაუცველი ვარ, ვერ მაჯარიმებენ.
აგერაა ბატონო, წაიღონ, სამასალად არ ვარგა ეს!“ –ამბობს გრიგოლ ცენტერაძე.
აკეთში მერის წარმომადგენელი ზურა ჩხაიძე კი გრიგოლ ცენტერაძის მხრიდან გაკეთებულ განცხადებას ზეწოლის თაობაზე ტყუილს უწოდებს.
„ეს ადამიანი არაადეკვატურია. გაიკითხეთ სოფელში და გეტყვიან. ტყუილია რასაც ამბობს“, – ამბობს სოფლის რწმუნებული.
ავტორი
