საქართველოს გარემოს დაცვისა და სოფლის მეურნეობის სამინისტრომ “ნატანები 3“ ჰესზე სოფელ ვაკიჯვარში გარემოსდაცვითი გადაწყვეტილება გასცა. ახლა ჯერი ეკონომიკის სამინისტროზეა, რომელმაც უნდა გასცეს მშენებლობის ნებართვა. ვიდრე ეს პროცესი დაიწყება, მანამდე გარემოს დაცვის სამინისტროს ბრძანება ნებისმიერ პირს შეუძლია სასამართლოში გაასაჩივროს, რისთვისაც ერთთვიანი ვადა არსებობს.
“გურია ნიუსის“ ინფორმაციით, სამინისტროს ამ გადაწყვეტილებას სასამართლოში გაასაჩივრებენ. ამ ეტაპზე გურიაში მოქმედები არასამთავრობო ორგანიზაციების ნაწილი მინისტრის ბრძანებას სწავლობენ.
ოზურგეთის დემოკრატიული ჩართულობის ცენტრის კოორდინატორი გრიგოლ მახარაძე ფეისბუქზე წერს: გურიაში ორი პროცესი მიმდინარეობს პარალელურად: გურიის ეროვნული პარკის დაგეგმვა/შექმნა და რამდენიმე ჰესზე ადმინისტრაციული წარმოება.
პირველი მეორეს გამორიცხავს. თუ „გურიის ეროვნული პარკი“ შეიქმნება (მან უნდა მოიცვას ბახმაროს და გომისმთის ირგვლივ მიმდებარე ტყეები და მდინარეების ხეობები) დაგეგმილი ჰესები ვერ აშენდება, ეროვნული პარკის ტერიტორიაზე ჰესის განთავსება არ შეიძლება.
ამიტომ ცდილობენ, მოასწრონ ჰესებზე დადებითი გადაწყვეტილებების მიღება: გასულ ერთ კვირაში, გურიის ეროვნული პარკის იდეის პრეზენტაციიდან რამდენიმე დღეში, გარემოს დაცვის სამინისტრომ დადებითი დასკვნები გასცა „ნატანები 3 ჰესის“ (ვაკიჯვარი) და „ბახვი 1 ჰესის“ (ბახმარო) შესახებ“, _ წერს გრიგოლ მახარაძე.
არასამთავრობო ორგანიზაცია “ეკოს“ მიერ გავრცელებული ინფორმაციით, გურიაში ჰესების მშენებლობის დაწყებას პროტესტი მოჰყვება.
რაც შეეხება “ნატანები 3 ჰესს“ _ საქართველოს გარემოს დაცვისა და სოფლის მეურნეობის მინისტრის ლევან დავითაშვილის ხელმოწერილ ბრძანებაში წერია:
- გაიცეს გარემოსდაცვითი გადაწყვეტილება ოზურგეთის მუნიციპალიტეტში, შპს „უნივერსალ ენერჯი ქორფორეიშნის“ მდინარე ნატანებზე 9.085 მგვტ სიმძლავრის ჰიდროელექტროსადგურის (ნატანები-3 ჰესის) და 110 კვ ძაბვის ღია ქვესადგურის მშენებლობა-ექსპლუატაციაზე;
- ბრძანების პირველი პუნქტით გათვალისწინებული გარემოსდაცვითი გადაწყვეტილება გაიცემა განუსაზღვრელი ვადით;
- შპს „უნივერსალ ენერჯი ქორფორეიშნმა“ საქმიანობა განახორციელოს წარმოდგენილი გარემოზე ზემოქმედების შეფასების ანგარიშის, დამატებით წარმოდგენილი დაზუსტებული დოკუმენტაციის, ტექნოლოგიური სქემის, გარემოზე მოსალოდნელი ზემოქმედების შემარბილებელი ღონისძიებების, მათ შორის ბიომრავალფეროვნებაზე ზემოქმედების შერბილებისა და საკომპენსაციო ღონისძიებების, გარემოსდაცვითი მონიტორინგის და ავარიულ სიტუაციებზე რეაგირების გეგმების, დასკვნებისა და რეკომენდაციების შესაბამისად;
- შპს „უნივერსალ ენერჯი ქორფორეიშნმა“ უზრუნველყოს ჰიდროელექტროსადგურის ექსპლუატაციაში გაშვებამდე, ჰესის ზედა და ქვედა ბიეფებში წყლის დონის მზომების დაყენება, ექსპლუატაციის ეტაპზე წყლის ხარჯების დადგენილი სიხშირით (წელიწადში, საშუალოდ, 25-30 ჯერ) გაზომვა, წყლის დონეებსა და ხარჯებს შორის დამოკიდებულების მრუდების აგება და ყოველდღიური დონეების და ხარჯების შესახებ ინფორმაციის ყოველკვარტალურად გარემოს დაცვისა და სოფლის მეურნეობის სამინისტროში წარმოდგენა;
- შპს „უნივერსალ ენერჯი ქორფორეიშნმა“ მშენებლობის დაწყებამდე უზრუნველყოს ჰესის ინფრასტრუქტურული ობიექტების განლაგების ზონაში და მათ მიმდებარედ გეოლოგიური პროცესების მონიტორინგის საკითხების სამინისტროსთან შეთანხმება. მონიტორინგი უზრუნველყოს სამინისტროსთან შეთანხმებული ღონისძიებების შესაბამისად და საჭიროების შემთხვევაში უზრუნველყოს შესაბამისი პრევენციული ღონისძიებების გატარება. ამასთან მონიტორინგის შედეგები წარმოდგენილი უნდა იქნას სამინისტროში არანაკლებ წელიწადში ორჯერ;
- ვინაიდან მდ. ნატანების მარჯვენა ფერდობზე, საპროექტო სადერივაციო მილსადენის გასწვრივ, ფიქსირდება ორი, დღეისათვის სტაბილური ძველმეწყრული სხეული (კოორდ: 1. 264509-4642900; 2. 264797-4642470), ასევე სამშენებლო ბანაკისათვის შერჩეული ტერიტორია (ბანაკი №1) ხვდება დღეისათვის სტაბილური ძველმეწყრული სხეულის კონტურში, შპს „უნივერსალ ენერჯი ქორფორეიშნმა“ უზრუნველყოს წარმოდგენილი დოკუმენტაციით – გათვალისწინებული ღონისძიებების განხორციელება ჰესის მშენებლობა-ექსპლუატაციის პერიოდში;
- შპს „უნივერსალ ენერჯი ქორფორეიშნმა“ მშენებლობის დაწყებამდე უზრუნველყოს სამშენებლო ბანაკების დეტალური პროექტების შემუშავება და სამინისტროში შესათანხმებლად წარმოდგენა (სჰპ ფაილებთან ერთად);
- შპს „უნივერსალ ენერჯი ქორფორეიშნმა“ მშენებლობის დაწყებამდე უზრუნველყოს ფუჭი ქანების სანაყაროების პროექტების სამინისტროში შესათანხმებლად წარმოდგენა სჰპ ფაილებთან ერთად;
- შპს „უნივერსალ ენერჯი ქორფორეიშნმა“ უზრუნველყოს ,,ნიადაგის ნაყოფიერიფენის მოხსნის, შენახვის, გამოყენების და რეკულტივაციის შესახებ” საქართველოს მთავრობის 2013 წლის 31 დეკემბრის №424 დადგენილებით დამტკიცებული ტექნიკური რეგლამენტით გათვალისწინებული მოთხოვნების შესაბამისად;
- შპს „უნივერსალ ენერჯი ქორფორეიშნმა“ მშენებლობის დაწყებამდე უზრუნველყოს ნარჩენების მართვის გეგმის სამინისტროსთან შეთანხმება საქართველოს გარემოსა და ბუნებრივი რესურსების დაცვის მინისტრის 2015 წლის
4 აგვისტოს N211 ბრძანების შესაბამისად; ნარჩენების მართვა უზრუნველყოს სამინისტროსთან შეთანხმებული გეგმის შესაბამისად;
- შპს „უნივერსალ ენერჯი ქორფორეიშნმა“ მშენებლობის დაწყებამდე საპროექტო ტერიტორიაზე ატმოსფერული ჰაერის დაბინძურების სტაციონარული წყაროების განთავსების შემთხვევაში, ასევე ზედაპირული წყლის ობიექტებიდან წყალაღების ან/და წყალჩაშვების შემთხვევაში უზრუნველყოს კანონმდებლობით დადგენილი მოთხოვნების დაცვა;
- შპს „უნივერსალ ენერჯი ქორფორეიშნმა“ თევზსავალის ფუნქციონირებასთან დაკავშირებით სულ მცირე 5 წლის განმავლობაში უზრუნველყოს თევზსავალის ეფექტურობაზე დაკვირვება და კვარტალში ერთხელ შედეგების სამინისტროში წარმოდგენა, საჭიროების შემთხვევაში შემდგომი ღონისძიებების დასახვა-გახორციელების მიზნით;
- შპს „უნივერსალ ენერჯი ქორფორეიშნმა“ მდ. ნატანების კალაპოტში ან მის უშუალო სიახლოვეს სამშენებლო სამუშაოები არ განახორციელოს მდინარის კალმახის (შალმო ფარიო Lინნაეუს) ტოფობის პერიოდში;
- შპს „უნივერსალ ენერჯი ქორფორეიშნმა“ ნაპირსამაგრი ნაგებობის საჭიროების შემთხვევაში მშენებლობის დაწყებამდე უზრუნველყოს შესაბამისი ღონისძიებების შემუშავება და სამინისტროში კანონმდებლობით დადგენილი წესით წარმოდგენა;
- შპს „უნივერსალ ენერჯი ქორფორეიშნმა“ მშენებლობის დაწყებისა და ექსპლუატაციაში გაშვების შესახებ დაუყოვნებლივ აცნობოს სამინისტროს;
- შპს „უნივერსალ ენერჯი ქორფორეიშნმა“ გარემოსდაცვითი გადაწყვეტილების სხვა პირზე გადაცემის შემთხვევაში გარემოსდაცვითი გადაწყვეტილების გადაცემა განახორციელოს „გარემოსდაცვითი შეფასების კოდექსით“ დადგენილი წესით;
- ბრძანება დაუყოვნებლივ გაეგზავნოს შპს „უნივერსალ ენერჯი ქორფორეიშნს“;
- ბრძანება ძალაში შევიდეს შპს „უნივერსალ ენერჯი ქორფორეიშნის“ მიერ ამ ბრძანების გაცნობისთანავე;
- ბრძანების ძალაში შესვლიდან 5 დღის ვადაში გარემოსდაცვითი გადაწყვეტილება განთავსდეს სამინისტროს ოფიციალურ ვებგვერდზე და ოზურგეთის მუნიციპალიტეტის აღმასრულებელი ან/და წარმომადგენლობითი ორგანოების საინფორმაციო დაფებზე;
- ბრძანება შეიძლება გასაჩივრდეს თბილისის საქალაქო სასამართლოს ადმინისტრაციულ საქმეთა კოლეგიაში (თბილისი, დ. აღმაშენებლის ხეივანი, მე12 კმ. N6) მხარის მიერ მისი ოფიციალური წესით გაცნობის დღიდან ერთი თვის ვადაში“, _ აღნიშნულია მინისტრის წერილში.
ავტორი: გიორგი გირკელიძე
