სოციალურ ქსელში მსახიობ დიმიტრი ტატიშვილის რედაქტირებული ვიდეო ვრცელდება.
ინფორმაციისთვის, რედაქტირებული ვიდეო 7 ნოემბერს ასევე გაავრცელეს ფეისბუქ-მომხმარებელმა David Tordia და ანონიმურმა ფეისბუქ-ანგარიშმა “მიხეილ განუბაჟებელი“.
7 ნოემბერს ფეისბუქ-მომხმარებელმა Shako Kutchashvili გამოაქვეყნა მსახიობ დიმიტრი ტატიშვილის ვიდეო აღწერით: “არჩევნების შემდეგ განათებული გონება”. ვიდეოში ტატიშვილი ამბობს:
“ტეხავს ნაცობა. აშკარად ეგრეა. ნაღდად ტეხავს. ნაცები ვინც ვართ, ყველას გვიტყდება. ადრე ამით რომ მოგვქონდა თავი, ახლა ვეღარ ვტრაბახობთ. ნაცობა მენტალური მდგომარეობაა, სამწუხაროდ, რა საკვირველია, რომელიც დაკავშირებულია ფანატიკოსობასთან, ძალაუფლების წყურვილთან, ტრადიციების უპატივცემულობასთან, ანუ სიბნელესთან, რა. და ეს ტეხავს და ამას უკვე ძალაუფლებას მოწყურებული ნაცებიც ვიაზრებთ, რომ ტეხავს”.
პოსტის კომენტარებში ჩანს, რომ მომხმარებლების ნაწილი ვიდეოს რეალურად აღიქვამს.
გავრცელებული ვიდეო ტელეკომპანია “ფორმულას” გადაცემა “შაბათის ფორმულას” ერთ-ერთი სიუჟეტიდანაა ამოჭრილი. სიუჟეტი 2024 წლის საპარლამენტო არჩევნებამდე ერთი კვირით ადრე გამოქვეყნდა და მასში საუბარია იმაზე, თუ როგორ ემზადება “ქართული ოცნება“ ხმების მოსაპარად. ვიდეოში საუბრობენ პოლიტიკოსები, არასამთავრობო ორგანიზაციების წარმომადგენლები, მსახიობები და სხვა საზოგადოებისთვის ცნობილი სახეები. ერთ-ერთი რესპონდენტი მსახიობი დიმიტრი ტატიშვილია, რომელიც “ქართულ ოცნებას” აკრიტიკებს და 2024 წლის საპარლამენტო არჩევნების მნიშვნელობაზე საუბრობს. სწორედ ამ სიუჟეტიდან ამოჭრილი ვიდეოა რედაქტირებული და სიტყვა “ქოცობა” “ნაცობით” არის შეცვლილი, თითქოს არჩევნების შემდეგ მსახიობმა აზრი შეიცვალა. რეალურად, ის ამბობს (12:19-დან):
“ტეხავს ქოცობა. აშკარად ეგრეა. ნაღდად ტეხავს. აი, ქოცები ვინც არიან, იმათაც უტყდებათ, ადრე ამით რომ მოჰქონდათ თავი, ახლა ვეღარ ტრაბახობენ ამითი. ქოცობა მენტალური მდგომარეობაა, სამწუხაროდ, რა საკვირველია, რომელიც დაკავშირებულია უმეცრებასთან, სიხარბესთან, მონურ დამოკიდებულებასთან, მონურ აზროვნებასთან, სიბნელესთან რა, ძირითადად. ეს ტეხავს, ეს ბნელებმაც იციან, რომ ტეხავს. ეს მასობრივი ამბავია…”
წყაროს შესახებ
ფეისბუქ-მომხმარებელი Shako Kutchashvili “ქართული ოცნების” მხარდამჭერია და ოპოზიციური პარტიებისა და კრიტიკული მედიის ჟურნალისტების დისკრედიტაციისკენ მიმართულ პოსტებს ხშირად აქვეყნებს. 2021 წელს მან “დესტრუქციული ძალების წინააღმდეგ” მოძრაობა “წინ’სვლა” დააფუძნა. მითების დეტექტორს კუჭაშვილის მიერ გავრცელებული მანიპულაციური შინაარსის პოსტი წარსულშიც აქვს გადამოწმებული.
ფეისბუქ-მომხმარებელი David Tordia ანტიოპოზიციური შინაარსის ინფორმაციას სისტემატურად აქვეყნებს. “მითების დეტექტორს” წარსულში მის მიერ გავრცელებული არაერთი დეზინფორმაციული პოსტი აქვს გადამოწმებული.
წყარო: მითებისდეტექტორი
