გუშინ იტალიურ მასმედიაში გავრცელდა ცნობა რომ „ნაპოლის“ მთავარი მწვრთნელი ლუჩანო სპალეტი კლუბში 2024 წლამდე დარჩება. კლუბსაც და მწვრთნელსაც მუშაობის გახანგრძლივების სურვილი აქვთ, თუმცა შეთანხმება მსოფლიო ჩემპიონატის დასრულების შემდეგ შედგება.
სპალეტის კონტრაქტი სეზონის ბოლოს იწურება, თუმცა ხელშეკრულებაში ჩადებულია პუნქტი, რომლის მიხედვითაც, კონტრაქტის გაგრძელება 2024 წლის მარტამდეა შესაძლებელი.
„ნაპოლი“ ამ სეზონში ბრწყინვალედ გამოიყურება. გუნდმა ჩემპიონთა ლიგის ჯგუფურ ეტაპზე ასპარეზობა პირველ ადგილზე დაასრულა, ჩემპიონატს კი 12 ტურის შემდეგ 32 ქულით ლიდერობს და უახლოეს მდევარს „ატალანტას“ 5 ქულით უსწრებს.
გუშინ, ცნობილმა იტალიელმა საფეხბურთო აგენტმა კრისტიან ემილიმ ხვიჩა კვარაცხელიას შესაძლო ტრანსფერზე ისაუბრა.
„კვარაცხელია გადავიდა „ნაპოლში“ და თამაშობს ისე შესანიშნავად, როგორც ამას ბოლო წლებში რუსეთსა და საქართველოს ნაკრებში აკეთებდა. ის უბრალოდ ბრილიანტია და ხალხი უკვე საუბრობს, რომ მისმა სატრანსფერო ღირებულებამ შესაძლოა, 100 მილიონი ევრო შეადგინოს.
ხვიჩას იანვარში გაყიდვის ნულოვანი შანსი არსებობს. ვფიქრობ, თუ ასე გააგრძელებს თამაშს, ზაფხულში ქართველი უკვე 100 მილიონი ევრო ეღირება“.
ხვიჩა კვარაცხელია „სერია A“–ს ისტორიაში უკვე შევიდა. ის იტალიის ჩემპიონატში მოასპარეზე ფეხბურთელებში გახდა პირველი, რომელმაც ყველა ტურნირზე 8 გოლისა და ამდენივე შედეგიანი გადაცემის გაკეთება მხოლოდ 1128 წუთში შეძლო.
საინტერესოა, რომ საუკეთესო შედეგი წარსულში ასევე „ნაპოლის“ ფეხბურთელს ჰქონდა. გონსალო იგუაინმა 8 გოლს + 8 ასისტის დაფიქსირება 1723 წუთში მოახერხა.
ხუთეულში ასევე იმყოფებიან კრიშტიანო რონალდო, ედინ ჯეკო და ზლატან იბრაჰიმოვიჩი.
ევროპის ჩემპიონთა ლიგის მერვედფინალური სტადიის წილისყრა ორშაბათს, 7 ნოემბერს, ნიონში გაიმართება და ჩვენი დროით 15 საათზე დაიწყება. წილისყრის წინ გუნდები განთესილები არიან ჯგუფების გამარჯვებულებად და მეორეადგილოსნებად.
განთესილთა კალათაში არიან: „ბაიერნი“, „ბენფიკა“, „ჩელსი“, „მანჩესტერ სიტი“, „ნაპოლი“, „პორტუ“, „რეალი“, „ტოტენჰემი“.
განუთესავთა კალათაში მოხვდნენ: „ბრიუგე“, „დორტმუნდი“, „აინტრახტი“, „ინტერი“, „ლაიპციგი“, „ლივერპული“, „მილანი“, „პსჟ“.
პირველ ადგილზე გასული გუნდი მეორე ადგილზე გასულს დაუპირისპირდება. არ შეიძლება ერთი ქვეყნის წარმომადგენლები დაუპირისპირდნენ ერთმანეთს და არც ერთ ჯგუფში ნათამაშები გუნდები. პირველი მატჩები 2023 წლის 14, 15, 21 და 22 თებერვალს გაიმართება, საპასუხოები – 7, 8, 14 და 15 მარტს. განთესილები პირველ მატჩს სტუმრად ითამაშებენ.
„ნაპოლის“ მეტოქე შესაძლოა, იყოს „ბრიუგე“, „აინტრახტი“, „ლაიპციგი“, „დორტმუნდი“ და „პსჟ“. ცხადია, ყველაზე არასასურველი ვარიანტია პარიზული გუნდია.
გუშინ გერმანულ მასმედიასთან საუბრისას მიუნხენის „ბაიერნისა“ და გერმანიის ეროვნული გუნდის კარის დარაჯმა მანუელ ნოიერმა გაამხილა, რომ კანის კიბოს გამო სამი ოპერაციის გაკეთება დასჭირდა.
„მაქვს პირადული ამბავი, რომელიც კანის დაავადებას შეეხება. სახეზე კანის კიბო მქონდა, რომელზეც ოპერაციის გაკეთება უკვე სამჯერ დამჭირდა. ამის გამო განსაკუთრებულ ყურადღებას მზისგან დაცვას ვუთმობ, რადგან ვარჯიში მუდმივად ღია ცის ქვეშ მიხდება და თანაც, თავისუფალი დროს ბუნებაში გატარება მიყვარს“.
36 წლის მანუელ ნოიერი მიუნხენის „ბაიერნის“ ღირსებას 2011 წლიდან იცავს და მისი კაპიტანია. მეკარეს კლუბთან კონტრაქტი 2024 წლის ზაფხულამდე აკავშირებს. მიმდინარე სეზონში ნოიერმა ყველა ტურნირის 13 მატჩში ითამაშა, გაუშვა 11 გოლი, 6 თამაშში კი კარი მშრალად შეინახა.
გუშინვე, „მილანის“ შვედმა თავდამსხმელმა ზლატან იბრაჰიმოვიჩმა ესპანურ გამოცემასთან „Marca“„პარი სენ–ჟერმენის“ თავდამსხმელი კილიან მბაპეს გადაწყვეტილებაზე ისაუბრა. 23 წლის ფრანგმა ვარსკვლავმა, რომელსაც ამ სეზონის წინ მადრიდის „რეალში“ გადასვლა შეეძლო, საბოლოოდ პარიზულ კლუბში დარჩენა ამჯობინა და მასთან ახალი კონტრაქტი გააფორმა.
„მბაპეს პირადად არ ვიცნობ, მაგრამ როგორც მოთამაშე, ის ფანტასტიკურია. მაგრამ, როდესაც დისციპლინას კარგავ, კარგავ ინდივიდუალობასაც. არსებობს მიზეზი, რატომაც არის ზიდანი ზიდანი. მბაპეს სურს მას მიბაძოს? უნდა სურდეს პროგრესირება და არ უნდა კმაყოფილდებოდეს მიღწეულით.
მბაპემ სწორი გადაწყვეტილება მიიღო პარიზისთვის, მაგრამ არა საკუთარი თავისთვის. მან შექმნა ვითარება, სადაც ის უფრო მნიშვნელოვანია, ვიდრე კლუბი. და კლუბმაც საამისოდ ყველა პირობა შეუქმნა. მაგრამ შენ ვერასდროს გახდები უფრო მეტი, ვიდრე – კლუბი.
მიზეზი მის მშობლებში, ადვოკატებში, აგენტებსა და მწვრთნელებშია. პრობლემა მათშია. ამ დროს კარგავ დისციპლინასაც და საკუთარ თავსაც. ახლა ახალი თაობის მშობლები ფიქრობენ, რომ თვითონ გახდნენ ვარსკვლავები. ისინი იძლევიან ინტერვიუებს. მაგრამ ვინ არიან ისინი? გაჩუმდით! თქვენმა შვილმა უნდა იმუშაოს და იყოს დისციპლინირებული“.
ავტორი
