განათლების, კულტურისა და სპორტის მინისტრი, მიხეილ ბატიაშვილი მოჭიდავეების მიერ რუსეთის დროშის ფერებში გადაწყვეტილი მაისურის ჩაცმას, დაუფიქრებელ ნაბიჯად მიიჩნევს. მიხეილ ბატიაშვილის განცხადებით, თემა მგრძნობიარეა და მეტი სიფრთხილეა საჭირო.
„თემა იმდენად სენსიტიურია, რომ ჯობია წინასწარ დავფიქრდეთ, ვიდრე ასეთ ნაბიჯს გადავდგამთ. ვფიქრობ, რომ სპორტსმენებმა გააცნობიერეს ეს ნაბიჯი და მოიხადეს ბოდიში”, – განაცხადა მიხეილ ბატიაშვილმა.
გავრცელებულ ფოტოს შესახებ საკუთარი პოზიცია განმარტეს თავად მოჭიდავეებმა.
კომენტარი გააკეთა საქართველოს ჭიდაობის ეროვნული ფედერაციის პრეზიდენტმა გეგა გეგეშიძემ.
მსოფლიოს ჩემპიონ გენო პეტრიაშვილისა და ნაკრების მთავარ მწვრთნელ გიორგი იანტბელიძის მსგავსად, გეგეშიძეც ამბობს, რომ ქართველების მიერ თედეევის პორტრეტიანი მაისურების ჩაცმა და ერთობლივი ფოტოს გადაღება მხოლოდ მასთან მეგობრობის დამადასტურებელი ჟესტი იყო და არა რუსეთის პატივისცემის. მისივე თქმით, სწორედ ძამბოლატ თედეევი დაუდგა ქართველ მოჭიდავეებს გვერდით და დაეხმარა ოკუპირებულ ცხინვალში დაღუპული არჩილ ტატუნაშვილის ცხერდის გადმოსვენებაში.
16 აგვისტოს სოციალურ ქსელში საქართველოს თავისუფალი სტილით მოჭიდავეთა ნაკრების წევრთა ფოტო გავრცელდა. გენო პეტრიაშვილს, ზურაბ იაკობაშვილს და ნაკრების მთავარ მწვრთნელს, გიორგი იანტბელიძეს, რუსეთის დროშის ფერებში გადაწყვეტილი მაისურები აცვიათ.
მაისურზე ოკუპირებული სამხრეთ ოსეთის დეფაქტო პარლამენტის წევრის, ძამბოლატ თედეევის გამოსახულებაა. ძამბოლატი რუსეთის მოჭიდავეთა ნაკრების მთავარი მწვრთნელია.
ფოტო რამდენიმე თვის წინ, დაღესტანში ევროპის ჩემპიონატზეა გადაღებული. ჭიდაობის ფედერაციაში აცხადებენ, რომ ამ ამბავს კავშირი არ აქვს პოლიტიკასთან და ეს უბრალოდ, მეგობრულ ჟესტი იყო.
თედეევი ცხინვალში დაიბადა და წარსულში საბჭოთა კავშირის ჩემპიონი და ევროპის ჩემპიონატის ორ გზის გამარჯვებულია.
