ლანჩხუთის მერიის ფეისბუქგვერდზე რამდენიმე დღის წინ გამოქვეყნებული ინფორმაციით, გურიას რეგიონული განვითარების მინისტრი სტუმრობდა მოადგილეებთან ერთად.
ინფორმაციით ირკვევა, რომ კახაბერ გულედანმა ადგილობრივი ხელისუფლების წარმომადგენლებთან, მიმდინარე და დაგეგმილი ინფრასტრუქტურული პროექტები განიხილა.
“მინისტრმა ხაზი გაუსვა დაგეგმილი პროექტების ვადებში და ხარისხიანად შესრულების აუცილებლობას და ადგილობრივ ხელისუფლებას მოუწოდა, ამ კუთხით მაქსიმალური ყურადღება გამოიჩინონ…
შეხვედრაზე იმსჯელეს რეგიონში არსებულ გამოწვევებზე, მოსახლეობის საჭიროებებზე და მათი გადაჭრის გზებზე. მინისტრმა ასევე მოისმინა ინფორმაცია სტიქიის შედეგების სალიკვიდაციო ღონისძიებების მიმდინარეობის შესახებ”, _ ვკითხულობთ მერიის მიერ გავრცელებულ ინფორმაციაში.
რეგიონული განვითარების მინისტრი ლანჩხუთსაც სტუმრობდა და მოადგილეებთან, რეგიონებში გასახორციელებელი პროექტების დეპარტამენტის უფროსთან, გურიის მხარეში სახელმწიფო რწმუნებულთან, ლანჩხუთის მერ ალექსანდრე სარიშვილთან და საკრებულოს თავმჯდომარე ბესიკ ტაბიძესთან ერთად სპორტული კომპლექსის მშენებლობა დაათვალიერა.
მერიის ინფორმაციით, სპორტული ობიექტი 250 მაყურებელზეა გათვლილი.
“მოეწყობა ფრენბურთის, კალათბურთისა და ჭიდაობისთვის განკუთვნილი სპორტული დარბაზები.
პროექტი რეგიონებში გასახორციელებელი პროექტების ფონდიდან ფინანსდება და მისი ღირებულება 2 680 538 ლარს შეადგენს“, _ წერია უწყების მიერ გავრცელებულ ინფორმაციაში.
ლანჩხუთში სპორტული კომპლექსის მშენებლობას იწონებს ოპოზიცია და კმაყოფილებას გამოთქვამს.
“აი, ეს ნამდვილად კარგი კეთდება, თან ეტყობა, თავად მშენებელი კომპანიაც ძალიან პასუხისმგებლიანია! მივესალმები, რომ ლანჩხუთსაც ექნება ნორმალური სპორტული სკოლა!” _ ფაქტს ეხმიანება საკრებულოს წევრი “ერთიანი ნაციონალური მოძრაობიდან” ირმა მგელაძე.
სპორტული კომპლექსის მშენებლობას რიგითი ლანჩხუთელებიც იწონებენ, თუმცა, მათთვის გაცილებით მნიშვნელოვანი ყოფითი პრობლემების მოგვარებაა.
“სპორტიც კაია, მაგრამ ზაფხული მალე გავა, ოჯახები ღია ცის ქვეშ არ დარჩნენ, დანგრეულ სახლებს და გზებს მიაქციეთ ყურადღება, წყალწმინდასა და ომფარეთში სტიქიამ გზები რომ ჩარეცხა და ვეღარ მიდის სახლამდე ადამიანი“, _ ასეთია დიდთოვლობისას დაზარალებული მოსახლეობის გზავნილი ხელისუფლების მისამართით.
ავტორი
