დიდთოვლობა, ძლიერი წვიმები და ქარი წლის სხვადასხვა სეზონზე არაერთ მუნიციპალიტეტში პრობლემებს ქმნის.
წელსაც, წლის დასაწყისში ჩოხატაურს რამდენჯერმე დაატყდა სტიქია თავს.
შეგახსენებთ, რომ იანვარში ძლიერმა ქარმა ჩოხატაურში ხეები მოგლიჯა და საცხოვრებელი სახლები დააზიანა. მსგავსი პრობლემა შეიქმნა 28 მარტის ღამესაც. ამოვარდნილმა ძლიერმა ქარმა დუმბაძის ქუჩაზე მოგლიჯა ნაძვი და გაწყვიტა ელექტროენერგიის გადამცემი ხაზები. გარდა ამისა 14 საცხოვრებელ სახლს – ჯვარცხმაში, შუა ამაღლებაში, საჭამიასერში, ბუკნარსა და ბასილეთში სახურავი დაუზიანა.
გარდა ამისა, როგორც ბახმაროში თოვლის დადნობის შემდეგ გახდა ცნობილი, დიდთოვლობამ სახლები და ფარდულები დაანგრია.
რა თანხა გამოიყო სტიქიის სალიკვიდაციო სამუშაოებისთვის და რით დაეხმარა ჩოხატაურის მერია სტიქიით დაზარალებულებს – ამის გასარკვევად “გურია ნიუსმა” მერიის პრესსამსახურს მიმართა.
“საქართველოს მთავრობის 20.01.23 წლის N 116 განკარგულებით, სტიქიის სალიკვიდაციო ღონისძიებებისთვის ჯამში გამოიყო 2 225 ათასი (ორი მილიონ ორას ოცდახუთი ათასი) ლარი.
45 სოციალურად დაუცველი ოჯახისთვის მერიამ სრულად უზრუნველყო სახლის გადახურვის სამუშაოები, ხოლო მოსახლეობას დაურუგდა 60 000 კვადრატამდე სახურავი და ხის მასალა, ბიუჯეტმა 1 155 ათასი ( მილიონ ას ორმოცდათხუთმეტი ათასი) ლარი შეადგინა.
სტიქიის შედეგად დაზიანებული გზებისა და ინფრასტრუქტურის მოსაწესრიგებლად გამოიყო 1 070 ათასი (მილიონ სამოცდაათი ათასი) ლარი.
აგრეთვე, მიმდინარე წლის იანვარში სტიქიის შედეგად დაზარალებული მოსახლეობისთვის (მთლიანად ან ნაწილობრივ დაზიანებული კერძო სახლებისთვის კომპენსაციის გაცემის მიზნით) 20.01.23 წლის N 115 განკარგულებით, გამოიყო 20 000 ლარი, რომელიც გადაეცა 56 ოჯახს”,_ წერია მერიის მიერ ჩვენთვის მოწოდებულ ინფორმაციაში.
ინფორმაციისთვის, აღნიშნულ მონაცემებში ბახმაროში მომხდარი სტიქიის შედეგები არ შედის.
როგორც ცოტა ხნის წინ ჩოხატაურის მერმა დავით შარაშიძემ გვითხრა, ადგილი, სადაც სახლები დაინგრა, ზვავსაშიში ზონაა და შესაბამისად, უკვე განადგურებული სახლებიც უკანონოდ და მერიის ნებართვის გარეშე იყო აშენებული.
“კანონის მიხედვით, ჩვენ რაშიც შეგვიძლია დახმარება, შეგვიძლია, დარეგისტრირებულ მიწებს ადგილმონაცვლეობა შევთავაზოთ უსაფრთხო სამშენებლო ზონაში, სადაც შეეძლებათ კანონის მიხედვით მშენებლობის წარმოება”, _ გვითხრა შარაშიძემ.
ავტორი
