გასული წლის ბოლოს, ოზურგეთის ნოდარ დუმბაძის სახელობის მეორე საჯარო სკოლაში, სკოლის მულტიდისციპლინური გუნდის მიერ, დაიგეგმა სასკოლო პროექტი: “გაკვეთილი სხვა გარემოსა და სივრცეში”. ამ მეტად სპეციფიკური პროექტის მიზანი იყო, სპეციალური საგანმანათლებლო საჭიროების მქონე მოსწავლეების აქტიური ჩართულობა საგაკვეთილო პროცესში. ასევე, მოტივაციის ამაღლება, პოზიტიური გარემოს უზრუნველყოფა, როგორც საგნის მასწავლებელთან, ისე თანაკლასელებთან ერთად.
პროექტის მიხედვით, სპეციალური საგანმანათლებლო საჭიროების მქონე მოსწავლეთათვის, გაკვეთილები დაიგეგმა და ჩატარდა ოზურგეთის ცენტრალური ბიბლიოთეკაში, ტექნოლოგიურ პარკსა და ოზურგეთის ისტორიული მუზეუმში.
სკოლის მულტიდისციპლინური ჯგუფის წევრები იყვნენ: ლელა თოდრაძე, თეონა მორჩილაძე და მარინა წულაია.
_ უფრო დეტალურად რომ გითხრათ, პროექტი _ “გაკვეთილი სხვა გარემოსა და სხვა სივრცეში”, არის უმნიშვნელოვანესი ნაბიჯი იმ სპეციალური საგანმანათლებლო საჭიროების მქონე ბავშვებისთვის, რომელთა მიმართ საგანგებო და სათუთი მიდგომაა საჭირო. აღმოჩნდა, რომ ამ ძალზე ნიჭიერი მოსწავლეებისთვის სხვა გარემო და სივრცე ძალზე შთამბეჭდავი, აღქმის და შემეცნების სრულფასოვანი არეალია, _ ამბობს მარინა წულაია.
ერთი თვის მანძილზე, მეორე საჯარო სკოლის თვრამეტ მოსწავლეს, პედაგოგებთან და თანაკლასელებთან ერთად, მიეცათ სრული თავისუფლება, ოზურგეთის ბიბლიოთეკაში, ტექნოპარკსა თუ ისტორიულ მუზეუმში სრულფასოვნად მოესმინათ და აღექვათ გაკვეთილები.
_ ზოგადად, სკოლებში მიმდინარეობს ახალი ეროვნული სასწავლო გეგმის დანერგვის პროცესი, რომელიც “სწავლა სწავლების” პროგრესზეა ორიენტირებული. სკოლაში სასწავლო პროცესის გაუმჯობესების, მოსწავლეზე ინდივიდუალური მიდგომის და განვითარების კუთხით, მთელი რიგი ღონისძიებები იგეგმება. ამ მომენტში განსაკუთრებით მინდა, ყურადღება შევაჩერო ძალზე აუცილებელ და ასევე, წარმატებით გასახორციელებელ პროექტზე, უფრო სწორად მიზნობრივ პროექტზე: “გაკვეთილი სხვა გარემოსა და სივრცეში”. მულტიდისციპლინურმა გუნდმა შეძლო ამ პროექტის სრულფასოვნად გახორციელება, რაც არ იყო ადვილი. ხელმძღვანელებმა: მარინა წულაიამ, ლელა თოდრაძემ და თეონა მორჩილაძემ ამისთვის ყველაფერი გააკეთეს. მე, ჩემი კუთხითაც დანახულ იმ რეფლექსიებს, ანუ ადამიანის, ამჯერად მოსწავლის მიერ საკუთარი ცოდნის, ემოციების, საქციელის სრული მდგომარეობის გაცნობიერებას, როცა ახერხებს ყურადღების კონცენტრირებას გარკვეული სახით აღქმულ მოვლენაზე, ბედნიერებად მივიჩნევ, _ ამბობს ოზურგეთის მეორე საჯარო სკოლის დირექტორი ფატი სიორიძე.
ის დიდ მადლიერებას გამოთქვამს პროექტის ხელმძღვანელებისა და პედაგოგებისადმი, რომლებმაც სრულად შეძლეს საინტერესო, ინოვაციურად დაგეგმილი გაკვეთილების ჩატარება, ერთი თვის განმავლობაში, სხვა სივრცეებში. ამით მათ სპეციალური საგანმანათლებლო საჭიროების მქონე ბავშვებისთვის ახალი ფანჯარა გახსნეს ცოდნის, გარემო სივრცის, ყველანაირი მოვლენის საკუთარი ყურადღების, ხედვის ქვეშ კონცეტრირებასა და სრულფასოვნად აღქმაში.
მეორე საჯარო სკოლის იმ თვრამეტი მოსწავლიდან, რომელთათვისაც სპეციალური პროექტი გახორციელდა, უმეტესობა ვაჟებია. ბავშვებს ერთმანეთთან და თანაკლასელებთან, ყველა შესაბამის კლასში, საუკეთესო დამოკიდებულება აქვთ. პროექტის გახორციელების ერთთვიან პროცესში, სხვადასხვა სივრცეში გაკვეთილების ჩატარებისას, მოხდა კლიპის გადაღება, თიკო გოლიაძის მიერ.
_ როცა ყველაფერი დასრულდა, წლის ბოლოს, მოხდა ამ კლიპის პრეზენტაცია სკოლაში. პრეზენტაციას ესწრებოდა ყველა _ დირექტორი, მასწავლებლები, მშობლები. შეჯამდა შედეგები და გამოითქვა თვალსაზრისი, რომ ეს ერთ-ერთი საუკეთესო გაკვეთილია სხვა გარემოსა და სივრცეში, რომელიც სამომავლოდ კიდევ უფრო დიდი განვრცობას ჰპოვებს, _ თქვა მარინა წულაიამ.
ისტორიკოსი, ოზურგეთის ისტორიული მუზეუმის თანამშრომელი, არქივის მცველი, მანანა ლომაძე “გურია ნიუსთან” ამბობს, რომ ეს არის განსაკუთრებული პროექტი, რომელიც ჩვენს მომავალ თაობას, სპეციალური საგანმანათლებლო საჭიროების მქონე მოსწავლეებს ეხმარება მოტივაციის ამაღლებაში:
_ მიხარია, რომ მეორე საჯარო სკოლაში ასეთი პროექტი დაიგეგმა. ეს იყო სწორად განსაზღვრული მიდგომა სპეციალური საგანმანათლებლო საჭიროების მოსწავლეებისთვის. ეს არ ჰგავს სხვა პროექტებს, თუნდაც ძალიან კარგს. ეს საუკეთესო პროექტია მთელი თავისი მნიშვნელობით. ამ უნიჭიერეს ბავშვებს ესაჭიროება განსაკუთრებით სათუთი მიდგომა. აშკარაა შედეგი, რომელიც სამომავლოდ მათ ცხოვრებაზე წარმატებით აისახება. ამაში კი სკოლას უდიდესი წვლილი მიუძღვის. მე თვალს ვადევნებდი ამ პროცესს და მიხარია, რომ საზოგადოება, კულტურულ-საგანმანათლებლო სივრცეები შეთანხმდნენ ამ ტიპის გაკვეთილების ჩატარების აუცილებლობასა და დიდი მნიშვნელობაზე. უდიდესი როლი აკისრია ჟურნალისტებსაც, რომ ასეთი პროექტების მიზნობრიობა და შედეგი გააცნონ ფართო საზოგადოებას, _ გვითხრა მან.
მოსწავლეთა მიმართ ინდივიდუალური მიდგომა სწავლის საუკეთესო ხარისხსაც განაპირობებს.
როგორც სკოლის დირექტორი, ფატი სიორიძე აფასებს, მიღებულმა შედეგებმა აჩვენა, რომ სპეციალური საგანმანათლებლო საჭიროების მქონე მოსწავლეები, შეძლებისდაგვარად, მათი უნარებისა და შესაძლებლობების შესაბამისად იყვნენ ჩართული თანაკლასელებთან ერთად, ყველა დაგეგმილ აქტივობაში. სასწავლო პროცესში მათი უნარების განვითარება-განმტკიცებისთვის სასურველია, კვლავაც გაგრძელდეს ასეთი პროექტის დაგეგმვა, რათა მოხდეს სპეციალური საგანმანათლებლო საჭიროების მქონე მოსწავლეთა სრული ადაპტირება სოციუმში.
ავტორი
