სავარაუდოდ, ჩეჩენი ბიზნესმენის, ასლანბეკ ახმეტხანოვის და გროზნოს ყოფილი მერის საავტომობილო კოლონაში შემავალმა ავტომობილებმა, ბოლო ორი კვირის განმავლობაში, სულ მცირე, 43-ჯერ დაარღვიეს საავტომობილო მოძრაობის წესები. ვიდეოჯარიმების მოცულობა, სულ მცირე, 7450 ლარს შეადგენს.
რამდენიმე დღეა, სოციალურ ქსელებში ვრცელდება ფოტო-ვიდეო მასალა, რაც საქართველოს სხვადასხვა ქალაქშია გადაღებული და სადაც ჩანს რუსული სანომრე ნიშნებით მოძრავი, ერთნაირი, სავარაუდოდ, „მერსედესის“ G-კლასის ავტომობილების კოლონა, თითქმის ერთნაირი სანომრე ნიშნებით.
ყველა მათგანის ნომერში ფიგურირებს სამი შვიდიანი. მაგალითად: A777AC77, C777CE77, A777AK77 და O777OC77.
შინაგან საქმეთა სამინისტროს პორტალზე, სადაც საჯარიმო ქვითრები საჯაროდ ქვეყნდება, ჩანს, რომ ამ ოთხი სანომრე ნიშნის მქონე ავტომობილებს 22 მაისიდან 3 ივნისამდე პერიოდში ზუსტად 43 ჯარიმა აქვთ გამოწერილი.
ერთ-ერთი ეს ავტომობილი, სანომრე ნიშნებით A777AC77, სავარაუდოდ, ჩეჩენ ბიზნესმენს, ასლანბეკ ახმეტხანოვს ეკუთვნის. ასეთივე ავტომობილები იდენტური ნომრებით ასახულია ვიდეოში, რომელიც ინსტაგრამზე ბიზნესმენ ასლანბეკ ახმეტხანოვის სახელით ერთი წლის წინ არის გამოქვეყნებული.
43 ჯარიმა – 7450 ლარი
- ავტომობილს, სანომრე ნიშნებით A777AC77 – 10 დარღვევა უფიქსირდება; სავარაუდოდ, ეს ეკუთვნის ახმეტხანოვს;
- ავტომობილს, სანომრე ნიშნებით C777CE77 – 8 ჯარიმა;
- ავტომობილს, სანომრე ნიშნებით A777AK77 – 9 ჯარიმა;
- ავტომობილს, სანომრე ნიშნებით O777OC77 – 7 ჯარიმა
- ავტომობილს, სანომრე ნიშნებით B800EC797 – 9 ჯარიმა;
ამ სამი ავტომობილის ჯარიმების მოცულობა 7450 ლარს აღწევს.
- A777AC77 – 1550 ლარი;
- C777CE77 – 1650 ლარი;
- A777AK77 – 1700 ლარი.
- O777OC77 – 1100 ლარი
- B800EC797 – 1450 ლარი
პირველი ჯარიმა დაფიქსირებულია 22 მაისს, ხოლო ბოლო ოთხი – 3 ივნისს.
ჯარიმები გამოწერილია საავტომობილო მოძრაობის წესების დარღვევისათვის სხვადასხვა ადგილას, მათ შორის თბილისში, ხაშურთან, აგარასთან, ნიგოითთან (გურიაში), ლანჩხუთთან, ჯაპანასთან და შეკვეთილთან. მათ საგზაო მოძრაობის წესები ძირითადად ერთსა და იმავე ადგილებში აქვთ დარღვეული.
რას ამბობენ ხელისუფლებაში?
შინაგან საქმეთა სამინისტროს ან სახელმწიფო უსაფრთხოების სამსახურს ამ საკითხზე ჯერჯერობით კომენტარი არ გაუკეთებია.
„ქართული ოცნების” პარლამენტარი, დიტო სამხარაძე ფეისბუკზე წერს, რომ საქართველოში იმყოფებოდნენ „გროზნოს გადაყენებული მერი და კადიროვის მიერ დაჭერილი ბიზნესმენი მეგობრებთან ერთად“.
პარლამენტის პირველმა ვიცე-სპიკერმა გია ვოლსკიმ 5 ივნისს განაცხადა, რომ „ეს თემა არ არის, რომლითაც შეიძლება ჩვენი ეროვნული უსაფრთხოების საკითხი რაიმე საეჭვო გარემოებში აღმოჩნდეს“.
„ამ ადამიანების ცხოვრების წესი და მანერა არის ერთი თემა, რომელიც შეიძლება მოგწონდეს ან არ მოგწონდეს, მაგრამ კადიროველებად და დივერსანტებად მათი მონათვლა, არასწორია. კადიროველი სხვა რამეა“, – განუცხადა ვოლსკიმ ჟურნალისტებს.
რა ვიცით?
„ევროპული მდგრადობის ინიციატივის ცენტრის“ (European Resilience Initiative Center) დამფუძნებელი, ექსპერტი აღმოსავლეთ ევროპის საკითხებში სერგეი სუმლენი ტვიტერზე აზიარებს საქართველოში ესკორტის გადაადგილებასთან დაკავშირებულ ინფორმაციას და წერს, რომ „777-77“ ნომრები რუსეთში, ძირითადად, გაიცემოდა დანაშაულებრივი სამყაროს, მთავრობის, ანდა სპეცსამსახურების წარმომადგენლებისთვის.
წყარო: რადიო თავისუფლება
