სულის შემძვრელი ტრაგედია! არ არსებობს სიტყვა, რომელიც ნუგეშს მოგვიტანს შენს ახლობლებს…
კახა ნოშრევანის ძე, დოლიძე.
პანაშვიდები ყოველდღე, გამოსვენება-დაკრძალვა ხუთშაბათს, სოფელი ნაბეღლავი.
შენ ჩვენს გულებში სამუდამო ტკივილად დარჩები, მოგონებად გადაქცეული. ვინც გიცნობდა, ყველას ემახსოვრები ისეთი, როგორიც იყავი უწინ _ ლაღი, სიცოცხლის მოყვარული, თბილი, გულკეთილი, შეუდარებელი და საამაყო. ემახსოვრებათ შენი სათნო, ლამაზი ღიმილი და გულის სითბო. მსუბუქი იყოს შენს გულზე დაყრილი ნაბეღლავის მიწა.
,,ისე ლამაზად უნდა იცხოვრო, მზის ჩასვლას უნდა ჰგავდეს სიკვდილი!…”
ძალიან მოკლე დროში ჩაესვენა მზე შენთვის, თუმცა შენი ღირსეული სახელი და კეთილშობილება კიდევ დიდხანს გაასხივოსნებს შენს საახლობლო, სანათესაოს.
ტკბილად იძინე კეთილო, უბოროტო, შენი ლამაზი სული, ცათა სასუფეველში დაიდებს ბინას… _ წერს ჩოხატაურში ტრაგიკულად დაღუპული კახა დოლიძის ახლობელი.
შეგახსენებთ, რომ 14 მაისს ტრაგიკული შემთხვევა მოხდა ჩოხატაურის მუნიციპალიტეტის სოფელ ნაბეღლავში. მდინარეში ავტომობილი გადავარდა, რომელსაც კახა დოლიძის სიცოცხლე ემსხვერპლა. კახა ავტომობილს თავად მართავდა.
“გურია ნიუსი” მწუხარებას გამოთქვამს მომხდარი ტრაგედიის გამო და თანაუგრძნობს დაღუპულის ოჯახს და ახლობლებს.
