საქსტატის მონაცემებით, 2025 წლის პირველ კვარტალში სოფლის მეურნეობის პროდუქციის ერთეულის ღირებულების ინდექსი წინა კვარტალთან შედარებით 9.5%-ით გაიზარდა. ზრდის ძირითად გამომწვევად ერთწლოვანი კულტურების ღირებულების 33.8%-იანი მატება დასახელდა, რაც საერთო ინდექსზე 6.66 პროცენტული პუნქტით აისახა.
წინა წლის ანალოგიურ პერიოდთან შედარებით, ინდექსი 13.3%-ით არის გაზრდილი. აქაც მნიშვნელოვანი წვლილი ერთწლოვან კულტურებზე მოდის, რომელთა ღირებულება წელიწადში 51.6%-ით გაიზარდა და მთლიან ინდექსზე 9.09 პროცენტული პუნქტით იმოქმედა.
აღნიშნულ მონაცემებთან დაკავშირებით საქართველოს ფერმერთა ასოციაციის თავმჯდომარის მოადგილემ, რატი კოჭლამაზაშვილმა, BMGTV-ის გადაცემაში „საქმიანი დილა“ ისაუბრა. მისი განმარტებით, საქსტატის მიერ გამოქვეყნებული ინდექსი ე.წ. “ფასები ფერმის კართან” პრინციპით განისაზღვრება, რაც ნიშნავს, რომ აქ ასახულია უშუალოდ ფერმერების მიერ რეალიზებული პროდუქციის ფასები, პირველადი გადამუშავების ეტაპამდე.
“ეს ინდექსი არის “ფასები ფერმის კართან”. იქიდან გამომდინარე, რომ პროდუქტი ფერმიდან საბოლოო მომხმარებლამდე ძალიან დიდ გზას გადის. ფასების ზრდა “ფერმის კარზე” პრინციპით განისაზღვრება. თუმცა წარმოიდგინეთ, რომ საბოლოო მომხმარებლებამდე იგივე ფასები იქნება, თუ არა მეტი”, – განაცხადა მან.
მისი თქმით, პროდუქტის გაძვირება მნიშვნელოვან ზეწოლას ახდენს მოსახლეობაზე, განსაკუთრებით კი დაბალ შემოსავლიან ოჯახებზე, რადგან საშუალო სტატისტიკური ოჯახის სურსათზე ხარჯი დაახლოებით 45%-ს შეადგენს.
განსაკუთრებული ყურადღება გამახვილდა იმ ფაქტზე, რომ გაძვირებულ პროდუქციაში მარცვლოვანი კულტურები ლიდერობენ, რომლებიც უმეტესწილად რუსეთიდან და ბოლო წლებში ნაწილობრივ ყაზახეთიდან შემოდის. ის დასძენს, რომ ეს დამოკიდებულება ერთგვარად ართულებს ქვეყნისთვის სასურსათო უსაფრთხოების უზრუნველყოფას.
„FAO-ს კვლევებით, საქართველო 50%-ზე მეტად იმპორტზეა დამოკიდებული, განსაკუთრებით მარცვლოვან კულტურებზე“, – აღნიშნა კოჭლამაზაშვილმა.
მისი შეფასებით, იმპორტის შემცირებისა და ფასების მერყეობისგან დაცულობისთვის აუცილებელია შიდა წარმოების განვითარება, მარაგების შექმნა და იმპორტის დივერსიფიკაცია.
რაც შეეხება ექსპორტს, კოჭლამაზაშვილი ამბობს, რომ საქართველოს ექსპორტი ძირითადად პირველადი წარმოების პროდუქტებზეა კონცენტრირებული და ხშირად პროდუქციის ექსპორტირება მოსავლის მიღებისთანავე, სპონტანურად ხდება. ამ პროცესს თან ახლავს ფასების არასტაბილურობა და რისკი, რომ შემდეგში ქვეყნისთვის იმავე პროდუქტის იმპორტი უკვე მაღალ ფასად გახდეს საჭირო.
„დივერსიფიკაცია მნიშვნელოვანია როგორც ექსპორტირებული პროდუქტების, ისე საექსპორტო ბაზრების ჭრილში. აქცენტი შიდა ბაზარზე შესაძლოა მოგებიანი სტრატეგიაც აღმოჩნდეს. რა თქმა უნდა, ბიზნესის ჩართულობით უნდა მოხდეს ეს ყველაფერი, თუმცა საგულისხმოა, რომ ბიზნესი დიდი ხანია საუბრობს ამ პრობლემებზე“, – თქვა ასოციაციის წარმომადგენელმა და აღნიშნა, რომ გარდა ბაზრების დივერსიფიკაციისა, აუცილებელია შუალედური ინფრასტრუქტურის განვითარება, რომელიც პროდუქტის დასაწყობებასა და გრძელვადიან პერიოდში შენახვას უზრუნველყოფს.
მისივე განმარტებით, ბაზარზე შიდა მოხმარება სოფლის მეურნეობების პროდუქტებზე მნიშვნელოვნად არის გაზრდილი. ამიტომ, კოჭლამაზაშვილი ამბობს, რომ შიდა ბაზარზე კონცენტრირება სწორი სტრატეგიული ნაბიჯი იქნება.
წყარო: bm.ge
