საქართველოს პარლამენტის საგაზაფხულო სესიის პლენარულ სხდომაზე სახელმწიფო უსაფრთხოების სამსახურის უფროსმა, ვახტანგ გომელაურმა სუს-ის ყოველწლიური ანგარიში წარადგინა. მისი განცხადებით, დღეს საქართველოს უსაფრთხოების ძირითადი გამოწვევა კვლავ სუვერენიტეტისა და ტერიტორიუილი მთლიანობის ხელყოფაა.
,,დღეისათვის საქართველოს უსაფრთხოების ძირითად გამოწვევად კვლავ რჩება სუვერენიტეტისა და ტერიტორიული მთლიანობის ხელყოფა, საერთაშორისო ტერორიზმიდან გამომდინარე, საფრთხეები, ეროვნული ინტერესების საზიანოდ მოქმედი უცხო ქვეყნის სპეცსამსახურების საქმიანობა. რუსეთის მიერ ოკუპირებული ცხინვალის რეგიონის მიმდინარე წლის 22 თებერვალს მომხდარმა ფაქტმა, რასაც არჩილ ტატუნაშვილის სიცოცხლის ხელყოფა და ჩვენი ქვეყნის ორი მოქალაქის იძულებითი ტყვეობა მოჰყვა, კიდევ ერთხელ დაადასტურა თუ როგორი რთულია უსაფრთხოების ვითარება აღნიშნულ რეგიონში. მსგავსი ტრაგედიები ნათლად გვიჩვენებს, რომ ოკუპირებულ ტერიტორიებზე არსებული ვითარება და ადამიანის ფუნდამენტური უფლების ხშირი დარღვევა არის ის უპირველესი გამოწვევა, რომელიც განსაზღვრავს სახელმწიფო უსაფრთხოების სამსახურის დღის წესრიგს. წლების განმავლობაში ოკუპირებულ აფხაზეთსა და ცხინვალის რეგიონში შექმნილმა ვითარებამ ცხადყო, რომ რუსეთის ფედერაცია სოხუმსა და ცხინვალში ეტაკობრივი ანექსიის პოლიტიკას ახორციელებს, აღნიშნულის ნათელი მაგალითებია ოკუპირებულ აფხაზეთში რუსეთისა და დე ფაქტო შინაგან საქმეთა სამინისტროს ერთობლივი საკოორდინაციო ცენტრის შექმნა, ასევე ოკუპირებული ცხინვალის რეგიონის ე.წ შეიარაღებული ძალების ცალკეული დანაყოფების რუსეთის ფედერაციის თავდაცვის სამინისტროს შემადგენლობაში გადასვლა. ასევე, გასული წლის განმავლობაში რუსეთის საოკუპაციო ძალებმა ოკუპირებულ ტერიტორიებზე 100-ზე მეტი უკანონო სამხედრო წვრთნა ჩაატარეს, რაც აზიანებს არა მხოლოდ საქართველოს, არამედ მთლიანად სამხრეთ კავკასიის რეგიონის უსაფრთხოების გარემოს“,-განაცხადა გომელაურმა.
