პარლამენტის თავმჯდომარემ, არჩილ თალაკვაძემ, პარლმენტის ბიუროს სხდომაზე დაღუპული მოზარდის, ლუკა სირაძის ოჯახს მიუსამძიმრა და განაცხადა, რომ საქართველოს პრემიერ-მინისტრის, მთავრობისა და პარლამენტის კომიტეტების რეაგირებას აღნიშნულ საკითხთან მიმართებით მიესალმება.
თალაკვაძემ განაცხადა, რომ კიდევ ერთხელ არის დასაფიქრებელი თუ რა არის საჭირო სკოლებსა და პოლიციაში.
“ეს არის ძალიან მძიმე ტრაგედია. გაუცხოება, სოლიდარული კულტურის შესუსტება, სულიერი ფასეულობების ჩანაცვლება, პროცესების აჩქარება რასაც ჩვენს თანამედროვეობაში აქვს ადგილი, სამწუხაროდ, გვერდზე რჩება ის ადამიანები, მოზარდები, ვისაც დამარება სჭირდება.
მინდა, პირველ რიგში მივესალმო საქართველოს პრემიერ-მინისტრის, მთავრობისა და პარლამენტის კომიტეტების რეაგირებას აღნიშნულ საკითხთან მიმართებით, არა იმიტომ, რომ საზოგადოებამ ვინმეზე შური იძიოს ამ შემთხვევის გამო, არამედ იმიტომ, რომ სწორი დასკვნები გამოვიტანოთ და კიდევ ერთხელ დავფიქრდეთ, რა გვჭირდება სკოლაში, რა გვჭირდება პოლიციაში და რა უნდა გავაკეთოთ, რათა მომავალში თავიდან ავიცილოთ ტრაგიკული შემთხვევები. უნდა გვახსოვდეს, რომ სხვისი შვილები დღეს, შეიძლება, იყვნენ ჩვენი შვილები ხვალ. სწორედ ამ სულისკვეთებით და ამ გადმოსახედიდან გადავდგათ ნაბიჯები და უნდა გავაკეთოთ ის, რისი გაკეთებაც არის აუცილებელი. ეს არის ჩვენი შვილების ქვეყანა. ეს არის ჩვენი შვილების საზოგადოება, სადაც ახალმა თაობამ, ბავშვებმა, რომლებიც დღეს დადიან სკოლაში, ხვალ უნდა იარონ იმ სამსახურებში, იმ ქუჩებში და იმ სივრცეში, სადაც დღეს ჩვენ დავდივართ. უნდა იარონ პარლამენტში და თვითონ უნდა მიიღონ მომავალში გადაწყვეტილებები. ეს რომ გააკეთონ, დღეს ჩვენ გვაქვს გასაკეთებელი და დღეს ჩვენ გვაქვს ნაბიჯები გადასადგმელი,“_ განაცხადა თალაკვაძემ.
