პოლიტიკის ექსპერტმა, გია ხუხაშვილმა ,,გურია ნიუსთან“ გუშინ გამართულ საპარლამენტო უმრავლესობის სხდომაზე ისაუბრა. მისი თქმით, არასწორი იყო მოლოდინი იმის შესახებ, რომ მმართველი გუნდის სხდომაზე სამთავრობო ცვლილებების შესახებ გადაწვეტილება იქნებოდა მიღებული, რადგან, ხუხაშვილის თქმით, გუშინდელი ფორმატის შეხვედრაზე ასეთი ტიპის გადაწყვეტილებები არ მიიღება. ამასთან, ხუხაშვილს ,,გურია ნიუსმა“ ჰკითხა, რამდენად დამაჯერებელია ,,ქართული ოცნების“ წევრების განცხადებები იმასთან დაკავშირებით, რომ სამი საათის განმავლობაში მთავრობისა და მმართველი გუნდის წევრები გაეროს ბავშვთა ფონდის მიერ ჩატარებულ კვლევებსა და ქვეყანაში მიმდინარე პროცესებზე მსჯელობდნენ? როგორც ხუხაშვილი გვეუბნება, მმართველი გუნდის განცხადებები არადამაჯერებელია.
,,ინფორმაცია ჟონავდა, რომ საპარლამენტო უმრავლესობის სხდომაზე სამთავრობო ცვლილებებზე იქნებოდა საუბარი, ამიტომ როდესაც სხდომა დაინიშნა ყველამ ჩათვალა, რომ შეკრებაზე აღნიშნული გადაწყვეტილება იქნებოდა მიღებული, რაც მცდარი შეხედულება იყო, რადგან ამგვარ შეხვედრებზე ასეთი სახის გადაწყვეტილებები არ მიიღება. დავუშვათ სხდომაზე მთავრობის გადადგომაზე რომ ყოფილიყო საუბარი, თალაკვაძე უნდა გამოსულიყო და ამის შესახებ ესაუბრა? პრემიერ-მინისტრს ხომ უნდა შევუქმნათ იმის კომფორტი, რომ თავად ისაუბროს ამის შესახებ. ამასთან, საუბარი იყო მინისტრების გადადგომაზე, თუ პრემიერი აცხადებს, რომ უნდა გადადგეს, ცალკეულ მინისტრებზე საუბარი აზრს კარგავს, რადგან პრემიერის გადადგომა ისედაც იწვევს მთავრობის სხვა წევრების უფლებამოსილების შეჩერებას. არ გამოვრიცხავ, რომ გუშინ ,,ქართული ოცნების“ წევრებმა სამთავრობო ცვლილებებზე ისაუბრეს, მაგრამ, როგორც ჩანს, გადაწყვიტეს, რომ გარეთ არ გამოეტანათ ეს თემა, რაც, ვფიქრობ, სწორი გადაწყვეტილებაა. სხვა საკითხია, როგორ შეფუთეს და დააბრალეს სამსაათიანი განხილვა გაეროს ბავშვთა ფონდის კვლევას. ვფიქრობ, კითხვებს ძალიან მალე გაეცემა პასუხები. მესმის ცნობისმოყვარეობა, მაგრამ ცოტა უნდა დაველოდოთ. თუ ხელისუფლებას აქვს თვითგადარჩენის ინსტიქტი, სამთავრობო ცვლილებები აუცილებელად უნდა განახორციელოს, რადგან თუ სისტემური ცვლილებები არ დაიწყო, ხელისუფლებას დიდი პრობლემები შეექმნება“,_გვითხრა ხუხაშვილმა.
ცნობისთვის, გუშინ ,,ქართული ოცნების“ მთავარ ოფისში უმრავლესობის სხდომა გაიმართა, რომელსაც მთავრობის წევრები და ბიძინა ივანიშვილი დაესწრნენ. როგორც სხდომის დასრულების შემდეგ მმართველი გუნდის ლიდერებმა განაცხადეს, სხდომაზე სამთავრობო ცვლილებების შესახებ საუბარი არ ყოფილა.
