თავდაცვის მინისტრის პირველ მოადგილეს, ლელა ჩიქოვანს, სამინისტროდან 5 თვის განმავლობაში ანაზღაურების სახით 46549,11 ლარი აქვს მიღებული. აღნიშნულის შესახებ ჩიქოვანის ქონებრივ დეკლარაციაში წერია, რომელიც საჯარო სამსახურის ბიუროს ვებ-გვერდზე გამოქვეყნდა.
შენიშვნა: „გურია ნიუსის“ გუშინ გამოქვეყნებულ სტატიაში ეწერა _ „თავდაცვის მინისტრის პირველ მოადგილეს, ლელა ჩიქოვანს სამინისტროდან 4 თვის განმავლობაში ანაზღაურების სახით 46549,11 ლარი აქვს მიღებული, რაც საშუალოდ, თვეში, 11 637 ლარია“.
თავდაცვის სამინისტროდან მიღებული განმარტების თანახმად, ლელა ჩიქოვანმა უწყებაში მუშაობა 2016 წლის 2 აგვისტოს დაიწყო, შრომის ანაღაურება კი ამავე თვის ბოლოს მიიღო. აქედან გამომდინარე 46549,11 ლარი არის არა 4 თვეში მიღებული შემოსავალი, არამედ 5 თვის ანაზღაურება, რაც საშუალოდ თვეებზე გადანაწილებით 9309,82 ლარია.
დეკლარაციის შევსების მომენტში, ლელა ჩიქოვანს “საქართველოს ბანკის” მიმდინარე ანგარიშზე 6432,09 ლარი ჰქონდა; ამავე ბანკის ანაბარზე – 50,59 ლარი, ხოლო კიდევ ერთ მიმდინარე ანგარიშზე 5920,00 ლარი (-).
დეკლარაციაში ასევე აღნიშნულია, რომ ლელა ჩიქოვანს 2016 წლის მაისის ბოლოს, 2021 წლამდე, 61840,00-დოლარიანი იპოთეკური სესხი აქვს აღებული, რისთვისაც “საქართველოს ბანკისთვის” გასულ წელს 8911,20 დოლარი გადაუხდია. ხოლო 50 000-დოლარიანი იპოთეკური სესხი მას 2016 წლის აპრილში აუღია და ვადა 2022 წელს ეწურება, ვალის დასაფარად კი, ბანკისთვის 7009,42 დოლარი აქვს გადახდილი.
ქონებრივი დეკლარაციის მიხედვით, ლელა ჩიქოვანი ფლობს 2009 წელს შეძენილ (პრივატიზაცია) ბინას თბილისში, საექიმოს გასასვლელში, 38-ე კორპუსში, რომლის ფართობიც 131,83 კვ.მ.-ია.
ცნობისთვის, თავდაცვის მინისტრის პირველ მოადგილედ ლელა ჩიქოვანი 2016 წლის 3 აგვისტოს დაინიშნა.
თავდაცვის სამინისტროს ვებ-გვერდზე განთავსებული ინფორმაციით, ლელა ჩიქოვანი 2015 წლის აგვისტოდან 2016 წლის ივლისამდე – საქართველოს სახელმწიფო უსაფრთხოების სამსახურში ადმინისტრაციის უფროსის თანამდებობას იკავებდა.
აგვისტო 2015 – ივლისი 2016 _ თებერვალი 2015 – აგვისტო 2015 – ადმინისტრაციის უფროსი, საქართველოს შინაგან საქმეთა სამინისტრო;
2011-2015 – საერთაშორისო საზღვაო თანამშრომლობის სამმართველოს უფროსი, სანაპირო დაცვა, საქართველოს საზღვრის დაცვის პოლიცია, საქართველოს შინაგან საქმეთა სამინისტრო;
2010-2011 – საქართველოს შეიარაღებული ძალების გაერთიანებული შტაბის უფროსის მრჩეველი, საქართველოს თავდაცვის სამინისტრო;
2008-2010 – საქართველოს შეიარაღებული ძალების გაერთიანებული შტაბის J-5 სტრატეგიული დაგეგმვისა და სამხედრო პოლიტიკის დეპარტამენტის უფროსი;
2006-2008 – თავდაცვის ატაშე ლიტვის, ლატვიის, ესტონეთისა და პოლონეთის რესპუბლიკებში;
1998 – 2006 – საერთაშორისო ურთიერთობებისა და ევროატლანტიკური ინტეგრაციის დეპარტამენტი, საქართველოს თავდაცვის სამინისტრო.
რაც შეეხება მის განათლებას, როგორც სამინისტროს მიერ გამოქვეყნებული ინფორმაციიდან ირკვევა, ჩიქოვანს დამთავრებული აქვს აშშ-ის სამხედრო-საზღვაო ძალების უმაღლესი სკოლა (თავდაცვის სისტემის ანალიზი და ეროვნული უსაფრთხოება) მაგისტრის აკადემიური ხარისხით;
თბილისის სახელმწიფო უნივერსიტეტი (ეკონომიკა და მენეჯმენტი) მაგისტრის აკადემიური ხარისხით;
გაერთიანებული სამეფოს თავდაცვის აკადემია – თავდაცვის მართვა უსაფრთხოების ფართო კონტექსტში;
აშშ-ის სამხედრო-საზღვაო ძალების უმაღლესი სკოლა-თავდაცვის რესურსების მართვის კურსი;
ჯონ კენედის სახელობის ჰარვარდის უნივერსიტეტის მმართველობის სკოლა – შავი ზღვის უსაფრთხოების პროგრამა;
შვედეთის ეროვნული თავდაცვის კოლეჯი – ევროპის უსაფრთხოების პოლიტიკის გამოწვევები და სტრატეგიები;
გერმანიის ჯორჯ მარშალის უსაფრთხოების კვლევის ცენტრი – ლიდერობის პროგრამა; სტაბილურობის უსაფრთხოების, გარდამავალი პერიოდისა და რეკონსტრუქციის ოპერაციები;
საქართველოს ეროვნული თავდაცვის აკადემია – სპეციალური სამხედრო სწავლების პროგრამა.
მიღებული აქვს ლიტვის ეროვნული თავდაცვის სამინისტროს „ღირსების ორდენი”; შსს-ს ჯილდო, მედალი „უმწიკვლო სამსახურისათვის”;
მედლები „უმწიკვლო სამსახურისათვის” – (პირველი და მეორე ხარისხის ჯილდო) თავდაცვის სამინისტროდან.
ფლობს ინგლისური და რუსული ენებს.
