ლანჩხუთის მუნიციპალიტეტის სოფელ ჭყონაგორაში ადგილობრივი მოსახლეობის მიერ ძველი საცალფეხო ხიდის საყრდენების ჯართში ჩაბარების საქმით სამართალდამცავი სტრუქტურები დაინტერესდნენ. როგორც ირკვევა, ადგილობრივებმა ძველი ხიდის ჯართში ჩაბარება სოფელში არსებული პრობლემის მოსაგვარებლად გადაწყვიტეს, სოფლის ხელმძღვანელობასთან შეთანხმებით.
„ორი წლის წინ, ინფრასტრუქტურული პროექტით სოფელში წყალი გამოიყვანეს, მაგრამ მოხდა საოცრება, მშენებლობის დასრულებისა და ავტორიტეტული პირების მიერ მიღება-ჩაბარების აქტზე ხელმოწერის შემდეგ მაინც დაგვრჩა პრობლემა. სპეციალისტებთან საუბრის შემდეგ გაირკვა, რომ არსებობდა გამოსავალი, თუ სათავეს დაუყენებდნენ პრიმიტიულ ფილტრებს.
გავარკვიეთ, რომ არსებობდა ადამიანი, რომელიც ამ სამუშაოს ათას ლარად შეასრულებდა. მაგრამ სოფელში ფულის აკრეფა ძალიან ძნელი საქმეა. ამ დროს სოფელში მდინარე ფიჩორზე აშენდა ახალი ხიდი და მოხდა ძველი საცალფეხო ხიდის დემონტაჟი, რომელიც, თავის დროზე, სოფლის 
მცხოვრებლების გაკეთებული იყო. მოსახლეობამ გადაწყვიტა ამ ძველი ხიდის ჯართში ჩაბარება და ეს ფული უნდა გამოგვეყენებინა სათავე-ნაგებობის მოსაწესრიგებლად. მივმართავთ ადგილობრივ ხელისუფლებას, რომ ჩვენ, ხალხი ამას იმიტომ ვაკეთებდით, ჩავაბარეთ ჯართი და დავიწყეთ პრობლემის მოგვარება. ახლა კი სოფლის ხელმძღვანელობიდან ზოგი გამგეობაში დაიბარეს, ზოგიც _ პოლიციაში“, _ ნათქვამია სოფლის მოსახლეობის მიერ გავრცელებულ წერილში. მოსახლეობა არც საპროტესტო აქციის გამართვას გამორიცხავს.
_ „რა დააშავეს სოფლის თავკაცებმა? ან რატომ ხსნიან მათ სამსახურიდან, ნუთუ ჩალითაა ეს ქვეყანა დახურული?! თავი დაანებონ ამ ალალ–მართალ ბიჭებს, თორემ მოვაწყობთ საავტომობილო გზის პიკეტირებას და მოვიწვევთ ყველა ცენტრალურ ტელევიზიას“.
საზოგადოების გარკვეულ ნაწილში გავრცელებულია აზრი, რომ ეს ყველაფერი ნიგოითის ადმინისტრაციულ ერთეულში გამგებლის წარმომადგენლის ვასილ აბუსერიძის წინააღმდეგაა მიმართული. არსებული ინფორმაციით, მუნიციპალიტეტის პირველმა პირმა, ზაზა ურუშაძემ, დაახლოებით, ორი თვის წინ აბუსერიძეს მოსთხოვა განცხადების დაწერა თანამდებობიდან წასვლის შესახებ, თუმცა, აბუსერიძემ გამგებლის მოთხოვნა არ დაკმაყოფილა და პოსტი საკუთარი ნებით არ დატოვა. როგორც ამბობენ, მდგომარეობა გამგებელსა და სოფლის რწმუნებულს შორის მას შემდეგ დაიძაბა.
ზემონახსენებ ვერსიას ჩვენთან საუბარში ზაზა ურუშაძე აბსოლუტურ ტყუილს უწოდებს და ამბობს, რომ ამ საქმესთან არანაირი კავშირი არ აქვს.
„ტყუილია, არანაირად არ ჩავრეულვარ ამ საქმეში. პოლიცია დაადგენს რა მოხდა კონკრეტულად იქ, ქონების დატაცება თუ სხვა რამ. ჯართის ამბავზე მოსახლეობა იყო ჩემთან მოსული. მათი თქმით, აღნიშნული ქონება არავის საკუთრებას არ წარმოადგენდა. არადა, წესით ეს ქონება მუნიციპალიტეტის ან სახელმწიფოს საკუთრება იყო. რახან მუნიციპალიტეტის ბალანსზე არ იყო, ესეიგი სახელმწიფო საკუთრებას წარმოადგენდა და როცა აბუსერიძეს მოსახლეობამ მიმართა ამ საკითხთან დაკავშირებით, ის უნდა მოსულიყო და საქმის კურსში ჩაეყენებინა მუნიციპალიტეტი. ეს ამბავი მე პოლიციისგან არ უნდა გამეგო. ქონების მართვის სამსახური აიყვანდა ამ ქონებას ბალანსზე და ან სოფელს გადასცემდა, ანაც აუქციონის წესით გაასხვისებდა“, _ ამბობს ზაზა ურუშაძე.
რაც შეეხება ვასილ აბუსერიძისთვის განცხადების დაწერის მოთხოვნას პოსტის დატოვების თაობაზე, ამ ფაქტს მუნიციპალიტეტის გამგებელი არ ადასტურებს.
„ასეთ ფაქტს ადგილი არ ჰქონია, თუმცა, გარკვეული ხნის წინ მას შევთავაზე სპორტულ ცენტრში ფინანსისტად გადასვლა. მაშინ უარი მივიღე და ყველაფერი ამით დასრულდა“, _ ამბობს „გურია ნიუსთან“ საუბრისას ზაზა ურუშაძე.
ჩვენი ინფორმაციით, მუნიციპალიტეტის პირველ პირს აბუსერიძის შემცვლელი უკვე ჰყავს _ ზაზა წულაძე, რომელიც აბუსერიძის დანიშვნამდე ნიგოითის ადმინისტრაციულ ერთეულში გამგებლის წარმომადგენლის თანამდებობას იკავებდა. წულაძის პოსტი ორი წლის წინ ნიგოითში არსებულ „იუსტიციის საზოგადოებრივ ცენტრში“, სადაც, ასევე, განთავსებულია სოფლის ადმინისტრაციაც, იუსტიციის მინისტრის, თეა წულუკიანის მოულოდნელ ვიზიტს ემსხვერპლა. მინისტრის წყრომა თავს გამგებლის წარმომადგენელს იქ არსებული შინაგანაწესის დარღვევის გამო დაატყდა. მაშინ გავრცელებული ინფორმაციით, სწორედ წულუკიანის დაჟინებული მოთხოვნის გამო აიძულეს წულაძე, რომ საკუთარი განცხადების საფუძველზე წასულიყო.
რაც შეეხება ზაზა წულაძის ძველ პოსტზე შესაძლო დაბრუნებას, ზაზა ურუშაძის თქმით, ამასთან დაკავშირებით ჯერ გადაწყვეტილება არ მიუღია.
„ვასილ აბუსერიძე ისევ რჩება თანამდებობაზე, პოლიცია გაარკვევს რა და როგორ იყო, მე წინასწარ უდანაშაულობის პრეზუმციას ვერ დავარღვევ. ისე კი, ყველა სოფელში მოსახლეობასთან შეთანხმებით ვნიშნავ სოფლის ხელმძღვანელს და ასე იქნება სამომავლოდაც“, _ თქვა ურუშაძემ.
