“თავი ვერ მოაბეს _ ეს ტენტერია” _ რატომ საყვედურობენ მშობლები ოზურგეთის სააღმზრდელო ცენტრს

ქალაქ ოზურგეთის #1 და #9 საბავშვო ბაღებში ერთი კვირით სააღმზრდელო პროცესი შეჩერებულია. ამის შესახებ “გურია ნიუსს“ რამდენიმე მშობელმა აცნობა.

“არდადეგების შემდეგ ვიცოდი, რომ განახლდებოდა სააღმზრდელო პროცესი და არ დაიწყო. გავიგეთ, რომ ტენდერი ახლა დასრულებულა, რის შემდეგ დაიწყეს სარემონტო სამუშაო. ეს ტენდერია კი არა, ტენტერია. არ შეიძლება უფრო ეფექტურად და პროფესიონალურად მოხდეს სარემონტო სამუშაოების დაგეგმვა და შესრულება?! “ _ გვითხრა ერთ-ერთი ბავშვის მშობელმა.

#9 საბავშვო ბაღის ერთ-ერთი მშობელი “გურია ნიუსმა“ საუბრისას აღნიშნავს, რომ შენობა, მალე თავიდან იქნება გასარემონტებელი:

“კარგი საქმის გაკეთება გვინდაო და თავი ვერ მოაბეს საქმეს. ნორმალური დაგეგმვა არ იცია. ზამთრის არდადეგებზე ვერ მოავასწარითო _   ზაფხულში რომ დაწყებულიყო სამუშაოები, არ შეიძლებოდა? ერთი კვირით მოხსნეს ბაღი.  სწავლა რომ დაიწყება, საღებავის სუნი როდის გავა, კაცმა არ იცის!  და რაც მთავარია, კიდევ სარემონტო იქნება ეს ბაღი, რადგან სანტექნიკის პრობლემაცაა, რამდენადაც ვიცი. ისეთი შეგრძნება გვაქვს, რომ ბავშვებზე და დასაქმებულ მშობლებზე არავის უფიქრია. სავარაუდოდ, ფული ჰქონდათ დასახარჯი და ეს გამოსავალი ნახეს“, _ გვითხრა მშობელმა.

ოზურგეთის მუნიციპალიტეტის სკოლამდელი აღზრდის ცენტრის ხელმძღვანელი მაკა ჭყონია ამბობს, რომ პირველი ტენდერი ჩაუვარდათ, რამაც გარკვეული სახის პრობლემები შექმნა:

„პირველი ტენდერი ჩავარდა, შემდეგ ჩატარდა მეორე ტენდერი, რის შემდეგ მოხდა გამარჯვებულების დისკვალიფიკაცია და დროში გაიწელა ეს პროცესები. როდესაც ყველა პროცედურა დასრულდა, გამარჯვებულმა კომპანიამ დაიწყო ბაღებში სარემონტო სამუშაოების შესრულება. გვინდოდა არდადეგების პერიოდში დასრულებულიყო ყველა სარემონტო სამუშაოები, მაგრამ არ მოხერხდა, ამიტომ იძულებულები ვართ ახლა მოხდეს ამ სამუშაოების ჩატარება.“ _ აღნიშნა ჭყონიამ.

მისივე თქმით, იმ მშობლებს, რომლებიც დასაქმებულები არიან,  ბავშვების სხვა ბაღში გადაყვანა შეთავაზეს:

“ვისაც აქვს ბავშვის დატოვების პრობლემა, რადგან მუშაობენ,  შევთავაზეთ მესამე საბავშვო ბაღში მიეყვანათ შვილები სარემონტო სამუშაოების დასრულებამდე. რამდენიმე მშობელს უკვე დავეხმარეთ ამ პროგრამით. მინდა გითხრათ, რომ ერთ კვირაში ეს სამუშაოები დამთავრდება და სააღმზრდელო პროცესი #1 და #9 საბავშვო ბაღში ჩვეულებრივ რეჟიმში აღდგება,“ _ აღნიშნა მაკა ჭყონიამ.