დღეს, ოზურგეთის მუნიციპალიტეტის სოფელ ჭანიეთში 13 ასურელი მამის სახელობის ტაძარი გაიხსნა. ტაძარი შემოქმედის მიტროპოლიტმა, მეუფე იოსებმა აკურთხა.
ადგილობრივი მრევლი უდიდესი სიხარულით შეხვდა ამ ნანატრ დღეს, რადგან ტაძრის მშენებლობა 30 წლის წინ დაიწყო.
_ 30 წელია, ეს ტაძარი შენდება და დღიდან საძირკვლის ჩაყრისა, ძირითადად, ეს მოხდა ხალხის ძალისხმევით, მათი ფინანსური თანადგომით თუ ფიზიკური და გონიერი შრომით. ხალხი, დაწყებული 5 თუ ათი ლარის შეგროვებით და დამთავრებული სოლიდური შემოწირულობით, მუდამ ცდილობდა, თუნდაც ერთი კენჭი შემატებოდა მშენებლობის საქმეს. არ დამავიწყდება მამა ფილიმონის შეგონება, რომელმაც მიიხმო სოფლის ბიჭები და მიმართა, თუნდაც 50 ლარით დავიწყოთ და უფლის სიყვარულით საქმე გამოვაო. მისი კურთხევით დაიწყო ეს ყველაფერი.
რა თქმა უნდა, დიდია, როგორც სასულიერო, ისე სახელმწიფო მოხელეების ღვაწლი. ბევრი დაპირება გვახსოვდა ყველა არჩევნებზე, 1990 წლიდან და ამ მხრივ, ოზურგეთის მუნიციპალიტეტის ყოფილმა მერმა, კოტე შარაშენიძემ განსაკუთრებული ნაბიჯი გადადგა _ ქვიშით, ცემენტით, საშენი მასალით თუ მანქანით, უდიდესი თანადგომა გაგვიწია. პირველი სართულის მშენებლობა, საძირკვლის ჩასხმით დაწყებული, ჭანიეთელი ახალგაზრდების დათო ბერიძის, ზურაბ ცინცაძის, დათო მჟავანაძის დიდი მონდომებით მოხდა. მათ გვერდით იდგა თითოეული ჭანიეთელი.
შემდგომ ეტაპზე ასევე უდიდესი დახმარება გაგვიწია არჩილ თალაკვაძემ, ოზურგეთის მუნიციპალიტეტის მერმა ავთანდილ თალაკვაძემ, ბიზნნესმენმა ვანო ჩხარტიშვილმა. მათი ძალისხმევით, საბოლოოდ, მოხდა ის, რომ ტაძარმა დასრულებული სახე მიიღო. დღეს, 2022 წლის 3 დეკემბერს, უფლის ნება ასრულდა! საერთოდ კი, ხალხმა, პოლიტიკური თანამდებობის თუ სასულიერო პირებმა მოახერხეს ის, რომ ერთი ნიშნით, ჩვენი სულიერი მრწამსით გაერთიანებულიყვნენ. ეს შედეგიც ამიტომ დადგა, _ გვითხრა ჭანიეთის მკვიდრმა, ტაძრის მშენებლობის საქმის უპირველესმა ორგანიზატორმა ნაზი მამინაშვილმა.
„ბედნიერი დღეა. ყველანი მოხარული ვართ, რომ ჩვენს სოფელში უფლის სახლია. ამიერიდან ყოველ შაბათ-კვირას აღევლინება წირვა-ლოცვა. დიდება უფალს, მრავალჟამიერ!“_ ამბობენ ჭანიეთელები: ზოია პატარავა, ბაჩი მამინაშვილი, გელა ქავთარაძე, ირაკლი რამიშვილი და სხვები, რომლებიც მრევლს წარმოადგენენ.
ისინი განსაკუთრებულ მადლიერებას თანასოფლელ ნაზი მამინაშვილის მიმართ გამოთქვამენ:
_ სასწაული შეძლო. ახალგაზრდობის ასაკიდანვე უფლის სამსახურში ჩადგა. მშენებლობისთვის განკუთვნილი თანხა მხოლოდ მისი ძალისხმევით გროვდებოდა და ერთი თეთრი არ გაბნეულა მის ხელში. 30 წელია, მამინაშვილების ოჯახი, საკუთარი ოჯახიდან უმეტესი წილის გაღებით, ტაძრის მშენებლობის საქმეს თაოსნობს და მათი სისპეტაკე და ქრისტესმიერი სიყვარული გახდა საფუძველი, ხალხი გაერთიანებულიყო და ტაძარი აშენებულიყო! _ ამბობენ აქ.
„გილოცავთ, ამ შესანიშნავ დღეს!“- თქვა „გურია ნიუსთან“, სახელმწიფო რწმუნებულმა გურიის მხარეში, გიორგი ურუშაძემ.
მალე, „გურია ნიუსი“ ვრცლად შემოგთავაზებთ, სოფელ ჭანიეთში 13 ასურელი მამის სახელობის ტაძრის მშენებლობის ამბავს. აღსანიშნავია, რომ საქართველოში 13 ასურელი მამის სახელობის კიდევ მხოლოდ ორი ტაძარია.
ავტორი
