ოზურგეთში, დაბა ანასეულში, იმედაშვილის ქუჩაზე მცხოვრებ მარტოხელა პენსიონერს, ლუიზა სალუქვაძეს, როგორც თავად ამბობს, ყველანაირი გასაჭირი მოადგა კარს _ განგებამ, თითქოს, მისთვის მოიცალა.
_ მეუღლე ადრე გარდამეცვალა. ორი შვილი მყავდა და როგორ წარმოვიდგენდი, რომ ორივეს სიკვდილს მოვესწრებოდი. ცოცხალი როგორ დავრჩი, მიკვირს, თუმცა, შვილიშვილის ხათრით ვაგრძელებ სიცოცხლეს.
მერიდება მუდამ გამგეობაში სირბილი და დახმარებაზე თხოვნა, განცხადებების წერა… თუმცა, იმდენად დაზიანებულია სახურავი, ყველა ოთახში, ყველა კუთხეში წყალი ჩამოდის. ჭერი ჯერ არ ჩამოვარდნილა, თუმცა, მალე ეგეც ჩამოვარდება.
ლუიზა სალუქვაძის სახლში ჭერი საცაა ჩამოვარდება
სახლს გარედან რომ შეხედავ, კარგ ფორმაშია, თუმცა, ძველზე ძველი შიფერი საცერივით ატარებს წვიმას, _ გვიამბობს ლუიზა სალუქვაძე და ყოველი წინადადების შემდეგ, ბოდიშს იხდის. ამბობს, რომ “ასე რომ არ წასვლოდა საქმე” არავის შეაწუხებდა.
“მერიდება სამჯერ და ოთხჯერ ერთსა და იმავე საქმეზე მერიაში მისვლა”, _ ამბობს ქალბატონი ლუიზა.
როგორც ჩვენი რესპონდენტი გვიყვება, ოზურგეთის მუნიციპალიტეტის მერიაში მისთვის უარი არასდროს უთქვამთ. ბევრჯერ დაპირდნენ დახმარებას, თუმცა, ჯერჯერობით, ცვლილება არ ჩანს _ სახლი კვლავ გადაუხურავია.
_ მერიდება საუბარი. მერის მოადგილე, ირაკლი სირაძე გულწრფელად შეწუხდა. იცის ჩემი პრობლემის შესახებ. დამპირდა, რაღაც ღონეს ვიხმართ და დაგეხმარებითო.
ისიც ვიცი, რომ პანდემიაა და სახლი კი არა, ხალხი იხოცება, ახალგაზრდები. რა ვიცი, იქნებ, მოხერხდეს რაიმე, ძალიან ცუდ დღეში ვარ _ ჩამოვარდება ჭერი სადაცაა… _ გვეუბნება ქალბატონი ლუიზა.
ლუიზა სალუქვაძის მეზობლები წუხან მისი მდგომარეობის გამო.
_ საშინელება დაემართა. ორი ვაჟკაცი რომ დედას ზედიზედ მოუკვდება, თავი რომ არ მოიკლა, გვიკვირს. ამიტომ არის ცოდვა და განსაკუთრებით საყურადღებო. არც პრეტენზიული არაა. პირიქით, ძალიან მორიდებული ქალბატონია, მაგრამ წვიმაში უნდა ნახოთ, როგორ ჟონავს ჭერის ყველა წერტილში წყალი. თითქოს საცერში გამოდის. თუ რაიმე დახმარება მოხერხდება, მეტი მადლი არ უნდათ, _ გვითხრეს მეზობლებმა _ გოგონა სალუქვაძემ და შალვა თადუმაძემ.
“გურია ნიუსი” ამ საკითხზე ოზურგეთის მუნიციპალიტეტის მერის მოადგილეს, ირაკლი სირაძეს ესაუბრა.
_ მე ვიყავი მასთან. ვიცი ქალბატონ ლუიზა სალუქვაძის მდგომარეობა. სახლის სახურავი მართლაც შესაცვლელია. ამ ქალბატონს ისეც მძიმე ხვედრი ხვდა წილად. ვწუხვარ. ძალიან მინდა, როგორმე დავეხმაროთ.
თუმცა, კარგად არის ცნობილი, წელიწადზე მეტია, პანდემიის პირობებში ვცხოვრობთ. ბიუჯეტში ცვლილებები ხდება. მე ვერ გეტყვით კონკრეტულ რიცხვს, როდის დავეხმარებით მას სახლის გადახურვის საქმეში, თუმცა, მაქსიმალურად ვეცდებით, როგორც კი საშუალება გაჩნდება, პირველივე შემთხვევაში დავეხმაროთ, _ გვითხრა ირაკლი სირაძემ.
სირაძის თქმით, დღის წესრიგში იდგა ქალბატონი ლუიზა სალუქვაძის დახმარების საკითხი, თუმცა, პანდემიამ, სამწუხაროდ, ყველგან გამოიწვია ცვლილებები.
_ არა მარტო ქალბატონი ლუიზა, სხვებიც გვყავს _ ძალიან გაჭირვებული ადამიანები, როგორც სოციალურად, ისე ბევრნაირი გასაჭირით. ჩვენი მოვალეობა სწორედ მათზე ზრუნვა და დახმარებაა, თუმცა, ცოტა უნდა დაგველოდონ. იმედია, სასიკეთო ძვრები იქნება და დავეხმარებით, _ გვითხრა ირაკლი სირაძემ.
ავტორი: მარინა ჩიხლაძე
