12 წლის ავთუკა ხომერიკი ინტერნეტ-ტელევიზიის “TV 2“-ის დამფუძნებელი, არაერთი გადაცემის წამყვანი, ჟურნალისტი და ოპერატორია. ავთუკა ოზურგეთის მუნიციპალიტეტის სოფელ შრომაში დედ-მამასთან ერთად ცხოვრობს. ის შრომის საჯარო სკოლის საუკეთესო მოსწავლეა.
ავთუკა ხომერიკმა “გურია ნიუსის“ კითხვებს უპასუხა.
_ რატომ გადაწყვიტე, რომ გამხდარიყავი ჟურნალისტი?
_ ეს გადაწყვეტილება მივიღე 2015 წელს. 2017 წელს კი დავიწყე გადაცემების გაკეთება და შემდეგ სოციალურ ქსელში განთავსება. ზუსტად, მეც არ ვიცი, რატომ მივიღე ეს გადაწყვეტილება. ძალიან მინდოდა გამოვჩენილიყავი ტელევიზორში და საინტერესო ამბები მომეყოლა საზოგადოებისთვის. ეს ამბები მთელი გურიიდან არის და ასევე, საინფორმაციო გვაქვს მთელი ქვეყნის და მსოფლიოს გარშემო მომხდარ ამბებზე.
_ სკოლის პერიოდში, როგორ ახერხებ მუშაობას?
_ მაგ პერიოდში, გადაღებები გვაქვს შაბათ-კვირას. ზაფხულში უფრო მეტად ვაქტიურობთ.
_ რატომ ტვ2?
_ 2015 წელს დავაარსე ტვ1, მაგრამ რატომღაც არ იყო პოპულარული და არც დიდი ნახვები ჰქონდა ინტერნეტში. შემდეგ, ბევრი რამ ვისწავლე და დავიწყე ტვ2-ზე აქტიურად გადაცემების ჩაწერა. მინდა გითხრათ, რომ თითქმის ყველაფერს მე ვაკეთებ. გადაღებაც ვიცი, მონტაჟი და ა.შ. არაერთი აპლიკაცია მაქვს გადმოწერილი ინტერნეტიდან და ამის დახმარებით ვწერთ ვიდეოებს.
_ ვიცი, რომ მარტო არ ხარ. გაგვაცანი შენი გუნდი?
_ მარიამ ხომერიკს მე შევთავაზე ტელევიზიაში დაეწყო მუშაობა, შემდეგ კი შემოგვიერთდა ლუკა ხომერიკი, ანანო ჯაბუა, ლევან ბოლქვაძე, სანდრო ჯაბუა. მათ გადანაწილებული აქვს ახალი ამბების, ამინდის და სპორტის შესახებ ინფორმაციის მიწოდება მაყურებლისთვის.
_ სოფლის და რეგიონის პრობლემებზე თუ აკეთებთ სიუჟეტებს?
_ ამ ეტაპზე არ გაგვიკეთებია, მაგრამ ახალ სეზონზე აუცილებლად გვექნება.
_ სკოლა?
_ ჩემი აზრით, შრომის საჯარო სკოლაში ყველაფერი კეთდება, რომ ბავშვებმა კარგი განათლება მივიღოთ. კარგი იქნება მანდატური თუ გვეყოლება.
_ გადაწყვეტილი გაქვს მომავალში, რა პროფესიას აირჩევ?
_ მინდა, რომ ტელეწამყვანი გამოვიდე.
_ რომელი ქართველი ტელეწამყვანი მოგწონთ?
_ ლევან ჯავახიშვილი, დიანა ტრაპაიძე, ნინო თოლორდავა, ეთუნა ინწკირველი. ეს, არ არის სრული სია.
_ ბოლო დროს განვითარებულ მოვლენებზე რას გვეტყოდით? საუბარი მაქვს ქართულ მედიაში მომხდარ ამბებზე.
_ არ ვაშუქებთ მსგავს ამბებს, ჩვენი ასაკიდან გამომდინარე, მაგრამ პირადად ყველა ინფორმაციას ვეცნობი, რა ხდება ქართულ მედიაში და საერთოდ, ქვეყანაში. ჩემი აზრით, კარგი იქნებოდა ბევრი დამოუკიდებელი ტელევიზია იყოს საქართველოში.
_ ფინანსურად ვინ გეხმარება, რომ სიუჟეტები მოამზადო და სხვადასხვა ადგილიდან მოიპოვო?
_ ყველაფერში დედ-მამა მეხმარება.
_ ადგილობრივ პრესას, ტელევიზიას თუ ადევნებ თვალს?
_ რა თქმა უნდა. მინდა ვთქვა, რომ ყველაზე პოპულარული პრესა და ტელევიზია გურიაშია. აქტიური ჟურნალისტები მუშაობენ ჩვენს რეგიონში.
_ რა რჩევებს მოგცემდით უფროსს კოლეგებს?
_ მე რჩევებს ვერ მოგცემთ, რადგან ჯერ, არ ვარ იმ ასაკის, რომ თქვენ მოგცეთ რჩევები.
_ რა თემები გინდა იხილოთ გაზეთის ყველა ნომერში და სატელევიზიო ბადეში?
_ უფრო მეტი განათლებაზე რომ დაიწეროს და ასევე, სოფლის შესახებ.
