პრემიერის მიერ ინიცირებულ პროგრამა “განახლებულ რეგიონებს” გურიაში კომპანია “საბა კონსტრაქშენი” გააგრძელებს. ტენდერი, რომელიც ცოტა ხნის წინ, საქართველოს მუნიციპალური განვითარების ფონდმა გამოაცხადა, სწორედ ამ კომპანიამ მოიგო.
სატენდერო კომისიის სხდომა ჩატარდა თბილისში, საკონფერენციო კავშირის მეშვეობით.
სატენდერო კომისიის სხდომაზე დამსწრე პირები გაეცნენ „სახელმწიფო შესყიდვების შესახებ“ საქართველოს კანონის მე-8 მუხლში აღწერილ ინტერესთა კონფლიქტის პირობებს და ოქმზე ხელმოწერით დადასტურეს, რომ სსიპ საქართველოს მუნიციპალური განვითარების ფონდის გამოცხადებულ ელექტრონულ ტენდერში (NAT220025984) მონაწილე პრეტენდენტის მიმართ არ აქვთ ინტერესთა კონფლიქტი
მათ მოისმინეს სატენდერო კომისიის აპარატის წევრის ირაკლი თუშურაშვილის ინფორმაცია – NAT220025984 ელექტრონულ ტენდერში ერთიანი ელექტრონული სისტემის მეშვეობით მონაწილე ყველაზე დაბალი სატენდერო წინადადების ფასი წარმოდგენილი იქნა შპს „საბა კონსტრაქშენ“-ის მიერ, პრეტენდენტის მიერ სახელმწიფო შესყიდვების ერთიან ელექტრონულ სისტემაში დააფიქსიებული საბოლოო ფასი შეადგენს 301 842.91 ლარს.
რაც შეეხება კომპანიის გამოცდილებას, სატენდერო კომისიის სხდომის ოქმის მიხედვით: “სატენდერო დოკუმენტაციის 2.2.1. პუნქტით (მოთხოვნა პრეტენდენტის გამოცდილების შესახებ) განსაზრვრული კომპონენტი N2-ით გათვალისწინებული მინიმალური მოთხოვნის დაკმაყოფილების მიზნით სახელმწიფო შესყიდვების ერთიან ელექტრონულ სისტემაში CMR200047764 მოდულში ატვირთული დოკუმენტაციისა და ინფორმაციის შესწავლით დადგინდა, რომ შპს „სპორტმშენსერვისი“ და შპს „საბა კონსტრაქშენ“-ის შორის 2020 წლის 29 თებერვალს გამფორმებული N35 ხელშეკრულების ფარგლებში შპს „საბა კონსტრაქშენ“-ს შესრულებული აქვს ქ.თბილისში, უნივერსიტეტის ქუჩა N15ა-ში (ს/კ 01.14.04.030.044) 10,000 მაყურებელზე გათვლილი მრავალფუნქციური სპორტული ობიექტის სამშენებლო სამუშაოები, რაც აკმაყოფილებს მშენებლობის ნაწილში საკვალიფიკაციო მოთხოვნას (სპორტული ობიექტები განეკუთვნება საზოგადოებრივ შენობებს, რაც სამოქალაქო შენობების კერძო შემთხვევაა), ხოლო შესრულებული სამუშაოების საბოლოო ღირებულაბამ, მხარეთა შორის 2022 წლის 24 აგვისტოს გაფორმებული საბოლოო მიღება-ჩაბარების ატქის თანახმად შეადგინა 89,812,804.6 ლარი. სახელმწიფო შესყიდვების ერთიან ელექტრონულ სისტემაში ხელშეკრულებას მინიჭებული აქვს სტატუსი: „შესრულებული ხელშეკრულება“. შესაბამისად დადგინდა, რომ შპს „საბა კონსტრაქშენ“-ს 2017 წლის 1 იანვრიდან ელექტრონული ტენდერისათვის „წინადადებების მიღება დასრულებულია“ სტატუსის მინიჭების თარიღამდე პერიოდში საქართველოს ტერიტორიაზე ერთი დასრულებული ხელშეკრულების ფარგლებში შესრულებული აქვს სამოქალაქო დანიშნულების შენობ(ებ)ის მშენებლობის სამუშაოები, ხოლო მიწოდებული სამუშაოების ღირებულება აღემატება სატენდერო პირობებით მოთხოვნილ 12 000 000 ლარს”.
კითხვაზე, როდის უნდა განახლდეს პრემიერის მიერ ინიცირებული პროგრამა ჩოხატაურში, მერი დავით შარაშიძე გვპასუხობს, რომ გამარჯვებული გამოვლინდა, თუმცა ჯერ შეთანხმება გაფორმებული არ არის.
“გამარჯვებული გამოვლენილია. გაიმარჯვა “საბა კონსტრაქშენმა” Design-Build-ის მეთოდით. როდესაც ხელშეკრულება დაიდება ამ კომპანიასთან, ჩამოვლენ ამ კომპანიის წარმომადგენლები, დაიწყებენ იმის პროექტირებას, რაც დაანონსებული გვქონდა, რომ “განახლებული რეგიონის” ფარგლებში ჩაუტარდებოდა რეაბილიტაცია”,_ გვითხრა შარაშიძემ.
ინფორმაციისთვის, პრემიერის ინიცირებულ პროგრამას გურიაში კომპანია “აღმაშენებელი ქუთაისი” ახორციელებდა, თუმცა არაჯეროვნად შესრულებული სამუშაოების გამო, კომპანიასთან ხელშეკრულება შეწყდა.
სამუშაოები, რომელსაც 4-წლიანი უპრეცედენტო პროგრამა ითვალისწინებს, პრემიერმა ერთხელ მოინახულა.
ცნობისთვის, პროგრამა, საქართველოს 63 მუნიციპალიტეტს მოიცავს და მისი მხოლოდ პირველი ეტაპის საორიენტაციო ღირებულება 500 მილიონი ლარია. ის ითვალისწინებს რეგიონების ურბანულ განახლებას, რაც სახელმწიფოს, მუნიციპალიტეტის და კერძო საკუთრებაში არსებული მნიშვნელოვანი ობიექტის განვითარებას გულისხმობს.
პროექტები ხორციელდება როგორც სახელმწიფო ბიუჯეტის დაფინანსებით, ისე საერთაშორისო საფინანსო ინსტიტუტების მხარდაჭერით.
პროგრამის ფარგლებში, ლანჩხუთში უკვე დასრულდა ლანჩხუთის ცენტრალური მოედნის რეაბილიტაცია, რომლის ფარგლებშიც, განახლდა 12 შენობა და 13 000 კვმ-ის ფართობის ცენტრალური სკვერი. სამუშაოები მოიცავდა მიმდებარე ტერიტორიის ქვაფენილით მოპირკეთებას, გამწვანებას, ტროტუარებისა და საპარკინგე ზონების მოწყობას.
ოზურგეთში რეაბილიტაცია ჩაუტარდა ცენტრალურ მოედანს და 1 შენობას. შესასრულებელია კიდევ 1 შენობის სარეაბილიტაციო სამუშაოები.
ჩოხატაურში დასრულებულია 14 შენობის განახლება. განახლებულია დუმბაძის ქუჩაზე არსებული შენობები, ტროტუარები, გაზონები და 1 სკვერი. რეაბილიტაცია ჩაუტარდება ბაზრის შენობას, მოეწყო ბაზრის მიმდებარე ტერიტორია და 2 პარკი (ე. წ. რამიშვილისა და დუმბაძის პარკები).
რაც შეეხება ქალაქის ცენტრალური მოედნის რეაბილიტაცია-რეკონსტრუქციის სამუშაოებს, პროექტი ითვალისწინებს მოედანზე 4 000 კვმ ცენტრალური პარკის მოწყობას, სადაც განთავსებული იქნება მოსასვენებელი და სხვადასხვა აქტივობებისთვის განკუთვნილი სივრცეები, ავტოსადგომები, ბილიკები და სხვადასხვა ტურისტული მომსახურების ობიექტები.
ავტორი
