ოზურგეთის თეატრში კვლავ გრძელდება ახალგაზრდებისთვის სათეატრო საქმიაობისთვის სივრცის გამოყოფის და მათი შემოქმედებითი რეალიზაციისთვის სპეციალური პროგრამა. ეს ინიციატივა თეატრის სამხატვრო ხელმძღვანელს ვასილ ჩიგოგიძეს ეკუთვნის.
ამჯერად, დამდგმელი ჯგუფი მთლიანად ახალგაზრდა ხელოვანებისგან არის დაკომპლექტებული. სპექტაკლის რეჟისორი ირაკლი გურგენიძეა, 2016 წლის საუკეთესო დებიუტანტი რეჟისორი. ახალგაზრდა რეჟისორმა შემოქმედებითი ჯგუფიც ახალგაზრდებით დააკომპლექტა. მან სამუშაოდ ახალგაზრდა წარმატებული მხატვარი სერგეი შივცი მიიწვია. პიესის ავტორიც ახალგაზრდა დრამატურგი ზურა პაპიაშვილია, რომელსაც თეატრალური საზოგადოება სხვადასხვა კონკურსებიდან და პროექტეიბიდან იცნობს. მისი პიესები დადგმულია რუსთაველის და მარჯანიშვილის თეატრის სცენებზე. ამჟერად, მისი პიესა პირველად იდგმება რეგიონში და ეს ოზურგეთის თეატრი აღმოჩნდა.
ირაკლი გურგენიძემ ზურაბ პაპიაშვილის ერთმოქმედებიან კომიკური ჟანრის პიესაზე „თეფში” შეაჩერა არჩევანი, რომელიც აბსურდის ელემენტებითაა გაჯერებული. სპექტაკლში ოზურგეთის თეატრის გამორჩეული და წამყვანი მსახიობები ბელა კიკვაძე, ვერიკო ხუხუნაიშვილი, ნინო ჯუღელი, თემურ კვირკველია და გიორგი დოლიძე მონაწილეობენ. სასცენო მოძრაობაზე კი მარიკა ქვეითაია მუშაობს.
სპექტაკლისთვის ოზურგეთის თეატრისთვის აქამდე უჩვეულო სცენოგრაფია შეიქმნა, რომელიც გამორჩეულია, როგორც ტექნიკური, ასევე, ვიზუალური და კონცეპტუალური თვალსაზრისითაც. პიესა გარდაცვლილი გოგის ისტორიას მოგვითხრობს, რომელსაც ცოლები გარდაცვალების შემდეგაც, საიქიოშიც არ ასვენებენ. მაყურებელს სახალისო და სევდიანი ისტორის ხილვა ელის წინ.
ირაკლი გურგენიძის სპექტაკლი თბილისში, მოზარდმაყურებელთა თეატრში 29 ოქტომბერს იქნება წარმოდგენილი და თბილისელ მაყურებელს ახალგაზრდების მორიგი ექსპერიმენტის ხილვის საშუალება მიეცემა.
