ორგანიზაცია “თავისუფლების მოედანი” წინააღმდეგობის მოძრაობას იწყებს. ამის შესახებ სიმონ ჯანაშიამ ჟურნალისტებს დედაენის ბაღში გამართულ საინფორმაციო შეკრებაზე უთხრა.
“სიმბოლურია რომ აქედან ვიწყებთ მოძრაობას. 46 წლის წინ, როდესაც რუსთაველზე წავიდნენ აქედან ბავშვები, მათ შევარდნაძემ მიმართა:- რას შვებით ბავშვებო? მათ უპასუხეს: – ჩვენ შენი ბავშვები არ ვართ და ჩვენ არ ვართ ის ბავშვები, რომლებსაც სჭირდებათ ცეკა-ს მდივნები, რომ უკარნახონ, როგორ უნდა იცხოვრონ. ჩვენ ვართ თავისუფალი მოქალაქეები და ამიტომ ვიწყებთ წინააღმდეგობის მოძრაობას”,_ განაცხადა ჟურნალისტებთან საუბრისას სიმონ ჯანაშიამ.
ჯანაშიას თქმით, მოძრაობის მიზანი იქნება 26 ოქტომბრის საპარლამენტო არჩევნებში არსებული სავარაუდო დარღვევების გამოვლენა და იმ ადამიანების იდენტიფიცირება, რომლებიც გაყალბების სქემაში მონაწილეობდნენ.
“ჩვენ ვიმოქმედებთ ქუჩებშიც, აუდიტორიებში, პარკებში, საქართველოს სოფლებშიც. იდენტიფიცირებას გავუწევთ იმ ადამიანებს ვინც მონაწილეობდა ამ გაყალბებაში. შევზღუდავთ ხელისუფლების წევრების მოქმედებებს. საჯარო სივრცეში ჩავატარებთ ახალი ტიპის აქციებს. ეს არ იქნება მხოლოდ მასობრივი აქციები, რუსთაველზე აქციები, ეს იქნება აქციები, რომელიც დაანახებს ადამიანებს იმას, თუ რა მოხდა საქართველოში და რატომ არის მნიშვნელოვანი ამაზე მათი რეაგირება.
ვიკრიბებით ხვალ, მზიურის პარკში, 19:00 საათზე. გვინდა, რომ ყველა ჩვენს მეგობარს და თანამოაზრეს, თავისუფალ მოქალაქეს ვუთხრათ, რომ შემოგვიერთდეს იმისთვის, რომ ვიმსჯელოთ შემდეგ ნაბიჯებზე,” _ განაცხადა სიმონ ჯანაშიამ.
