მესხეთის (ახალციხის) პროფესიული სახელმწიფო დრამატული თეატრის სტუმრობის შემდეგ ალექსანდრე წუწუნავას სახელობის ოზურგეთის დრამატულ თეატრს კოტე მარჯანიშვილის სახელობის თეატრის დასი სტუმრობდა.
ოზურგეთის თეატრის სცენაზე ლევ ტოლსტოის “კრეიცერის სონატა“ ვიხილეთ, რომელიც ლევან წულაძის და თემო კუპრავას რეჟისორობით დაიდგა.
სპექტაკლის პრემიერა 2020 წლის სექტემბერში მარჯანიშვილის თეატრში შედგა და მაყურებლის დიდი მოწონება დაიმსახურა.
ლევ ტოლსტოის მოთხრობა “კრეიცერის სონატა“ 1890 წელს გამოქვეყნდა და მყისვე მეფის ხელისუფლების ცენზურას დაექვემდებარა. იგი, ერთის მხრივ, თავშეკავების იდეალს ქადაგებს, მეორეს მხრივ კი ეჭვიანობით გამოწვეულ რისხვას აღწერს. თანამედროვე კრიტიკოსთა შეფასება არაერთგვაროვანი იყო, უკიდურესად უარყოფითიდან უაღრესად პოზიტიურამდე. მეცხრამეტე საუკუნეში დაწერილი მოთხრობა დღესაც არ კარგავს აქტიურობას.
სპექტაკლი მოგვითხრობს ერთი მდიდარი ცოლ-ქმრის ამბავს… მათ სინამდვილეში ცხოვრებაში იდეალურად უნდა ეცხოვრათ, მაგრამ ეს, ასე არ მოხდა. ისინი მაღალი წრის საზოგადოებას წარმოადგენდნენ. საბოლოოდ კი ეჭვიანობის ნიადაგზე ქმარი კლავს ცოლს.
რეჟისორის თემო კუპრავას თქმით, ძალადობის თემაზე სამი სპექტაკლი დაიდგა.
“ეს იყო ტრილოგია ანუ სამი სპექტაკლი დაიდგა, რომლის თემა იყო ძალადობა. პირველი იყო “კრეიცერის სონატა“, შემდეგ “დანაშაული და სასჯელი“, მესამე კი იყო “ფიგაროს ქორწინება“. აქტიურობიდან გამომდინარე ძალადობის თემა დაგვაინტერესა და ეს სპექტაკლების სერია ვაჩვენეთ მარჯანიშვილის თეატრში.
რაც შეეხება “კრეიცერის სონატას“ წარმოიდგინეთ 130 წლის წინ დაწერილი ტექსტი დღემდე აქტიურია და აქედან გამომდინარე გადავწყვიტეთ, რომ მომხდარიყო ამ მოთხრობის გაპიესება.
მარადიული თემა და აქედან გამომდინარე გადავატინეთ ეს ნაწარმოები თეატრის სცენაზე.
ლევ ტოლსტოი მეცხრამეტე საუკუნეში წერდა ძალადობაზე და გენდერულ თანასწორობაზე. ამ საკითხებზე კი აქტიურად 20 წლის წინ დაიწყეს საუბარი და თანამედროვედ აღიქვამენ თითქოს ახლა გაჩნდა ეს თემა. “ – აღნიშნა ჩვენთან საუბრის დროს თემო კუპრავამ.
მისი თქმით, ლევ ტოლსტოის მოთხრობაში მოქმედება მატარებელში ხდება, როდესაც წიგნის მთავარი გმირი თანამგზავრს უყვება თავის ამბავს. სპექტაკლში კი ეს ყველაფერი შეიცვალა. მიმდინარეობს ფილმის გადაღება და შესვენების დროს ერთ-ერთი მონაწილე ყვება მის ამბავს თუ როგორ მოკლა ეჭვიანობის ნიადაგზე მისი ცოლი. შვიდი მსახიობი დავაკავეთ სპექტაკლში.
როგორც აღვნიშნე სპექტაკლში ყველასათვის ნაცნობი მსახიობები თამაშობენ, ესენია: ნიკოლოზ კუჭავა, ლელა მებურიშვილი, მანანა კოზაკოვა-წულაძე, ქეთევან ცხაკაია, ბესიკ ბარათაშვილი, ჯაბა კილაძე, მარიამ ცქიფურიშვილი.
ლელა მებურიშვილი: “ძალიან მიხარია, რომ ოზურგეთში ვიმყოფებოდი. ძალიან დიდი ხანი, არ ვყოფილვარ და ოზურგეთის თეატრის რესტავრაციის შემდეგ მარჯანიშვილის თეატრის დასმა ვითამაშეთ სპექტაკლში. განსაკუთრებული და არაჩვეულებრივი აურა აქვს ამ თეატრს და გალამაზებული, რომ დაგვხდა გაგვიხარდა. ასევე ძალიან გვიხარია ის, რომ მოგვეცა საშუალება ოზურგეთელი მაყურებლისთვის გვეჩვენებინა “კრეიცერის სონეტა“.
ძალიან მოწესრიგებული, ყურადღებიანი მაყურებელი დაგხვდა. მათი ემოციები და განწყობა მოდიოდა ჩვენამდე და ძალიან დიდი მადლობა მინდა ვუთხრა მათ.“
თემო კუპრავამ გვითხრა, რომ საოცრად საინტერესო პუბლიკა დაგხვდა. დიდი ხანი, არ ყოფილა მარჯანიშვილის თეატრი ოზურგეთში და ყველას გვაინტერესებდა, როგორ მიიღებდნენ ამ სპექტაკლს. მინდა გითხრათ, რომ ჩვენმა მოლოდინებმა გაამართლა და ეს გამოჩნდა სპექტაკლის დასრულებისთანავე, როდესაც ოვაციებით დააჯილდოვეს მსახიობები.
“ადამიანური ვნებები, ფსიქოემოციური განცდები თავისთავად ვერ თავსდება ეპოქალურ ჩარჩოებში და ძალიან ძლიერი უნდა იყო, ყოფისეული ეს სიმძიმე ასე დაინახო, თუნდაც დიდი ნაწარმოებიდან. მერე ამოკრიბო, შექმნა და მაყურებელიც დაიმგზავრო, დროის მდინარებაში, აქა-იქ გაბნეული ცხოვრებისეული მძიმე ფრაგმენტებისკენ, სადაც პერსონაჟები ცხოვრობენ. აქ, მხოლოდ მსახიობების არაჩვეულებრივი შესრულება და საუცხოო დეკორაცია კი არა, სრულყოფილი გარემო იყო ერთობლიობისა. ვფიქრობ, ასე იზომება ხელოვანისა და ხელოვნების სიდიდე. მადლობა მათ, მადლობა ჩვენს თეატრს. “ _ აღნიშნა ჟურნალისტმა ნინო ნიკოლაიშვილმა.
სპექტაკლის დასასრულს სცენის მიღმა გავრცელდა ინფორმაცია: ლევან წულაძემ სურვილი გამოთქვა, რომ ოზურგეთელ მსახიობებთან ერთად სპექტაკლი დადგას ოზურგეთის თეატრში. რეჟისორმა ასევე აღნიშნა – წლების წინანდელი მეგობრობა აუცილებლად უნდა აღდგეს და მსგავსი პროექტებით უნდა მოხდეს ოზურგეთის თეატრის დასის მიწვევა თბილისში.
კოტე მარჯანიშვილის თეატრის დასის სტუმრობა საქართველოს კულტურის, სპორტისა და ახალგაზრდობის სამინისტროს პროექტის და თანადაფინანსებით შედგა.
[sexy_author_bio]
