გამოცემა The New York Times-მა ბუჩაში რუსი დესანტების მიერ 8 მამაკაცი მკვლელობის ვიდეომტკიცებულება გამოაქვეყნა და დაღუპულთა იდენტიფიცირება შეძლო.
გამოცემის ინფორმაციით, მოკლულები არიან: ანატოლი პრიხოდკო, ანდრეი მატვიჩუკი, ანდრეი ვერბოვი, დენის რუდენკო, ანდრეი დვორნიკოვი, სვიატოსლავ ტუროვსკი, ვალერი კოტენკო და ვიტალი კარპენკო.
43 წლის მშენებელი, ივან სკიბა კი სიკვდილს გადაურჩა.
როგორც გამოცემა წერს, მკვლელობა ბუჩაში იაბლონსკას ქუჩაზე მოხდა. მოპოვებულ კადრებში ჩანს, დესანტები პატრულირებდნენ და სახლებში მოქალაქეებს ეძებდნენ. ამასთან, ისინი ამავე ქუჩაზე მდებარე 4-სართულიან საოფისე შენობაში მუშაობდნენ – როგორც გარეთ, ასევე შიგნით. იმავე ქუჩაზე, ივან სკიბა და კიდევ 5 უკრაინელი მორიგეობდნენ იმპროვიზებულ საგუშაგოზე. მათ ადგილობრივები რადიოს საშუალებით გააფრთხილეს რუსების მოახლოების თაობაზე, რის შემდეგაც ერთ-ერთის სახლში დაიმალნენ. დაახლოებით ერთ საათში რუსებმა მათ სამალავს მიაგნეს და იარაღის მუქარით უკრაინელები ქუჩაში გაიყვანეს, დააჩოქეს და ისე დახვრიტეს. სადაც ოკუოანტებმა 8 უკრაინელი მოკლეს, შენობას რუსები ბაზად და საველე ჰოსპიტალად იყენებდნენ.
დაღუპული ადამიანების ცხედრები ეზოში თვეზე მეტხანს იყო.
თვითმხილველების თქმით, მათ დაინახეს ე.წ. ბაზის პარკინგზე თავზე პერანგშემოხვეული მამაკაცები. ერთადერთი გადარჩენილის, ივან სკიბას თქმით, მათ მუხლებზე დგომა აიძულეს. მისივე თქმით, დესანტებმა ის მოქალაქეც მოკლეს, რომლებმაც ისინი სახლში შეიფარა. სკიბა სიკვდილს მხოლოდ იმიტომ გადაურჩა, რომ თავდაპირველი გასროლით ის დაიჭრა და რუსებს თავი მკვდრად მოაჩვენა.
გამოცემის ცნობით, მედესანტეები, რომლებმაც მოქალაქეები დახოცეს, რუსეთის ქალაქ ფსკოვიდან არიან.
ადგილზე დატოვებული და შემდეგ აღმოჩენილი მტკიცებულებებით ირკვევა, რომ რუსი სამხედროები 104-ე პოლკიდან იყვნენ.
შეგახსენებთ, ბუჩას დროებითი ოკუპაციისას, რუსეთი განსაკუთრებული სისასტიკით გაუსწორდა ადგილობრივ მშვიდობიან მოსახლეობას. მას შემდეგ, რაც დამპყრობლებმა ოლქი დატოვეს და იქ უკრაინის შეიარაღებული ძალები შევიდა, აღმოაჩინეს ხელ-ფეხშეკრული და დახვრეტილი ადამიანები, საერთო სამარხები, წამების ოთახები, ნაწამები, გაუპატიურებული და მოკლული ბავშვები.
ავტორი
