გუშინ, შვეიცარიის ქალაქ ნიონში, ფეხბურთში, 2024 წლის ევროპის 17 და 19-წლამდე ჩემპიონატების წილისყრა გაიმართა.
საქართველოს 17-წლამდელთა ნაკრები კვიპროსში გასამართი ევროპის ჩემპიონატის საგზურისთვის, საკვალიფიკაციო რაუნდში – დანიას, ავსტრიასა და ლიეტუვას დაუპირისპირდება. მატჩებს მომავალი წლის 11-დან 17 ოქტომბრის ჩათვლით საქართველო უმასპინძლებს.
19-წლამდე ნაკრები საკვალიფიკაციო რაუნდში – ესპანეთს, კვიპროსსა და მოლდოვას დაუპირისპირდება. ჯგუფურ ეტაპი მომავალი წლის 15-21 ნოემბერს გაიმართება და მას ასევე ჩვენი ქვეყანა უმასპინძლებს.
საქართველოს საკალათბურთო ეროვნული გუნდის კაპიტანი თორნიკე შენგელია მოედანს ერთთვიანი იძულებითი შესვენების შემდეგ დაუბრუნდა. შენგელიამ ბოლო შეხვედრა ეროვნული გუნდის მაისურით ითამაშა 14 ნოემბერს იტალიასთან, შემდეგ კი, კოჭი იტკინა და „ვირტუს ბოლონიაში“ ერთდროულად შვიდი მატჩი გამოტოვა.
ქართველი შემტევი მოედანზე ევროლიგის მორიგ ტურში ვიხილეთ, როდესაც „ვირტუსი“ სტუმრად საბერძნეთის „ოლიმპიაკოსს“ დაუპირისპირდა და 46 ქულით, 71:117 დამარცხდა.
შენგელიამ მოედანზე 19:45 წუთი გაატარა და 9 ქულა, 2 მოხსნა, 1 გადაცემა და 1 ჩაჭრა მიითვალა. თორნიკემ 7-დან 3 ორქულიანი და 6-დან 3 საჯარიმო ჩააგდო, ერთხელ დაუფარეს, 3 პერსონალური ფოლი მიიღო, მის წინააღმდეგ კი 4-ჯერ დაჯარიმდნენ.
„ვირტუსს“ ოთხი მოგების წილ მერვე მარცხი მოუგროვდა და ევროლიგაში მე-15 ადგილამდე დაქვეითდა. იტალიური გუნდი მომდევნო მატჩს 14 დეკემბერს, შინ, ბერლინის „ალბასთან“ ჩაატარებს.
აშშ–ის ეროვნულ საკალათბურთო ასოციაციის პირველობაზე მორიგი მატჩი მოიგო გოგა ბითაძის „ინდიანა პეისერსმა“. ქართველი კალათბურთელის გუნდი “ვაშინგტონ ვიზარდსს“ დაუპირისპირდა და მეტოქეს 10-ქულიანი სხვაობით – 121:111 აჯობა.
ამ შეხვედრაში გოგა ბითაძემ 13:57 წუთი ითამაშა. ქართველმა 5 ქულა, 3 მოხსნა, 1 გადაცემა და ამდენივე დაფარება დააგროვა. 22 წლის ცენტრმა 3-დან 2 სროლა ზუსტად გამოიყენა, რომელთაგანაც 2-დან 1 სამქულიანი და ერთიდან ერთი ორქულიანი ჩააგდო.
„ინდიანას“ 14 მოგების წილ 12 მარცხი აქვს და აღმოსავლეთ კონფერენციაში მე-5 ადგილზე იმყოფება.
ცნობილი გახდა, რომ „რაგბი ევროპის სუპერთასის“ ამჟამინდელი მფლობელი „შავი ლომი“ ტიტულს მიმდინარე წლის 17 დეკემბერს თბილისში, „ავჭალის“ სტადიონზე, ისრაელის „თელ–ავივ ჰითთან“ დაიცავს. ფინალური შეხვედრა 16 საათზე დაიწყება.
„შავმა ლომმა“ აღმოსავლეთი კონფერენცია წელსაც პირველ ადგილზე დაასრულა, ნახევარფინალში კი ესპანური „იბერიანსი“ დაამარცხა – 41:9.
„თელ–ავივ ჰითი“ აღმოსავლეთში მეორე იყო. ნახევარფინალში „ლუზიტანუშს“ ლისაბონში ეწვია და 30:22 იმარჯვა.
საინტერესოა, რომ ისრაელის გუნდი ერთადერთია, რომელსაც წელს „შავმა ლომმა“ ვერ მოუგო. პირველი შეხვედრა ქუთაისში ფრედ – 25:25 დასრულდა, განმეორებით მატჩში კი გამარჯვება მასპინძლებს დარჩათ – 24:18. ახლა ჩვენს გუნდს რევანშის შესაძლებლობა ეძლევა.
გუშინ, „მანჩესტერ იუნაიტედის“ მთავარმა მწვრთნელმა ერიკ ტენ ჰაგმა კრიშტიანუ რონალდუს კლუბიდან სკანდალურ წასვლაზე კიდევ ერთი კომენტარი გააკეთა. ინგლისური გუნდის დამრიგებელმა განაცხადა, რომ პორტუგალიელი სუპერვარსკვლავის გუნდში დარჩენა სურდა.
„პირველი წუთიდან ამ დრომდე მინდოდა რონალდუ დარჩენილიყო. წასვლა უნდოდა, მაგრამ იმ ცნობილი ინტერვიუს წინ ჩემთვის არაფერი უთქვამს. მან ზაფხულში მითხრა, რომ რამდენიმე დღეში გეტყვი გადაწყვეტილების შესახებ, შემდეგ კი თქვა, რომ დარჩენა სურდა“, – განაცხადა ერიკ ტენ ჰაგმა.
კრიშტიანუ რონალდუმ „მანჩესტერ იუნაიტედი“ სკანდალურად დატოვა და ახლა თავისუფალი აგენტია. ვარაუდობენ, რომ ის საუდის არაბეთის კლუბში გადავა, სადაც ხელფასის სახით წელიწადში 200 მილიონ ევროს გამოიმუშავებს, თუმცა, მოგვიანებით ეს ინფორმაცია თავად ფეხბურთელმა უარყო.
გუშინ, ცნობილი გახდა რომ გერმანიის ნაკრებისა და მიუნჰენის „ბაიერნის“ კარის დარაჯი მანუელ ნოიერისთვის 2022–2023 წლების სეზონი უკვე დასრულდა, – მეკარემ თხილამურებზე სრიალისას ფეხი მოიტეხა.
გამოცემა „Sport Bild“–ის ინფორმაციით, ნოიერმა გერმანიის ერთ–ერთ სათხილამურო ტურნირში მიიღო მონაწილეობა.
„მოგესალმებით, წლის ბოლო შეიძლებოდა უკეთესადაც დასრულებულიყო, თხილამურებზე სრიალისას ფეხი მოვიტეხე, ოპერაციამ წარმატებით ჩაიარა, მთელ სამედიცინო გუნდს მადლობას ვუხდი. ვწუხვარ, რომ ჩემთვის მიმდინარე სეზონი დასრულდა“, – დაწერა ნოიერმა სოციალურ ქსელში.
ავტორი
