თორნიკეს წარმატების გზა საქართველოს უნივერსიტეტიდან იურიდიული სამსახურის ხელმძღვანელობამდე

“მიუხედავად საქართველოს უნივერსიტეტის მაღალი რეიტინგისა, რთულად თუ წარმოვიდგენდი რომ უნივერსიტეტში ჩაბარებიდან წლების შემდეგ,  მიღებული ცოდნა და გამოცდილება ყველა მოლოდინს გადააჭარბებდა. შეუძლებელია არ გაგაჩნდეს სიამაყის გრძნობა როდესაც გონებაში გადახედავ განვლილ წლებს და ხვდები რომ ცოდნასა და გამოცდილებას გიზიარებდნენ დარგის სპეციალისტები, ლექტორები, რომლებიც დღეს მნიშვნელოვან როლს თამაშობენ იურისპრუდენციის განვითარებაში. გარდა ამისა ჩემთვის ძალიან საამაყოა, რომ უნივერსიტეტის მიერ შემოთავაზებული გაცვლითი პროგრამით შესაძლებლობა მომეცა სრულიად უფასოდ მიმეღო მაღალი ხარისხის ევროპული განათლება”, _ ამბობს თორნიკე.

როგორც თორნიკე საუბრისას იხსენებს, ერთ-ერთი მიზეზი თუ რატომ გახდა გაცვლითი პროგრამის სტუდენტი, იყო მისი მეგობრების, კურსელების გამოცდილება და ემოციები, რომლებიც თავად გადახდათ  პროგრამის განმავლობაში.

_ თორნიკე, რა განსაკუთრებული გამოცდილება მოგცათ ამ შესაძლებლობამ?

_ გაცვლითმა პროგრამამ რუმინეთის ალექსანდრე იოან კუზას უნივერსიტეტში შეძლო და ექვს თვეში მომცა დიდი პროფესიული გამოცდილება, შემახვედრა და გამაცნო ბევრი წარმატებული, საინტერესო ადამიანი და სხვა ბევრ დადებით ემოციასთან ერთად შემმატა საკუთარი თავის რწმენა და თავდაჯერებულობა რომ ყველაფერი გამოგივა თუ გინდა და მოინდომებ. უნივერსიტეტში ლექტორების განსხვავებული და სიახლეებით სავსე სწავლების მეთოდები, რომლებიც ერთმანეთისგან რადიკალურად განსხვავდებოდა. უნივერსიტეტს გარეთ კი მეგობრული გარემო და სტუდენტები, რომლებთან ერთადაც დროის გატარება ცალკე თავგადასავალი იყო. ყოველ დღე გამძაფრებული შეგრძნება რომ რამდენიმე ათეული ქვეყნიდან წარმოდგენილ სტუდენტებთან გაქვს ისეთი ახლო, მეგობრული და უშუალო ურთიერთობა რომ წლებია ერთმანეთს იცნობთ. მათი კულტურის გაცნობა, ისტორია, საინტერესო ამბები და პროფესიული გამოცდილების გაზიარება არის მიზეზები, რომელთა გამოც გრძნობ რომ თვეების შემდგომ ორმაგად მოტივირებული, ბედნიერი, ემოციებით სავსე და განვითარებული ბრუნდები ქვეყანაში. იმდენად ბედნიერი რომ გსურს ყველა სტუდენტს გაუზიარო ეს ემოციები, რათა მათაც მისცე მოტივაცია შემდგომში თავად გახდნენ გასაოცარი თავგადასავლის ნაწილი.

_ რამდენად გეხმარებათ მიღებული განათლება და გამოცდილება თქვენს საქმიანობაში?

_ შემიძლია თამამად აღვნიშნო, რომ პროფესიულმა ცოდნამ, რომელიც, პირველ რიგში, მივიღე საქართველოს უნივერსიტეტისგან და შემდგომ გაცვლითი პროგრამის ფარგლებში ალექსანდრე იოან კუზას უნივერსიტეტის ლექტორებისგან, მნიშვნელოვანი როლი ითამაშა ჩემს დასაქმებასა და შემდგომში ყოველდღიური პროფესიული ვალდებულების გახორციელებაში. სამართლებრივი ანალიზის უნარმა, სხვადასხვა სამართლებრივი პრობლემის მქონე საკითხებზე მუშაობამ და საერთაშორისო კანონმდებლობის ცოდნამ ბევრად საინტერესო და მოქნილი გახადა ყოველდღიური მუშაობის პროცესი.

_ შეგიძლიათ გაგვიზიაროთ რას საქმიანობთ და რა არის თქვენი სამომავლო გეგმები?

_ ოთხწლიანი გამოცდილების შემდგომ სწავლა კვლავ გავაგრძელე საქართველოს უნივერსიტეტში, ამჯერად მაგისტრატურის საფეხურზე, სამართლის ფაკულტეტზე. რაც შეეხება პროფესიულ საქმიანობას, ამ ეტაპზე ვმუშაობ საერთო სპეციალიზაციით. მედიის მიმართულებით, როგორც “ტელეკომპანია პირველის” იურიდიული სამსახურის ხელმძღვანელი, ასევე “მართლმსაჯულების სახლის” იურისტი და გარდა ამისა ვახორციელებ კერძო პირთა წარმომადგენლობას სამოქალაქო და ადმინისტრაციულ საქმეებზე.

რაც შეეხება სამომავლო გეგმებს, იმედი მაქვს, რომ სულ მალე მომეცემა შესაძლებლობა რომ არა ერთ სტუდენტს გავუზიარო ჩემი ცოდნა და პროფესიული გამოცდილება უკვე როგორც ლექტორმა.