საჯარო უწყებებიდან საჯარო ინფორმაციის მიღება სულ უფრო იშვიათია _ პრაქტიკულად, აზრს კარგავს მისი სასამართლოს მეშვეობით მიღების მცდელობაც.
ამის სამწუხარო მაგალითია ამბავი, რომლის შესახებაც სულ ცოტა ხნის წინ გიამბეთ: 2018 წელს “გურია ნიუსის” მიერ ოზურგეთის მერიიდან გამოთხოვილი საჯარო ინფორმაცია, ბიუჯეტიდან სხვადასხვა წამახალისებელი, დამატებითი ხარჯების შესახებ, ცხადია, ვერ მივიღეთ და სასამართლოს მივმართეთ. მერვე წელი გადის და სასამართლო პროცესი ჯერ კიდევ არ ჩანიშნულა! არადა, მერიც სხვა აირჩიეს და აგერ უკვე თვითმმართველობის მეორე არჩევნების შესახებ ვმსჯელობთ. ყველამ იცის, რომ ინფორმაცია ყველაზე მალფუჭებადი პროდუქტია და ახლა აღარ აქვს აზრი, თუ როდის ჩაინიშნება სასამართლო პროცესი; არც იმას აქვს აზრი, რვა–ათი წლის წინანდელი ინფორმაცია მივიღოთ, თუ როგორ ხარჯავდა მაშინ ფულს მაშინდელი ადგილობრივი ხელისუფლება.
ამჯერად, საზოგადოებრივი ინტერესიდან და დაზარალებული ადამიანების სასიცოცხლოდ მნიშვნელოვანი საჭიროებიდან გამომდინარე, გადავწყვიტეთ, გაგვერკვია, თუ რამდენი ადამიანი მიიჩნია სახელმწიფომ დაზარალებულად 2025 წლის თებერვლის დიდთოვლობისას _ რამდენ ადამიანს დაუზიანდა საცხოვრებელი სახლი.
ამისათვის, 4 აპრილს, my.gov.ge-ის მეშვეობით, ლანჩხუთის, ჩოხატაურის და ოზურგეთის მუნიციპალიტეტის მერიებს შემდეგი კითხვით მივმართეთ: “გთხოვთ, მოგვაწოდოთ ინფორმაცია 2025 წლის თებერვლის დიდთოვლობისას რამდენი სახლი დაზიანდა; ასევე, მოგვწერეთ, როგორ აპირებთ დაზარალებულებისთვის დახმარებას; რამდენი ლარი და რაში დაიხარჯა დიდთოვლობის დროს _ მოგვაწოდეთ ჩამონათვალი სოფლების მიხედვით“.
მოდით, ერთად ვნახოთ, რამდენად დეტალურ ინფორმაციას გვაწვდიან საჯარო სამსახურები, რომლებსაც ჩვენ, მოქალაქეები ჩვენივე გადასახადებით ვაფინანსებთ. ამასთან, საბედნიეროდ, ხელისუფლებას ჯერ კიდევ არ გაუუქმებია საქართველოს ზოგად ადმინისტრაციული კოდექსი, რომელიც ორგანული, მაღალი ლეგიტიმაციის კანონია და რომელიც ინფორმაციის გაცემის წესებს უდგენს საჯარო პირებს!
ოზურგეთის მუნიციპალიტეტის მერიიდან არასრული პასუხი 12 ივნისს (!) მივიღეთ:
“ოზურგეთის მუნიციპალიტეტში, 2025 წლის თებერვალში უხვი ნალექის შედეგად დაზიანდა 3 400 საცხოვრებელი სახლი. დღეის მდგომარეობით, კომისიის მიერ შესწავლილია ყველა დაზიანებული სახლი. თანხა დაზუსტდება უახლოეს მომავალში“, _ აღნიშნულია ოზურგეთის მუნიციპალიტეტის მერიის წერილში.
ჩოხატაურის მუნიციპალიტეტის მერიისგან 4 აპრილს გაგზავნილ წერილზე 17 აპრილს ასეთი პასუხი მივიღეთ:
“თქვენი #10-462509410-46 (04.04.2025 წელი) განცხადებისა და საქართველოს მთავრობის ადმინისტრაციიდან შემოსული #03-462509712-46 (07.04.2025 წელი) წერილის პასუხად, “საქართველოს ზოგადი ადმინისტრაციული კოდექსის” მე-40 მუხლის შესაბამისად გაცნობებთ, რომ ჩოხატაურის მუნიციპალიტეტის მერიაში შექმნილია 2025 წლის 20-26 თებერვლის დიდთოვლობის შედეგად მიყენებული ზარალის დამდგენი დროებითი კომისია.
კომისია, დიდთოვლობით მიყენებული ზარალის დადგენის მიზნით, უზრუნველყოფს დაზარალებული მოქალაქეების საცხოვრებელი სახლებისა და საყოფაცხოვრებო ნაგებობების დათვალიერებას და შესაბამისი დოკუმენტაციის მომზადებას.
ინფორმაციას, დაზარალებული მოქალაქეების რაოდენობისა და მათი დახმარების შესახებ, მოგაწვდით კომისიის მუშაობის დასრულებისა და საბოლოო გადაწყვეტილების მიღების შემდეგ“, _ წერილს ხელს ჩოხატაურის მუნიციპალიტეტის მერი დავით შარაშიძე აწერს.
რაც შეეხება ლანჩხუთის მუნიციპალიტეტს, მერია დიდი ხანია საჯარო ინფორმაციაზე პასუხის გასაცემად თავს არ იწუხებს _ საჯარო ინფორმაციაზე გამცემ პირს რამდენჯერმე დავურეკეთ და შეტყობინებაც გავუგზავნეთ, მაგრამ ამ დრომდე ამ ბოლო მინაწერზე პასუხი არ მიგვიღია.
პარალელურად, ამ პერიოდში, ვრცელდება ოფიციალური ინფორმაცია, რომ დაზარალებულ რეგიონს ცენტრალურმა ხელისუფლებამ მილიონობით ლარი გამოუყო, თუმცა, როგორც აღმოჩნდა, ზარალი ბოლომდე დათვლილი ჯერ კიდევ არაა. ამიტომ, ჩვენ საქართველოს მთავრობის ადმინისტრაციას შემდეგი კითხვებით, წერილობით მივმართეთ:
“გთხოვთ, მოგვაწოდეთ შემდეგ სახის ინფორმაცია: გურიაში, 2025 წლის თებერვალში დიდთოვლობის გამო, რამდენი სახლი დაზიანდა; კონკრეტულად ჩოხატაურში, ოზურგეთში და ლანჩხუთში რამდენი მილიონი ლარი გამოიყო და რაში გადანაწილდა/გადანაწილდება ეს თანხა“.
საქართველოს მთავრობის ადმინისტრაციამ ამ ინფორმაციის პასუხის გაცემა გურიის სამივე მუნიციპალიტეტის მერიებს დაავალა. თუ როგორ შესრულდა ეს დავალება, როგორ ასრულდა კანონი, უკვე გაგაცანით. არადა, ხელისუფლების ძირითადი მოვალეობა საზოგადოების წინაშე ანგარიშვალდებულებაა.
თემაზე მუშაობას ისევ ვაგრძელებთ და დანარჩენ დეტალებს მოგვიანებით გაგაცნობთ.
