გუშინ კატარის მუნდიალზე „C“ და „D“ ჯგუფებში ბოლო ტურის შეხვედრები გაიმართა.
„C“ ჯგუფში არგენტინის ეროვნულმა გუნდმა პოლონეთი დაამარცხა – 2:0. აღსანიშნავია, რომ პირველი ტაიმის მიწურულს ლეო მესიმ თერთმეტმეტრიანი დარტყმა ვერ გამოიყენა.
მექსიკის ნაკრებმა საუდის არაბეთის ეროვნულ გუნდს სძლია – 2:1 და მერვედფინალურ სტადიაზე გასასვლელად მხოლოდ ერთი გატანილი გოლი დააკლდა.
ამ ჯგუფიდან ბრძოლას ლეო მესის არგენტინა და რობერტ ლევანდოვსკის პოლონეთი გააგრძელებენ.
„D“ ჯგუფში ლამის მეორე შემადგენლობით მოთამაშე საფრანგეთის ნაკრები ტუნისთან დამარცხდა – 0:1.
ავსტრალიის ეროვნულმა გუნდმა ერთგვარი სიურპრიზი შემოგვთავაზა და დანიას მოუგო – 1:0.
ამ ჯგუფიდან პირველობის მედლებისათვის საფრანგეთი და ავსტრალია იბრძოლებენ.
გუშინ კიდევ ორი მერვედფინალური წყვილი გაირკვა. არგენტინა ავსტრალიას დაუპირისპირდება, საფრანგეთი კი პოლონეთს შეხვდება.
მექსიკელი მოკრივე – ლეო მესის დაპირისპირებაში ახალი პერსონა გამოჩნდა. აგუეროსა და მაიკ ტაისონის შემდეგ ფეხბურთის ვარსკვლავი UFC-ის არგენტინელმა მებრძოლმა სანტიაგო პონზინიბიომ დაიცვა. სენიორ სანტიაგომ კანსელო ალვარესს შემდეგი მესიჯი გაუგზავნა:
„მესიზე მუქარას აზრი არ აქვს. თუ ალვარესი ლეოს არ იცნობს, სჯობს მასზე საერთოდ არაფერი თქვას. ნორმალურია, რომ მოთამაშეებმა იატაკზე ოფლიანი მაისურები დადონ. მის ქმედებაში უპატივისმცმელობა არ ყოფილა. ლეოს ყველა უნაკლო სპორტსმენად იცნობს და მას დიდ პატივს სცემენ. ძმაო, თუ გინდა ჩხუბი, მე მზად ვარ! ოღონდ, ლეოს თავი დაანებე! რაც მესის უკავშირდება, უკავშირდება მთელს არგენტინას“, – დაწერა სანტიაგო პონზინიბიომ.
შეგახსენებთ, რომ არგენტინისა და მექსიკის ნაკრებების დაპირისპირების შემდეგ გასახდელში ლიონელ მესიმ მექსიკის დროშას ბუცის გახდისას ფეხი დააბიჯა, რასაც კრივში სხვადასხვა წონით კატეგორიაში მსოფლიოს მრავალგზის ჩემპიონის, მექსიკელი კანსელო ალვარესის გაღიზიანება მოჰყვა.
ბოლოსა და ბოლოს გაირკვა რომ პორტუგალიელ კრიშტიანო რონალდუს ურუგვაისთან ის გოლი არ გაუტანია. ბრუნო ფერნანდეშის ჩაწოდების შემდეგ კრიშტიანუ ბურთზე თავით თამაშს ცდილობდა, რომელიც კარში აღმოჩნდა და გოლი გავიდა.
რონალდუმ გოლი ისე იზეიმა, თითქოს მან გაიტანა, მაგრამ საბოლოოდ, გოლი ბრუნოს ჩაეთვალა. თუმცა, კრიშტიანუმ თქვა, რომ ბურთს შეეხო და პორტუგალიის ფეხბურთის ფედერაციამაც ფიფას მიმართა გოლი რონალდოს ანგარიშზე ჩაეწერა.
თუმცა… „Adidas“–ის მიერ შექმნილ „ალ რიჰლას“ ბურთს შიგნით ჩამონტაჟებული აქვს სენსორული ჩიპი, რომელმაც დააფიქსირა, რომ ბრუნოს ჩაწოდების შემდეგ ბურთს არავინ შეხებია და შესაბამისად, რონალდუს კონტაქტი არ ჰქონია.
სანამ პორტუგალიელი კრიშტიანო კატარის სუსხიანი სიცხის პირობებში თავისი სამშობლოს სპორტული ღირსებისათვის იღწვის, ფრანგ ქარიმის სხვა პრობლემები აწუხებს და დასასვენებლად გაემგზავრა. გამოცემა „ეკიპის“ ცნობით, ტრავმირებული თავდამსხმელი ქარიმ ბენზემა დასასვენებლად ინდოეთის ოკეანის კუნძულ რეიუნონზე გაემგზავრა და საფრანგეთის ნაკრებში კატარში აღარ დაბრუნდება.
ბენზემა იქ რამდენიმე დღე გაჩერდება, შემდეგ მადრიდში ჩაფრინდება და 9 დეკემბერს ინდივიდუალურად დაიწყებს ვარჯიშს.
იყო საუბარი რომ ბენზემამ ტრავმა მოიშუშა და უახლოს დღეებში საფრანგეთის ეროვნულ გუნდს შეუერთდებოდა.
ბელგიის ნაკრების მეკარე ტიბო კურტუამ ოფიციალურად უარყო ინფორმაცია იმის შესახებ, რომ ფეხბურთელებს ერთმანეთთან კონფლიქტი აქვთ.
„ახლა ყველა იმედგაცრუებული ვართ, მაგრამ გვჯერა, რომ ხორვატიას დავამარცხებთ და მომდევნო ეტაპზე გავალთ. ეს ფეხბურთია, ყველაფერი შეიძლება მოხდეს, მაგრამ ჩვენ ყველაფერს გავაკეთებთ. დიახ, მაროკოსთან წაგების შემდეგ ყველანი გაბრაზებულები და მოწყენილები ვიყავით, მაგრამ ვფიქრობთ, რომ მედიამ ეს სიტუაცია გააზვიადა და პლეი–ოფში გასვლა შეგვიძლია.
ინფორმაცია გასახდელიდან ფეხბურთელს გააქვს? ჩვენ ვმუშაობთ არა მარტო ფეხბურთელებთან, არამედ სხვა პერსონალთან, სადაც ბევრი ადამიანია. არ ვიცით, ასეთ რაღაცებს ვინ ავრცელებს, მაგრამ ეს ყველაფერი დიდი ტყუილია. არ გვჭირდება იმის გარკვევა ვინ გაავრცელა ინფორმაცია, მაგრამ თუ გავიგებთ, ვინ არის „ვირთხა“, ის ჩვენთან აღარ იქნება. ჩვენ ვართ გუნდი, ოჯახი, ყველაფერი გუნდში უნდა დარჩეს“, – განაცხადა ტიბო კურტუამ.
ანალოგიურ თემაზე ისაუბრა ედენ აზარმაც:
„ვერტონგენთან მაროკოსთან თამაშის შემდეგ არანაირი დისკუსია არ ყოფილა. დე ბრუინსაც ვესაუბრე იმ განცხადებაზე, რაც თამაშის სტილსა და გუნდის გადაბერებაზე თქვა, მაგრამ ეს უფრო ხუმრობით თქვა. მას გუნდისგან სრული ნდობა აქვს, ასე რომ არ იყოს, ის აქ არ იქნებოდა. ნორმალურია, რომ წაგების მერე გასახდელში გაბრაზებულები ვიყავით, მაგრამ მეტი არაფერი მომხდარა. რთული მომენტია, ჩემთვის ყველაზე რთული, რაც ნაკრებში მქონია, მაგრამ ასეთი პერიოდი დიდ გუნდებსაც აქვთ, ამიტომ, უფრო ერთიანი ვიყოთ და თამაში მოვიგოთ“, – აღნიშნა ედენ აზარმა.
ნიდერლანდების ნაკრების მთავარი მწვრთნელი ლუის ვან გაალი თანამემამულე ჟურნალისტს დაუპირისპირდა. კატართან გამარჯვების შემდეგ ჩატარებულ პრესკონფერენციაზე ვან გაალმა თამაშის შესახებ ისაუბრა.
„მომდევნო ეტაპზე გავედით, ტურნირის ყველაზე მნიშვნელოვან ფაზაში. გავაკეთეთ ის, რაც გვჭირდებოდა და ჯგუფში პირველი ადგილი დავიკავეთ. ბურთით გაცილებით კონცენტრირებულები ვთამაშობდით და ორი გოლი გავიტანეთ. თუმცა, ზოგიერთი ფეხბურთელი საუკეთესო ფორმაში არაა. მემფის დეპაი გუნდისთვის წარმოუდგენლად მნიშვნელოვანია, კმაყოფილი ვარ მისი თამაშით. არ დაგავიწყდეთ, რომ ორი თვეა არ უთამაშია. გვინდა, რომ მსოფლიოს ჩემპიონები გავხდეთ და მემფისი გვჭირდება“, – თქვა ვან გაალმა კატართან მოგებულ მატჩზე, შემდეგ კი ჟურნალისტს უპასუხა, რომელმაც ნიდერლანდელი სპეციალისტი მისი გუნდის თამაშის ხარისხის გამო გააკრიტიკა:
„ეს თქვენი აზრია, მაგრამ არ გეთანხმებით, რომ ჩვენი თამაში იმედგაცრუებაა და არ მგონია, რომ თქვენი შეფასება სწორია. ვფიქრობ, ყველა ამაყი იქნება მას მერე, რაც მერვედფინალში გავედით. მგონია, რომ ყველაფერი არც ისე ცუდია, როგორც თქვენ ამბობთ. არ ვაპირებ ამ თემაზე საუბრის გაგრძელებას, რადგან ვფიქრობ, რომ თქვენ ფეხბურთზე განსხვავებული აზრი გაქვთ“.
აშშ–ის ნაკრების ლიდერმა, კრისტიან პულიშიჩმა ირანის ნაკრებთან მატჩში გატანილი გოლის დროს დაზიანება მიიღო და შესაცვლელი გახდა, თუმცა გაირკვა, რომ მისი ტრავმა არც ისე სერიოზულია და ის მერვედფინალურ მატჩში ნიდერლანდების ნაკრების წინააღმდეგ თამაშს მოახერხებს.
ამერიკელმა მოთამაშემ გამოკვლევები უკვე ჩაიტარა, რის შედეგადაც აღმოჩნდა, რომ მას მენჯის ძვლის დაზიანება აქვს, თუმცა მხოლოდ 2-3 დღის უქმობა მოუწევს.
სენეგალის ნაკრების ფეხბურთელებმა ეკვადორთან გამარჯვება და მსოფლიოს ჩემპიონატის მერვედფინალში გასვლა სენეგალური ფეხბურთის ლეგენდას, აწ გარდაცვლილ პაპა ბუბა დიოპს მიუძღვნეს.
მატჩის შემდეგ ფეხბურთელებმა ბანერი გაშალეს, რომელზეც დიოპი იყო გამოსახული და ეწერა: „ნამდვილი ლომი არასდროს კვდება“.
პაპა ბუბა დიოპი ორი წლის წინ, 2020 წლის 29 ნოემბერს, ხანგრძლივი ავადმყოფობის შედეგად გარდაიცვალა და ეს ნაბიჯიც ამას ემსახურებოდა. დიოპი სენეგალის ნაკრების წევრი იყო 2002 წლის მუნდიალზე და ამ ქვეყნის ისტორიაში სადებიუტო მატჩში მსოფლიოს ჩემპიონატზე, საფრანგეთის ნაკრების წინააღმდეგ მან გამარჯვების გოლი გაიტანა.
ფიფას წესების მიხედვით, მატჩის წინა პრესკონფერენციაზე მთავარ მწვრთნელს თან ფეხბურთელი უნდა ახლდეს, სენეგალის ნაკრებმა ეს წესი არ გაითვალისწინა, რის გამოც შესაძლოა დაჯარიმდეს. ფიფამ გერმანიის ნაკრები მსგავსი შემთხვევის გამო უკვე 10 000 ევროთი დააჯარიმა, რადგან ესპანეთთან მატჩის წინ მთავარი მწვრთნელი ჰანსი ფლიკი პრესკონფერენციაზე მარტო წარსდგა. ამჯერად ასეთი ქმედება სენეგალის ნაკრების მთავარმა მწვრთნელმა, ალიუ სისემ გაიმეორა.
ლეგენდარულმა იტალიელმა ფეხბურთელმა ალესანდრო დელ პიერომ ბრაზილიელ ნეიმარს მიმართა და …საკუთარი კოჭი შესთავაზა.
„ადრე ხშირად ასე არ იყო, მაგრამ დღევანდელი თაობის გენეტიკა აჩვენებს, რომ ისინი უფრო ძლიერები, ღონიერები და სწრაფები არიან. ასე რომ, წელს უფრო მეტ კონტაქტურ თამაშს ვხედავთ. ნეიმარს ნამდვილად საუკეთესოს ვუსურვებ. ძალიან ვწუხვარ, რომ მას ტრავმა აქვს. ჩემო მეგობარო, ჩემი კოჭი თუ გჭირდება, მოვალ და გათხოვებ, არ ვიცი, შეგვიძლია თუ არა კოჭების გაცვლა მსოფლიოს ჩემპიონატზე, მაგრამ უბრალოდ მინდა, რომ შენი თამაში ვნახო“, – იხუმრა ალესანდრო დელ პიერომ.
საინტერესოა რომ დღეს, მამაკაცების მუნდიალზე პირველად ქალი არბიტრები იმსაჯებენ.
გერმანიისა და კოსტა რიკის თამაშის მთავარი მსაჯი ფრანგი სტეფანი ფრაპარი იქნება, ხოლო მისი ასისტენტის ფუნქციებს მექსიკელი კარენ დიასი და ბრაზილიელი ნეუზა ბაკი შეასრულებენ.
ფრაპარი გამოცდილი არბიტრია, რომელმაც უკვე იმუშავა ჩემპიონთა ლიგისა და საფრანგეთის ჩემპიონატის მატჩებზე, ასევე იმსაჯა საფრანგეთის თასის ფინალი და ევროპის სუპერთასი 2019 წელს, ლონდონის „ჩელსისა“ და „ლივერპულს“ შორის.
მსოფლიო თასის ხელმძღვანელმა, ჰასან ალ–ტავადიმ კი განაცხადა, რომ კატარში მსოფლიო ჩემპიონატის ჩატარებასთან დაკავშირებული საქმიანობის დროს მხოლოდ და მხოლოდ 400-500 მიგრანტი გარდაიცვალა.
„ერთი სიკვდილიც კი ძალიან ბევრია. ვფიქრობ, ყოველ წელს მშენებლობაზე ჯანმრთელობის და უსაფრთხოების პირობები უმჯობესდება. ყოველ შემთხვევაში, ჩვენთან ასეა, იქ სადაც ჩვენ ვაგებთ პასუხს. ზუსტი პასუხი მე არ მაქვს, თუმცა მსოფლიო ჩემპიონატის მოსამზადებელ ეტაპზე დაახლოებით 400-500 მიგრანტი დაიღუპა,“ – განაცხადა მსოფლიო ჩემპიონატის ხელმძღვანელმა.
სხვადასხვა წყაროს მტკიცებით, სინამდვილეში კატარის სტადიონების მშენებლობაზე დაღუპულ მუშათა რიცხვი დაახლოებით 6-დან 15 ათასამდე მერყეობს.
ავტორი
