პოლონეთს შეუძლია შექმნას კოალიცია იმ ქვეყნებთან, რომლებიც მზად არიან მიაწოდონ უკრაინას Leopard 2 ტანკები გერმანიის მონაწილეობის გარეშე, თუ შოლცის მთავრობა არ დათანხმდება ამ ჯავშნის გადაცემას – ამის შესახებ პრემიერ-მინისტრმა მატეუშ მორავეცკიიმ pap.pl მიცემულ ინტერვიუში განაცხადა.
გამოცემის ცნობით, მორავეცკიმ “რამშტეინ 8-ის” შეხვედრაზე გერმანიის საქციელი გააკრიტიკა და თქვა, რომ გერმანიის დამოკიდებულება მიუღებელია.
როგორც pap.pl წერს, პოლონეთის მთავრობის მეთაურს არ ესმის, რა უნდა მოხდეს იმისთვის, რომ ბერლინმა „თვალები გაახილოს და გერმანიის პოტენციალის შესაბამისად დაიწყოს მოქმედება“.
მორავეცკიიმ ინტერვიუში აღნიშნა, რომ გერმანიამ სხვა მოკავშირეებს ხელი არ უნდა შეუკრას.
_ გერმანიის დამოკიდებულება მიუღებელია. ომის დაწყებიდან თითქმის ერთი წელი გავიდა. უდანაშაულო ხალხი ყოველდღე კვდება. რუსები ბომბებით ანადგურებენ უკრაინის ქალაქებს, თავს დაესხნენ სამოქალაქო ობიექტებს. კლავენ ქალებს და ბავშვებს. რუსული არმიის მიერ ჩადენილი სამხედრო დანაშაულებების მტკიცებულებები შეგიძლიათ იხილოთ ტელევიზორში და youtube – ზე. კიდევ რა ჭირდება გერმანიას, თვალები რომ გაახილოს და დაიწყოს მოქმედება გერმანიის სახელმწიფო პოტენციალის შესაბამისად? გარდა ამისა, მათ არ უწევთ რესურსების 100 პროცენტით გააქტიურება, საკმარისია 30 პროცენტი, თუნაც 10 პროცენტი. ის იქნება პროგრესი. თუმცა, უპირველეს ყოვლისა, ბერლინმა არ უნდა შეასუსტოს ან საბოტაჟი მოახდინოს სხვა ქვეყნების ქმედებებზე.
თუ გერმანია არ დათანხმდება ლეოპარდების გადაცემას [უკრაინისთვის], მაშინ ჩვენ შევქმნით სახელმწიფოთა უფრო მცირე კოალიციას, რომლებიც მზად არიან გაუზიარონ თავიანთი თანამედროვე ტანკები უკრაინას. ჩვენ არ ვუყურებთ უკრაინაში სისხლისღვრას… უკრაინა და ევროპა მოიგებს ამ ომს – გერმანიასთან ერთად, თუ მის გარეშე. ახლა გერმანიაზეა დამოკიდებული, სურთ თუ არა შეუერთდნენ მისიას და შეაჩერონ რუსული ბარბაროსობა, თუ აირჩიონ, რომ ჩუმად უყურონ და ისტორიაში შევიდნენ, როგორც არასწორ მხარეს მყოფნი”, – განაცხადა პოლონეთის პრემიერმა.
როგორც მორავეცკიმ აღნიშნა, მიუხედავად იმისა, რომ გერმანიის თავდაცვის ახალი მინისტრი უარყოფს, რომ გერმანია ბლოკავს გერმანული წარმოების ტანკების უკრაინისთვის გადაცემას, მას სურს მოისმინოს მკაფიო განცხადება, რომ ბერლინი მხარს უჭერს ასეთ გადაწყვეტილებას.
შეგახსენებთ, რომ პოლონეთის პრეზიდენტმა, ანდჟეი დუდამ იანვრის დასაწყისში ლვოვში ვიზიტისას განაცხადა, რომ ვარშავა მზადაა უკრაინას გადასცეს 14 “ლეოპარდ 2” ტიპის ტანკი მოკავშირეთა ფართო კოალიციის ფარგლებში.
რამშტეინის შეხვედრის შემდეგ გერმანიის თავდაცვის მინისტრმა თქვა, რომ დასავლელმა მოკავშირეებმა ჯერ ვერ მიაღწიეს შეთანხმებას უკრაინისთვის Leopard 2-ის ტანკების გადაცემას, მაგრამ მან თავის სამინისტროს დაავალა, მოემზადონ „იმ დღისთვის, რომელიც შეიძლება დადგეს“.
ავტორი
