საქართველოს მესამე პრეზიდენტი მიხეილ სააკაშვილი ვიდეო ავრცელებს, რომ ბათუმშია. ის მხარდამჭერებს 3 ოქტომბერს, თბილისში, რუსთაველის გამზირზე შესაკრებად იბარებს და ამბობს, რომ მივა.
რა გავლენა შეიძლება მოახდინოს გავრცელებულმა ვიდეომ არჩევნებზე? _ ამ საკითხის შეფასება “გურია ნიუსმა” პოლიტოლოგ ვახტანგ ძაბირაძეს სთხოვა.
ძაბირაძის თქმით, ჯერჯერობით, მაინც ზუსტად იმის თქმა, იმყოფება თუ არა მიხეილ სააკაშვილი ნამდვილად საქართველოში, შეუძლებელია. რადგან მის მიერ გავრცელებული ვიდეო ბუნდოვანია,
„ვიდეო კი გავრცელდა, მაგრამ საკმაოდ ბუნდოვანი ვიდეოა. მე არ ვარ ექსპერტი და ვერ შევაფასებ, ეს ნამდვილი ვიდეოა თუ არა. ის, რომ საააკშვილი 3-ში გამოჩნდება რუსთაველზე 100 000 კაცის შეკრების შემთხვევაში, მიმართულია იქეთ, რომ „ნაციონალური მოძრაობის“ ამომრჩევლის მობილიზება მოხდეს. მაგრამ პარალელურად ეს ვიდეო მოახდენს „ქართული ოცნების“ ამომრჩევლის მობილიზებასაც. მგონია, რომ უფრო ამ მიზანს ემსახურება, რომ რუსთაველზე მოხდეს მასშტაბური შეკრება მომიტინგეების. არჩევნებზე გავლენას ამ მიმართუ;ლებით მოახდენს. რამდენად მობილიზებული იქნება ამომრჩეველი ამის თქმა ცოტა ძნელია. გამომდინარე იქედან, რომ ძალიან ბევრი ამ გამოსვლას არ მიიღებს სერიოზულად“,_ გვპასუხობს ძაბირაძე.
პოლიტოლოგის თქმით, სააკაშვილი თუ მართლა საქართველოშია, 3 ოქტომბერს რუსთაველის გამზირზე იმ შემთხვევაში გამოჩნდება, თუ ჩათვლის, რომ საკმარისი რაოდენობის ხალხი მივიდა. სხვა შემთხვევაში კი გამოაცხადებს, რომ ისევე დატოვა ქვეყანა, როგორც შემოვიდა.
„ის, რომ 3 ოქტომბერს იქნება რუსთაველზე, მან, უბრალოდ, განსაზღვრა, თუ იქნება ხალხის დიდი რაოდენობა და მართლა საქართველოშია, ის მივა რუსთველზე. ხალხი კი მივა რუსთაველზე იმ განწყობით, რომ არამარტო პროტესტში მიიღოს მონაწილეობა, არამედ წინააღმდეგობა გაუწიოს ხელისუფლებას თუ ის შეეცდება სააკაშვილის დაპატიმრებას. მაგრამ თუ არასაკმარისი რაოდენობა იქნება ხალხის რაოდენობა ან სააკაშვილმა ჩათვალა, რომ არასაკმარისი რაოდენობაა, მაშინ არ მივა რუსთაველზე და იტყვის, რომ ისევე წავიდა, როგორც ჩამოვიდა. რადგან ხალხი არ აჰყვა მის მოწოდებას“,_ ამბობს პოლიტოლოგი.
მისი შეფასებით, სააკაშვილი თუ მართლა საქართველოში იმყოფება, ბევრ კითხვას აჩენს და ხელისუფლების დიდ ჩავარდნაზე მიანიშნებს.
„გარკვეული კითხვები ჩნდება. პირველი, ის, რომ სახელმწიფომ, ხელისუფლებამ გამოაცხადა, რომ სააკაშვილი საქართველოში არ ჩამოსულა. ეს, მინიმუმ, იმას ნიშნავს, რომ მას ოფიციალურად საზღვარი არ გადმოუკვეთავს. თუ ის მართლა საქართველოშია, მაშინ მან საქართველოში არაკანონიერი გზით შემოაღწია. ანუ საზღვრის უკანონო გადაკვეთასთან გვაქვს საქმე. პრინციპში, თუ ის მართლა საქართველოშია, მიუხედავად იმისა, მან ოფიციალურად გადმოკვეთა საზღვარი თუ არა, ეს არის დიდი ჩავარდნა ხელისუფლების და ძალოვანი სტრუქტურების. ამასთანავე ჩნდება გარკვეული ეჭვებიც, საიდან და როგორ შემოაღწია სააკაშვილმა საქართველოში. დიდია ალბათობა იმისაც, რომ მან საქართველოში საქართველოს არაკონტროლირებადი ტერიტორიებიდან შემოაღწია“,_ ამბობს ძაბირაძე.
პოლიტოლოგი ჩვენთან საუბრისას აღნიშნავს, რომ სააკაშვილი უფრო ამომრჩევლების მობილიზებას ცდილობს ვიდეოს გავრცელებით და საქართველოში არ იმყოფება.
„არაფრის გამორიცხვა არ შემიძლია, მაგრამ ვფიქრობ, რომ ის უფრო ამომრჩევლების მობილიზებას და მასშტაბური აქციის ორგანიზებას უფრო ცდილობს, ვიდრე ის, რომ საქართველოშია ჩამოსული“,_ ამბობს ძაბირაძე.
