ჩოხატაურელი დავით საჯაია, რომელიც წლების განმავლობაში ა(ა)იპ ბახმაროს დირექტორი იყო, ორბი ჯგუფის მიერ ბახმაროში დაგეგმილი მშენებლობის გამო საზოგადოების დიდი ნაწილის უარყოფით დამოკიდებულებას სოციალურ ქსელში ეხმიანება.
“თუ რაიმეში შეიძლება გავეჯიბრო ადამიანს, ერთ-ერთი ბახმაროს სიყვარულია. ჩემი ბავშვობა, ახალგაზრდობა, მთელი ჩემი შეგნებული ცხოვრება, არ არსებობს ბახმაროს გარეშე. ამიტომაც შემიძლია ვთქვა, რომ სხვაზე მეტად თუ არა , ნაკლებად არ ვიცი ბახმაროს ღირსება და ნაკლი, არავისზე ნაკლებად მაწუხებს მისი პრობლემები და გამოწვევები, მაგრამ სასურველი ყოველთვის როდია შესაძლებელი.
დღეს, როცა ბახმაროს განვითარების ახალი პერსპექტივა გაჩნდა, მინდა ჩემი პოზიციაც გამოვხატო და ვთქვა, რომ მსგავსი მასშტაბური პროექტი ჩვენს მუნიციპალიტეტს არ ჰქონია. პროექტის მასშტაბურობა და ამბიციურობა კი, როგორც მოსალოდნელია, აზრთა სხვადასხვაობას იწვევს. ეს არც არის გასაკვირი. მთავარია სწორედ განვსაჯოთ, გავაანალიზოთ და შევაფასოთ.
დავიწყოთ იმით, რომ ბახმარო დღეს მხოლოდ ერთი სეზონის განმავლობაში ღებულობს ვიზიტორებს, ნუ ჩავთვლით იმ რამდენიმე ინფლუენსერს ან თავგადადებულ ვიზიტორს, რომელიც ზამთრობით სტუმრობენ კურორტს. მათთვის ეს ძალიან ძვირი სიამოვნებაა, არც თუ ისე უსაფრთხო და კომფორტულიც, მაგრამ მათ განუზომელი სიყვარული ბახმაროსადმი და ფინანსური შესაძლებლობები აძლევთ საშუალებას დატკბნენ ზამთრის ბახმაროს მშვენიერებით. ალბათ დამეთანხმებით, დროა ყველას გვქონდეს ბახმაროში ასვლის შესაძლებლობა და მხოლოდ ინფლუენსერების ბლოგებით არ ვიკლავდეთ ბახმაროს სიყვარულს. დიდი მადლობა გივიკო დიდიას ბახმაროს ასეთი ერთგულებისა და სიყვარულისათვის. ვინ იცის რამდენ ადამიანს გაუჩინა სურვილი ბახმაროს მონახულების და აქ დასვენების, მაგრამ ბახმარო ის სასწაულია, რომელიც ნამდვილად იმსახურებს მეტ ყურადღებას, მეტ შესაძლებლობას, მეტ ცნობადობას.
ვიხსენებ 10 წლის წინ ბახმაროში შვეიცარიელი ინვესტორის შემოსვლას. ლამის აგენტად გამოაცხადა მავანმა. როგორი ეჭვის თვალით უყურებდნენ მის ინტერესს და ყურადღებას მაშინ, რამხელა უარყოფითი შეფასებები მოჰყვა მის გამოჩენას. არადა ალბათ ათეული წლით მაინც დააჩქარა მისმა ვიზიტმა ბახმაროს პოპულარიზაცია უცხოურ ასპარეზზე. დღეს თამამად შეგვიძლია ვთქვათ რომ ბახმარო ექსტრემალური სათხილამურო სპორტის განვითარების საუკეთესო ასპარეზია მსოფლიოში. როგორ ფიქრობთ, რამდენი ადამიანი შეძლებს ბახმაროში ასვლას და დასვენებას იმ შემთხვევაში, თუ ოთხივე სეზონზე გაიხსნება გზა? რა თქმა უნდა, თითქმის ყველა მესაკუთრეს მიეცემა საშუალება ზამთარშიც მოინახულონ საკუთარი სახლი, მოუარონ, ეპატრონონ და დაიცვან დიდთოვლობით მიყენებული ზარალისაგან. ექნებათ საშუალება დაისვენონ ან გააქირაონ ბინები და მიიღონ შემოსავალი ყველა სეზონის განმავლობაში. დღეს სპეციალური ტექნიკა, რომლითაც ბახმაროში ერთეული ვიზიტორი ადის, ძალიან ძვირია. თავისუფალი მოწესრიგებული და უსაფრთხო გზა კი ამ პრობლემას მოაგვარებს.
ყველა ბრუნვაში გვესმის ბახმაროს ბეტონიზაცია. ცხადია, თემას აქტუალობას სძენს. მინდა ჩვენი მამა-პაპის დროინდელი ბახმარო გავიხსენო. ყველა მნიშვნელოვანი დაწესებულება კურორტზე ქვით შენდებოდა, ხოლო ჩვეულებრივი მოაგარაკენი ხის სახლებს ამჯობინებდნენ მასალის ტრანსპორტირების და აშენების სიიაფის გამო. ხის სახლები ზაფხულში მოსახერხებელია, მაგრამ ნაკლებად ენერგოეფექტური ზამთარში. უცხოელი დამსვენებლებისთვის ყველაზე დიდი პრობლემა სწორედ თბილი ბინის პოვნაა ბახმაროში ყველაზე კარგი ზამთრის დროსაც კი. რამდენი ოჯახის ფინანსურ პრობლემას გადაწყვეტს კურორტის შესაბამისი ინფრასტრუქტურა ზამთარში. ჰაერის დეფიციტს ქვის სახლი ვერანაირად ვერ შექმნის. ყველას ინდივიდუალურად შეუძლია გადაწყვიტოს ეს საკითხი.
რაც შეეხება მრავალსართულიანი კორპუსების, ხეების გაჩეხვის, ბახმაროს საუკეთესო ადგილების მითვისების თემას, ეს მხოლოდ მანიპულაციაა და პროექტისადმი ნეგატიური დამოკიდებულების გაზრდას ემსახურება. ვიცნობ ამ პროექტს და ვთვლი, რომ იგი ყველა სტანდარტთან შესაბამისობაშია მოყვანილი.
არ შემიძლია ორიოდე სიტყვით არ შევეხო ბახმაროს და მახლობელი სოფლების მცხოვრებთა დამოკიდებულებებს. მინდა ვკითხო ყველას, ვისაც პროექტის მიმართ უარყოფითი დამოკიდებულება გაგაჩნიათ, ერთხელ მაინც იკითხეთ ადგილობრივი მოსახლეობის აზრი, რას ნიშნავს ეს პროექტი მათთვის? როცა უარს ვამბობთ მაღალი სტანდარტების დასასვენებელ კომპლექსზე, დავფიქრდეთ რა დგას მის მიღმა. ესაა ყველაზე დიდი პერსპექტივა ჩოხატაურის და არა მარტო ჩოხატაურის, სრულიად გურიის ეკონომიკური გაძლიერების თვალსაზრისით, რაც კი ამ ბოლო ათწლეულების მანძილზე გვქონია. წარმოგიდგენიათ რამდენი ადამიანი დასაქმდება წელიწადში 300 000 ვიზიტორის მომსახურების სფეროში? მხოლოდ მაღალმთიანი მოსახლეობიათვის დაწესებული შეღავათები რომ ვერ წყვეტს ადგილობრივების /ქვაბღა, ზოტი, ჩხაკოურა/ პრობლემებს ყველამ კარგად ვიცით. იცლება სოფლები მოსახლეობისაგან. ახალგაზრდები, ქალები, ყმაწვილები, თუ ვინმეს რაიმეს გაკეთება შეუძლია შიდა და გარე მიგრაციის მსხვერპლია. არავის ეხალისება საკუთარი კერის დატოვება და წლობით გადაკარგვა უცხო მხარეში, თუ დასაქმების შესაძლებლობას ადგილზე დაინახავს.
არანაირი საფრთხე ადგილობრივ ტრადიციებს და კულტურულ ფასეულობებს არ ემუქრება. პირიქით, უფრო გაძლიერდება და გამრავალფეროვნდება ბახმაროს ყოველდღიურობა. მამა-პაპის ხელობას ახალგაზრდები გააგრძელებენ, ფასი დაედება ნატურალურ და ეკოლოგიურად სუფთა პროდუქტს, დაფასდება გლეხის ნაშრომი და ჯაფით ნამზადი. ბახმარო, გურიის ეს ულამაზესი მარგალიტი, კი იქნება უფრო ახლობელი და უფრო ჩვენი, ვიდრე ახლაა”, _ წერს დავით საჯაია.
